Ralhrang ralkap cun Kalaymyo thlanglam ih Kalay PDF tatyin 4-nak sakhan cu may 14, zinglam nazi 10 hrawngah vanzam le helicopter in bomb an thlak ih, PDF sakhan a kangral thluh tin Kalay PDF tatyin 4-nak cun mipi an simthei.
Kalay PDF tatyin 4-nak cun “Kannih Kalay PDF tatyin 4-nak ih umhmun khuarnak sakhan cu May 14 zinglam nazi 10 hrawngah ralhrang ralkap in raldonak vanzam 3 le raldonak Helicopter 2 in minute 30 tluk in kap ciamco ih,hnuailam ah ralhrang mipum 200 hrawng cun kan sakhan in luhcilh bet.
“Ralhrang in vanzam le heilicopter in kan sakhan in do hnuah ralbawi Zaya Myo le Than Naing hohami ralhrang mipum 200 hrawng cun ke in kan sakhan in luhcilh. Kan sakhan ih doawknak ah ralhrang lam thi an um ding. Doawknak ah ralthuam a thlau aw tukih kannih Kalay PDF tatyin 4-nak pawl cu dung kan sip thluh.
“Ralhrang in tlunsang ih in kah ruangah kan miraltha lakin hriam ngah an um nan, mithi kan um lo. Kan umhmun kharnak, kan hmunpi sakhan sungih thilri le kan umnak inn pawl cu ralhrang ralkap pawlin an nawkkang thluh. Ralhrang ralkap cun kalay thlanglam cu thla 3 sung Internet le phone line an phit zo ih, duh vekin thuhla thanawk a theih lo a si,” tin Kalay PDF tatyin 4-nak cun thu an suah.
Kalaymyo sungah ralhrang ralkap dotu ralthuamkai pawlkom tamzet an um ih, cumi sungah Kalay PDF khal tatyin 12 tiang rori an um. Tatyin pakhat le pakhat an umnak a bangaw lo. Kan dung khalah ralhrang ralkap cun Kalay PDF tatyin 3-nak an rak la zo.
Leave a Reply