Ralhrang In Kalay Pituhsit Pawl Bike 120 An Pe

Ralhrang In Kalay Pituhsit Pawl Bike 120 An Pe – Sagaing ramthen Kalaymyo ah ralhrang ralkap pawl cun Min Aung Hlaing thusuak bangin Pituhsit an din ve ih, Pituhsit sungtel pawl cu August 19 ni ah bike 120 an pe.

Ralhrang ralkap in Kalay pituhsit pawl bike an pekmi cu 125 bike a si ih, ralhrang in a thar an lei siloin mipi bike an lonmi pawl a siko tin’ Kalay ih um pawl cun an sim. Hivek in Kalay ah pituhsti an um ve thlang tikah Kalay PDf cun khuasung doawknak a um tikah fimkhur sinsin a ttul ding thu an sim ih, mipi khal a hlan hnakin fimkhur sinsin dingin an theihter ve.

Kalay ih um pakhat cun “Ralhrang ralkap cun bike 120 a thar lei dingin sumpai an nei lo ding. Mipi bike an lonmi pawl cu a bum theimi Putuhsit pawl an pe. Min Aung Hlaing in rampi huapin pituhsit kan din ding a timi cu Kalaymyo khalah pituhsit an um zo. Curuangah, mipi kan fimkhur deuhdeuh a ttul a si,” tin a sim.

UN Palai Parah Ralhrang An Lungawi Lo – Ralhrang ralkap cun UN Myanmar palai Noeleen Heyzer parih an lungawi lo thu casuah in mipi an simthei ih, khatlam zawng thlir in thu a suah tin’ an puh.

August 17 ah UN Myanmar palai Noeleen Heyzer cun Myanmar khawpi Naypidaw ah ralhrang hotu Min Aung Hlaing a tong ih,thureltlanngnak an nei. Thu an reltlangmi cu khatlam khatlam in mipi theihternak an nei veve zo nan, Noeleen Heyzer in mipi a theihter dan ah ralhrang pawl an lungawi lo.

Noeleen Heyzer cun “Ralhrang hotu Min Aung Hlaing hnen ahcun mipi duhmi Federal Democracy uknak fehpi men dingin ka simthei ih, ram buainak ruangah kaihmi pawl that men lo dingin le ram buainak ruangah kaihmi pawl thlah zalen thluh dingin ka sim. Mipi tuar ding zawngin raldonak vanzam hmang lo dingin ,bomnak a thlen tikah tibuai lo dingin timi pawl kan simthei,” tin thu a suah.

Ralhrang ralkap cun “Thurelmi tampi kan nei ih, remnak a um theinak dingin theitawk kan suah ve. Anih UN Myanmar palai cun dankalh pawlkom thu nasaten a rel ih, kannih khalin PDF pawl cangvainak cu fiahnak kan neihmi pawl thawn kan rak hmuh thluh. Asinan, kanmah lam thulawng a suah ih, khatlam lawng a zoh. Mipi tuar ding zawngin kan cangvai a silo ih, dankalh PDFpawl umnak an bat. Curuangah, hivek cu remawknak um dingin biakawknak buaitertu a si,” tin thu an suah.

N.Korea In S.Korea An Hro – S.Korea president Yoon Suk Yeol cun N.Korea hnenah Nucear ralthuam nan thianfai asile kannih S.Korea cun N.Korea thangsohnak dingah ziangkim kan lo bawm ding tin’ a simthei ih, cucu N.Korea lamin an rak thinhengpi.

S.Korea president Yoon Suk Yeol cun S.Korea president a si veten N.Korea thawn remawknak neih ih, N.Korea thansohnak hrang theitawk ih bawm a duh thu arel cih. Asinan, N.Korea lamin ralthuam lawnglawng an buaipi tikah N.Korea bawmin S.Korea an cangvai thei lo. Curuangah S.Korea president cun N.Korea hnenah ralthuam lawnglawng buaipi lo dingin a sim ih, thansohnak hrang ziangkim kan lo bawm thei tin’ a sim nonsal.

Cutikah N.Korea presidnt ih nau Kim Yo Jong cun “S.Korea in kan hrosuannak Nuclear le thansohnak men an tahthiam cu nauhak ruahnak vek men a si. Remnak kan tuah duh an ti ringring nan, tu ah S.Korea le US cun raldo zirtlangnak neih an tum. Hivek zin cun remawknak tuah a theih lo. Curuangah, tonglo dingmi an tongsuak lonak dingah an kaa cip men haiseh,” tin N.Korea cun S.Korea an simthei.

USA le S.Korea cun August 22 in September 1 tiang raldo zirtlang runpi an neih dingih, N.Korea lam ngaihdan a si thei lo. N.Korea cun “kan nuclear neih cu nasaten an buaipi nan, anmah S.Korea khal US thawn raldo zirtlangnak an nei ringring ih, sullam nei lo an tong rero men a si tin’ an sim.