Ralhrang In Khua 3 An Ukrang ih,Mi 20 An Kai

Tamu Ah Ralthuamkai In Inn 2 An Bauh – Sagaing ramthen Tamu khua myomah vengih um inn pahnih cu ralthuamkai mi 7 hrawngin August 28, zan nazi 9 hrawngah an luhcilh ih, inn sung thilri tampi an laksak.

Inn pahnih cu naih awte an si ih, ralthuakai mi 7 cun ralthuam famkim thawn inn an luhcilh. Ralthuamkai pawl cun Pistol , meithal le namsau an keng. Inntek tei an velh hnuah meithal in an tin ih, inn sung thilri an hmuhmi pohpoh an laksak.

Tamu ih um pakhat cun “Inn naiawte an si ih, misual pawl cun veikhat ah an inn hnih in an luhcilh. Inn 2 sungin bike 3, sui thilri, phone 4, tangka ting 20, fanfai, siti, ci tiang an laksak. Ralthuamkai pawl cun inn an luhcilh veten inn sungih um pawl cangvai thei lo dingin an hrem hngal. Nauhak pahnih le pitar pakhat cu nam in an sawh ih, cangvai lo dingin thu an pe.

“Misual pawl an tlan thluh hnu khalah nauhak pawl cu an tih tuk lai. Misual pawl cun inntek tei hnenah neta ah kan rasal dingih ting 150 rak ralring uh tin an hro. Inntek tei cun an tih tukih, palik hnenah an hek nan, palik lam cun zianghman an rak tisak lo, kan hawl hmu tikhalin an rak tiam lo.

“Kan zumdan ahcun PDF an si thei lo,inntek tei khalin Pyu Saw Htee an siko ding tin an sim. Ziangahtile, myomah veng cu ralhrang ralkap le Pyu Saw Htee pawl umnak le an tlanlennak hmun a si,” tin a sim.

Myanmar ram a buai hnuah ramsung hmun tinkim ah rittheihsi tham le zuar an tam deuhdeuh ih, rukru khal an tam deuhdeuh. A bur ih rukru an um bangin, ralthuam kengih rukru tiang an um zo. Hivek cu ramsung hmun tinkim ah an luar deuhdeuh tin mipi cun an sim.

Tidai Ih Dawp Nufa Ruang An Hmu Hrih Lo – Bago ramthen Pyi myone myotit vengih um kum 24 hrawng nupinu pakhat cun a fanu kum 3 mi a hruai ih, August 28, sun nazi 1 hrawngah Lilawn parin tidai ah a dawppi.

Nufa hnihte Lilawn in tipar ih an dawp cu kiangkap ih rak um pawlin an hmu ih, zamrangten mibawmtu pawlkom an theihter hnuah ruang an hawl hngal. Asinan, August 29 tiangah nufa hnihte ruang cu a hawltu pawlin an hmu thei hrih lo.

Ruang hawltu pakhat cun “A hnu reilo ah a pasal khal a thleng cih ih, ruang hawlnak ah a tel ve. Theitawk in ruang kan hawl rero nan,kan hmu thei hrih lo. Ruang hawlnak ah lawng 3 kan hmangih tisung lut a hranten an um bet. Ziangruangah tidai ah an dawp timi a san cu kan thei lo. A pasal khalin a rel lo. Ruang kan hmuh hlanhlo cu hawl kan tum a si,” tin a sim.

August 29 khalah Yangon Kamayuat ih um mi pakhat cu Inhlia tipi ah a dawp ih, zanlam nazi 4 hrawngah thicia in a ruang an sar. August 25 khalah Yangon mayankung vengah mi pakhat zinpar lilawn in a dawp ih, annih cu a nunnak cem loin an runsuak thei. August 26 ah Tamu ih CDM tlawng sayamh pakhat cu a inn sungah a rak awt that zo.

Ralhrang In Khua 3 An Ukrang ih,Mi 20 An Kai – Sagaing ramthen kani myone Tayetpin khua, Wadan khuathar le khuahlun pawl cu ralhrang ralkap in August 29 ni ah an luhcilh ih, mipi inn duhtawk in an urkang sak.

Ralhrang pawl cun August 17 in Kani peng sung an hrut thok ih, chindwin tiva tluan an hrawh vivo. An fehnak lamzin tluanah mipi inn an urkang sak phah vivo ih, mipi 20 khal an kai hnuah ralphaw ah an hmangih, an hruai vivo.

Khuami pakhat cun “Tuhrih tiang ahcun kan khua in inn ziangzat ciah a kang timi kan fiah thei hrih lo. Ralhrang pawl lamzin tluan an dap phah vivo tikah khua sungah kan lut ngam hrih lo. Mipi an that ti cu kan thei lo nan, mipi 20 an kaihmi cu an thlah hrih lo. Ralhrang pawl khua sung an luh tikah mipi thilri duhduh an la ih, tival vulhmi pawl khal an that ih, an ei ciamco men. Hivek ruangah khua mipi tamzet cu khua ah um ngam loin kan tlan thluh a si,” tin a sim.

Bangladesh In Ralhrang Ralrinnak An Pe – August 28, zanlam nazi 3 hrawngah Myanmar ramri Bangladesh ah ralhrang kahsuakmi ralthuampi a tla ih, Bangladesh cun ralhrang pawl ralrinnak an pe cih.

August 29 ah Bangladesh cun Myanmar palai an ko ih, Bangladesh ramri sungah ralthuampi le cerek tlater nawn lo dingin an theihter. Bangladesh ih tla ralthuampi cu a puak lo nan, khua mipi in an tih tuk ruangah khua mipi pawl khua ah um ngam loin an tlan phah.

August 28, zanlam nazi 3 hrawng ahcun Rakhine ramkulh Maungtaw myone ah AA le ralhrang an kap aw ih, ralhrang cun duhtawk in ralthuampi an kap ciamco. Ralhrang kahsuakmi ralthuampi cun nauhak pakhat telin mi 3 a ngah that ih, hriamhma tuar khal an um. Ralhrang pawl ih kahsuakmi ralthuampi cu Myanmar ramri lanin Bangladesh lamah a tla ih, cumi ruangah Bangladesh cun ralhrang ralrinnak pe an si.

Rakhine ramkulh sung le Chin ramkulh thlanglam Paletwa peng sungah AA le ralhrang ralkap pawl an do aw deuh ringring thlangih, Rakhine le paletwa ah raltlan an tam deuhdeuh. Doawknak a um tinten ralhrang ralkap pawl cu mipi tuar ding zawngin an cangvai hngal ih, duhtawk in ralthuampi an kap ciamco theu. Hivek ih cangvai ralhrang pawl cu Rakhine tlawngta pawlin an mawhthluk lawlaw.