Ralhrang In KNU le PDF An Cokbuai

Ralhrang In KNU le PDF An Cokbuai – Ralhrang ralkap cun KNU le PDF buai haiseh, mipi in KNU le PDF hua haiseh tin thu phunphun an rak suah ih, KNU le PDF pawl sual an puh.

Curuangah KNU cun thil umdan diktak mipi simtheihnak an nei ih,thuhla theifiang lo cun suhfiang a theih ringring tin mipi an simthei. Ralhrang cun KNU hi NUG uite an si ih, NUG ih fialmi pohpoh an tuah. KNU le PDF cun sumpai lakluhnak ah mikaihmi khal an nei. Mipi hrang KNU Le PDF an him lo tiin thu an suah.

Curuangah KNU cun hitin thu an suah ve, “Kannih KNU hmunram sungah KNLA, KNDO, PDF le LPDF pawl cu lungrualten kan umkhawm ih ralhrang ukak cemral ko doin theitawk kan suah khawm. Hivekin kan lungrual tukih kan thazang a cak tuk ruangah ralhrang pawl cun in halhsik tukih thu phanphan an suah rero zo.

“Ralhrang ralkap lamtang pawl cun KNLA, KNDO le PDF pawl buai ding zawngin thu an thlah ciamco ih, CDM pawl khal an hnaihnok. Curuangah mipi kan lo simtheih duhmi cu ralhrang siseh ralhrang lamtang pawlih thusuahmi tivek cu an zum lo pei. Thudik le thufiang sawn theih nan duh asile kanmah KNU in sut thei ringring a si,” tin KNU cun thu an suah.

PDF thuphuangtu cun “Tu ah KNLA le KNDO pawl thawn kan lungrual tukih ralhrang pawl kan do ringring. Kan lungrual tuk tikah ralhrang pawl an tuar tuk thlangih kanmah siatsuah dingin lamzin phunphun an hawl. Curuangah kannih PDF, KNLA le KNDO khalin kan zate lungrual in mipi simfiangnak ca kan suah. Mipi khal ralhrang lam thusuak siloin kanmai thusuak sawn zum dingah kan cah duh a si,” tin a sim.

Rakhine Le Paletwa Ah Raltlan An Pung – Rakhine ramkulh le Chin ramkulh Paletwa peng sungih AA le ralhrang doawknak ruangah raltlan an tam deuhdeuh ih,tu ahcun raltlan thar thawng 17 an um zo tin hminsin tuahtu pawlin an sim.

Ralhrang cun Rakhine ramkulh sung le Paletwa peng sungih um mipi pawl cu duhduh in vahsuah an siang lo ih,lamzin phihmi an nei tam. Ralhrang in lamzin an phih ruangah Rakhine le Paletwa ahcun ramdang ihsin raltlan pawl bomnak a lut thei lo.

Ralhrang ralkap cun Rakhine ramkulh sungin AA thawn an doawknak hmunpi Buti Tuang, Maungtaw, Rati Tuang, Myeuk OO, Minpia le Mipung pawlah ramleng bomnak luh an siang lo ih, raltlan pawl bawmtu pawlkom khal an cangvai thei lo. HIvek ruangah Rakhine ramkulh le Paletwa peng sungih raltlan pawl cu an harsa deuhdeuh ih, ei ding an tlasam tuk thlang tin buaipitu pawl cun an sim.

Mandalay Ih Nufa Thattu An Kai – Mandalay ramthen Pyikyi Takuan myone Ngwedawkyi kung vengih nufa cu dawr nei cu October 6, zinglam nazi 4 hrawngah misual in an nufa in a that ih phone le sumpai a laksak.

Thilthleng pawl pehparaw in sual tuahtu kaih a si ih zodang siloin an veng, an inn kiangih um a rak si. Nufa cun sii dawr an nei ih, an inn le dawr a peh aw. An inn kiangih um cun zinglam ah an dawr a bauh ih,nufa in an theih tikah an zoh ih an hmel theih a rak si. Cuveten a that lawlaw.

