Ralhrang In Khuami 10 An That

Timit Ah Ralhrang 3 An Thi – Chin ramkulh Hakha le Thantlang karlak Timit Lilawn kiangih doawknak ah ralhrang 3 an thi tin CDF Zophei cun mipi theithernak an nei.

CDF Zophei cun “Timit lilawn tuah dingin feh ralhrang ralkap mipum 80 hrawng cu Lungkhar kiangah CNA, CDF Zophei, CDF Hakha, CDF Thantlang le CDF Lautu pawlin August 3 ah vei hnih kan kap ih, ralhrang 3 an thih tlunah ralhrang hriamhma ngah khal an um.

“Sun nazi 1 hrawngin ralhrang pawl kan kap thokih ,picang deuh cun vei 2 kan kap. Vei hnihnak ralhrang pawl kan kah caan cu zanlam deuh a si ih, ralhrang thizat le hriam tuarzat kan fiah thei nawn lo. Ralhrang pawlin ralthuampi an hmang ciamco ih naih ngam ding ci an silo. July 31 in kan kap aw zo ih, ralhrang pawl dung an sip lo ruangah kannih khal ralhrang pawl kan bawh ringring lai. Ralhrang pawl cu timit ih umhmun khuar tum an si ruangah, doawknak a um vivo lai ding a si,” tin thu an suah.

Tuitum ih ralhrang pawl cu Sagaing ramthen Kalaymyo in Chin ramkulh saklam rak pantu pawl an si ih, timit lilawn tuah an tum si ding tin thuhla a rak um zo bangin timit lilawn tuah tum taktak an si. Cucu, mipi ralkap lamin rem an tilo ih, lamzin in an rak bawh tikah ni 4 sung an do aw zo.

Timit lilawn cu Hakha in Thantlang fehnak lamzin ah a um ih, Thantlang ih ralhrang pawl eiin le ralthuam phur thei hlah haiseh tin 2021 October 21 ah mipi ralkap lamin bomb an rak puah siatmi a si.

Ralhrang In CDF 3 An Urkang – Chin ramkulh matupi sungih doawknak ah Ralhrang pawl cun CDF Zotung sungtel mi 3 an kai ih, an urkang that tin CDF Zotung cun thu an suah.

Ralhrang ralkap pawl cun July 22 ah Chin ramkulh matupi peng Rangcci khua an luhcilh ih , biakinn sungih relh khuami 27 pawl an kai. Ralhrang ih kaihmi khuami pawl ziang an bang tin CDF Zotung sungtel 3 pawl cu khua sungah thupten an va lutih, mipi umdan an zohthup. Cumi laifang ah ralhrang pawlin an kai ngah ih an urkang.

CDF Zotung thuphuangtu cun “Commander in Chief le midang 2 cu khuami pawl ziang an bang timi zohthup dingin khua sungah an lut. Ralhrang ih kaihmi khuami pawl an zohthup laiah an kiangih relh ralhrang pawlin an kai ngah. Ralhrang in CDF Zotung sungtel 3 an kai timi cu khuami pawlin an thei lo.

“July 27 ahcun ralhrang pawlin mei an muah ih, meisa rim ahcun minung taksa rim a nam tin Biakinn sungih khummi pawl cun an sim. Khuami pawl cun ralhrang pawlih urkang thatmi zo an si timi an theifiang lo nan, mi 3 an si ruangah kanmah CDF Zotung sungtel 3 an siko tin kan nemhnget zo a si,” tin a sim.

Ralhrang pawlih urkang thatmi CDF Zotung sungtel pawl cu hotu Thah Ceu ( kum 40 ), Aung Ming Thang ( kum 20 ) le Thang Cing Mang ( kum 20 ) pawl an si. Ralhrang in khuami 27 an kaihmi pawl cu August 3 ah an thlahsal thluh zo tin CDF Zotung lam cun an sim.

Lah-wah-kah Zung Puak Ah Mi 5 An Thi – Mon ramkulh Yi Khua ih Lah-wah-kah zung cu August 3, sun nazi 12 hrawngah mipi ralkap pawlin bomb an va puah ih, Lah-wah-kah hnatuan 5 an thi tin Yibilu cun thu an suah.

Yibilu hotu cun “Ziangruangah Lah-wah-kah zung bomb kan puah ih kan kap ti asile ralhrang uknak an fehpi reromi kan duh lo ruangah a siko. July 31 ah ralhrang hnuai ih hnatuan pohpoh an hna suahsan dingin le mipi lamtang dingin thu kan rak suah zo. August 2 tiang caan kan pe ih,Lah-wah-kah zungih hnațuan zohman mipi lamtang an um lo. Cumi ruangah August 3 ahcun bomb kan puah ih kan kap.

“Lah-wah-kah zung ih hnatuan pawl cun luarkai tukin mipi tangka an dil ih, cumi ruangah bomb kan puah lawlaw. Yi myone sungih cozah hnatuan lai pohpoh kannih Yibilu cun kan thianfai vivo ding. Tuitum khal ralrinnak kan pekmi an thlun duh lo ruangah a takin cangvai kan si,” tin thu an suah.

Ralhrang In Khuami 10 An That – Sagaing ramthen Minmoe myone Letpancin khua cu ralhrang ralkap in vanzam in an kah tlunah leihnuai khalin an luhcilh ih, khuami 10 an that.

Ralhrang ralkap cun August 1 ah Letpancin khua cu raldonak vanzam 4 in an kap ih, leihnuai khalin ralhrang pawl cun letpancin khua an rak luhcilh ve. Ralhrang pawl khua ih an suah hnuin khuami pawl cun khua thianfainak an nei ih, ralhrang ih thahmi ruang 10 an hmu.

