Ralhrang Bomb Thlakmi Ah Mipi 80 Thi – Kachin ramkulh Phakan myone anan khua ih mipi umkhawm cu zan nazi 8:40 hrawngah ralrhang ralkap raldonak vanzam in bomb an thlak ih, cumi ruangah mithi ruang 80 tlun kan hmu zo tin buaipitu pawl cun an sim.
Mithi an tamnak san cu hriamhma ngah pawl Phakhan sizung le Myintkyina sizung ah tuamhlawm an tum nan, ralhrang ralkap in lamzin an rak kham ih, hriamhma ngah lakin thi an um bet rero tin an sim.
Ruang buaipitu pakhat cun “Makzet cu ralhrang in bomb an thlak hnuah lamzin khal an phit cih. Zinglam ah mibawmtu pawlkom pawl cun hriamhma ngah pawl cu hmunpi fehpi dingin an dil nan, ralhrang pawlin lamzin an rak on duh lo. Cutikah mithi an tam deuhdeuh phah. Tutiang ahcun mithi ruang 80 kiangkap kan hmu zo. Damlo pawl hmunpi ih tuamhlawm an si theinak dingah theitawk kan zuam vivo ding a si,” tin a sim.
Phakan myone Anan khua ahcun KIA /KIO kum 62 kimnak hrang Concert an nei ih, Kachin hlasakthiam tamzet cun mipi an awi. Cumi laifang ah ralhrang lam cun raldonak vanzam in mipi umkhawmnak hmun cu bomb a thlak ih,mipi thi an tam phah. Mithi lakah Kachin hlasakthiam milar thenkhat khal an tel.
Hivekin ralhrang in KIA le Kachin mipi umkhawmnak bomb an thlakmi thu ah a san relsuahnak an nei ve ih, KIA in kan sakhan in do ringring ruangah Cumi thungrulnak hrang KIA le mipi umkhawm bomb thlak kan si tin an sim.
Ralhrang cun “KIA le PDF tangtlang cun October 21 in 23 tiang Moemauk myone ih kan sakhan pawl in kap ciamco. Sagaing ramthen Kathar, Shweku le Bamaw pawl khalah KIA le PDF tangtlang cun kan hmunram pawl in kap. Cumi ruangah KIA umnak hmunpi kap kan si,” tin ralhrang lam cun thu an rak suah ve.
Phakan ih um pakhat cun “Siatnak rapthlak tuk rori a si ih, mithi lakah KIA ralbawi tivek khal an tel. Tuitum ah ruang 80 an sar zo ih, hriamhma ngah an tamzet ruangah mithi an tambet vivo thei. Hivek lawmmam siatnak thleng hi zoi hrang khalah tuar a har. Cutikah KIA lamih cangvaihnak kan hmu cih dingin a lang. Doawknak picang a suak thei. Culo hmanah ralhrang hmun pakhat khatin an tuar cih ko ding. KIA lam daiten an ummen lo dingih, an thungrulnak a um cih ko ding,” tin a sim.
KIA thuphuangtu ralbawi Nawbu cun “Tuhrih ahcun zokhal kan buai thluh ih, cazin cekci ngah a har. Tuitum ralhrang in bomb an thlaknak hmun cu kan sakhan pakhat kiangah a sinan, mipi thawn umtlang ih concert an tuahnak hmun a si. Hivekin ralhrang pawl an cangvaih tikah remdaihnak cu kan hla deuhdeuh in a lang. Ralhrang khal mipi in an zum thei nawn lo dingih kan ram Myanmar buainak cu a hnok deuhdeuh ding. Hivek ih ralhrang cangvaihnak ruangah KIA central lamin a rangthei bikin thusuah an nei cih mai ding a si,” tin a sim.
Tlangpar Ralthuamkai Unau 3 In KIA Tuarpi – Tlangpar ralthuamkai unau 3 tiah hminpe aw AA, MNDAA le TNLA pawl cun Kachin ramkulh Phakan myone ih ralhrang cangvaihnak an mawhthluk tuk thu tarlang in KIA le Kachin mipi an tuarpinak an langter.
Tlangpar ralthuamkai unau 3 cun “A tufang ram buainak ah ralhrang pawl cu an umdan le tlanlen dan a dik thei nawn lo ih, ralthuam rinsan kengkeng in mipi tuar ding zawng hlir in ramsung hmun tinkim ah an cangvai thlang. An cangvaih dan cu ralkap pakhat sinak khal an pu lo ih, ralkap daan pahbalmi tampi an nei.
“Hivekin ralhrang pawl cangvaih dan cu nikhat hnu nikhat a luarkai deuhdeuh ih, mipi kan fimkhur a tul tlunah ramleng khalin thaten an zohfel a tul. Ramleng in ralhrang an hrem ding caan a thlen zo bangin kannih tlangpar ralthuamkai pawl khalin ralhrang sinak theifiang tuk ding kan si ih, lungrualten kan tuah dingmi cu a takin tuah vutvo thlang ding le a takih ka tuah ding caan a thleng zo.
“Ralhrang cun KIA ralkap le mipi umkhawmnak hmun cu raldonak vanzam in bomb an thlakih, KIA ralkap, Kachin hlasakthiam le Kachin mipi tampi an thih phah timi kan theih tikah kannih unau thum cu kan riahse tuk lawlaw. Ralhrang in an tuahpi vekin tuarsal rori hai sehla a tuartu pawl pawl diknak ngah dingi kannih cun beiseinak kan nei ih, kan unau thum cun KIA pawl kan lo tuarpi tuk a si,” tin thu an suah.
Kayah Khalah Ralhrang In Mipi An Kap – Kayah ramkulh Loikaw myone Kungtar khua ih raltlan pawl umnak hmun cu ralhrang ralkap in ralthuampi thawn an kap ih, raltlan pakhat a thih phah tlunah hriamhma ngah 3 an um.
Raltlan buaipitu pakhat cun “Doawknak zianghman a um lo nan, ralhrang pawl cun zan nazi 9 hrawngah raltlan pawl umnak cu ralthuampi in an kap. Mipi in an kap hrim rori a si ih, raltlan pakhat a thih phah tlunah hriamhma ngah 3 an um. Raltlan umnak hmunih ralthuampi a tlak tikah inntek pa a thi ih, hriamhma tuar lakah nauhak an tel.
“Ralhrang pawlih rapthlak zia cu mipi tuar ding zawng rori in an cangvai. Hivek cun ziangtik hmanah mipi thinlung an neh thei nawn lo ding. Tu ahcun rampi huapin ralhrang kan hua ih,an cimit ding cu kan duhbikmi a si thlang. Ziangahtile, anmah ralhrang in mipi ziangih in siar ve lo ruangah a si,” tin a sim.
Leave a Reply