Venghnen pakhat cun “Thilthleng umdan taktak cu rel a har. Ziangahtile intek panih an thih tikah an kaihmi misual ih rel dan a siko. Misual cun sii lei ding vekin sangka ka ongter ih ka that hai tin a phuang aw. Asinan, kannih venghnen mipi cun zinglam khuavan hlanah an dawr a bau ih, inntek tei in an theih tikah an hmeltheih a si fawn a that lawlaw siko ding tin kan ruat.

“Inntek a thah hnuin phone 2 le tangka ting 28 a la. An kaih theinak ah a phone lakmi hmangin a si ih,a rak tlan man lo. Kannih Mandalay ahcun rukru le suamhmang an tam tukih mipi kan him lo lawlaw. Covid 19 ruangah mipi kan harsa ih,ram a buai peh tikah rukru le suamhmang an tam deuhdeuh a si,” tin a sim.

KIA Le PDF In Ni 7 Sung Ralhrang An Kap – Shan ramkulh Palaw hmunram Mandung kiangkap ah KIA le PDF tangtlang cun September 29 ihsin October 5 tiang ralhrang an kap zo. October 3 le 4 ah doawknak a sosang cuang ih, ralhrang cun inn pakhat le phungki tlawng pakhat ralthuampi in an kap.

KIA le PDF tangtlang cun ralhrang sakhan le palik sakhan pawl an kap vivo ih, ralhrang ralkap cun an umnak hmun in ralthuampi an kapsuak ciamco ve. Ralhrang pawlih ralthuampi kahsuakmi ruangah mipi lakin hriamhma ngah khal an um. Doawknak ruangah khuami pawl cu khua ah an um ngam lo ih hmunhim panin an tlan thluh.

Khuami pakhat cun “October 6 cun doawknak thawmvang a zia-um vivo. September 29 in October 5 tiang cu nitin rori’n an do aw. Doawknak ah ralhrang lam thi an tam tilawng kan thei ih, a zat kan theive lo. Tu khalah boruak a dai taktak lo ih, doawknak picang suak thei ringring a si,” tin a sim.

Thailand Ah Palik Cawlhtermi In Mi 37 Kap That – Thailand ram Nong Bua Lamphu ramkulh ah palik an cawlhtermi pakhat cun tualleng tlawng a luhcilh ih duhduh in meithal a kah ciamco ruangah mi 37 an thi zo tin BBC cun a tarlang.

Palik cawlhtermi cun tualleng tlawng sungin nauhak kum 2 in kum 4 karlak mi 22 a kap that ih, midang 15 khal a kap that bet. Tualleng lawngih mi a kah that hnuin palik cawlhtermi cu a tlan hngal ih, Thailand palik pawlin an hawl rero nan, an hawl sungah palik cawlhtermi cun a nupi le fate a kap that betih cumi hnuah amah le mah khal a kap that aw.

Thailand palik cun “Tuitum ih mi 37 thattu palik hi rittheihsi thawn a pehparawk ruangah 2022, June thla ah palik a sinak in cawlhter a rak si. October 7 ah a thubuai thawn pehparaw in Court feh ding a si ih, a thinbang ,a beidong tuk ruangah tuvekin a cangvai siko ding. Mithi 37 an um tlunah mi 17 khal hriamhma an ngah ih, sizung ah tuamhlawm rero lai an si,” tin a sim.

Palik cawlhtermi cun tualleng tlawng sungih meithal a hmet puak ciamco hnuah nam a kenmi khalin duhduh a dawt ih, a sat vivo phah. Sizung ih tuamhlawmmi hriamhma ngah lakin thenkhat cu an thinsen suak tam tuk ruangah thisen pek tul tiang an um tin buaipitu pawl cun an sim.