Thenkhat cu ralhrang raldonak vanzam ih kah thatmi an si ih, thenkhat cu ralhrang in an kaih hnuah hridai in an khit ih an hrem thatmi an si. Khuami pawl sim dan vek asile ralhrang ralkap in khuami dang 14 khal an kai ih, ralhrang fawm an hruhter hnuah ralphaw ah an hmang. Kaihmi 14 pawl cu, tutiang an thlah hrih lo tin an sim.

“Ralhrang pawl kan khua panih an rat thok ni in kan siar asile ni 3 a kim thlang. Ralhrang pawl cu Mandalay lamin ralut an si ih, mipi ralkap thawn an doawknak ah ralhrang thi an tam. Cumi ruangah ralhrang pawl cun raldonak vanzam an hmang. Raldonak vanzam 4 thawn duhtawk in khua sung an kah tikah a rapthlak tuk lawlaw,” tin BBC a simthei.

Ralhrang ralkap cun Letpancin khua ih thilthleng thuhla ah mipi theihternak an rak nei ve ih, doawknak ah PDF 5 an thi tin thu an suah. Mipi cun Letpancin khua in inn 15 hrawng a kang tin an sim.

Thawnginn Sibawi In Daw Suh A Tuamhlawm – Naypidaw thawnginn sungih an khummi Daw Suh Kyi cu a damthat thei lo ruangah kan dung zarh sung cu thawnginn sungih sibawi in a tuamhlawm rero tin buaipitu pawl cun an sim.

Thuhla theitu cun “Thawnginn sungah rawl a ei mumal lo ih, a ti lamlawng a in tam. A sam khal a tla tuk. Kan dung khalah veikhat a tlu zik zo nan, a ttang tento thei. Cumi ruangah sibawi an kawhsak ih tu ahcun a cakvak sal zo. A taksa cakvak lo caan nei hman sehla a thinlung ruahnak cu a hngetkhoh tuk lai a si,” tin a sim.

Thawnginn sungih Daw Suh Kyi umnak ah sangka 6 a khar um lo pawl a um ih, cumi sangka khal duh vekin kharsak a silo ruangah Daw Suh ih umnak a hlum tuk tin a umnak hmutu pawl cun an sim.

Ralhrang thuphuangtu Zaw Min Tun cun “Daw Suh Kyi cu Naypidaw thawnginn sungah hleice in kan ret ko. Thawnginn sungih kan khumnak san cu daan vekin thubuai a neih ruangah le hremnak pekmi a si ruangah a si,” tin a sim.

Kum 77 kim zo Daw Aung San Suh Kyi cu ralhrang in rampi thuneihnak an lak hnuah thubuai 19 an tuah sak zo ih, thubuai 6 hrang kum 11 hremnak an pe zo. Tu ah thubuai 13 pawl cu Court ah rel peh rero lai an si.

Russia Palai Le Min Aung Hlaing An Tongaw – Myanmar ih tlawng Russia ramdang vuanci cun ralhrang ramdang vuanci Wana Maung Lwin a ton hnuah ralhrang hotu Min Aung Hlaing khal a tongih, ram pahnih tuantlang dan ding an rel.

Russia ramdang vuanci le ralhrang hotu Min Aung Hlaing cun ralthuam thuhla, sipuazi thuhla le thansohnak ding thuhla relnak an nei ih, ram pahnih cu ralthuam dinhmun le sipuazi ah tuantlang dingin lungkimnak hminkhen ngan an tum. Ram pahnih palai pawl cu tui kum sungah tonawk sal an tum.

Tuitum ih Russia ramdang palai Myanmar ih a tlawnnak san bikih an relmi cu Myanmar ralhrang thawn ralthuam dinhmun le sipuazi ah nasa sinsin in tuantlang ding timi tumtahnak thawn a si ih , ralhrang thawn remawknak felfai hminkhen an ngan hrih lo nan, tuikum sungah remawknak felfai hminkhen tuah tum an si.

Ralhrang hotu Min Aung Hlaing cun Russia ramdang vuanci hnenah laksawng a rak pe ih, Russia ramdang vuanci khalin Min Aung Hlaing laksawng a pe ve. Ram pahnih cu an sual tuk ruangah leitlun ramdang tampi in ziangkim ah an tuanpi duh lomi an si ih, cumi thei keukeu in, anmah le mah ziangkimah tuantlang an tumin a lang.

Nancy Pelosi In Taiwan A Suahsan – China thinheng ko tuahtu Nancy Pelosi cun August 3 zanlam ah Taiwan a suahsan ih Asia ramsung a khualtlawnnak peh vivo in S.Korea a pan. US house Speaker Nancy cu Asia ah a tlawng kual ih, Malaysia in Taiwan a rak pan.

Hmundang ih a tlawnak ahcun China an buai tuk lo nan, kan ramsung a si ti ih an ham reromi Taiwan ah Nancy a ttum taktak cu China an thinheng tukih Taiwan kiangkap ah ralkap le ralthuam phunphun an ret phah.

China thinheng tuk cun Taiwan ramri tiangah raldo zirnak an nei ciamco ih, a phunphun in Taiwan an hel rero. Hivek dinhmun ah Taiwan cun China lawng le raldonak vanzam pawl hrial hrih dingin an ralkap pawl an simthei nan, China’n in kap asile kan neihmi ziangkim hmangin theitawk kan humhim aw ding tin Taiwan President a tongsuak.

Nancy in Taiwan a suahsan hnuah China lam an dai pei maw, Taiwan an hnaihnok peh pei maq? an kap pei maw timi cu an cangvaih dan in a lang vivo dingah ruah a si.