Ralhrang ralkap cun tuini June 2 ah ramsung hmun tinkim in tlawngkai dingih hminpe tlawngta pawl cu tlawnginn ah kum 5 in kum 12 tiang pawl covid 19 nat khamnak sii an dawt thok.
Rakhine ramkulh harhdamnak bawi Dr. Kyi Lwin cun “Kannih Rakhine ahcun tuini June 2 ihsin thokin tlawngta nauhak bik pawl khal covid 19 nat khamnak sii kan dawt. Cupawl cu kum 5 in kum 12 karlak pawl an si. Tlawngta nauhak pawl covid 19 nat khamnak sii kan dawhmi cu Sinopharm a si,” tin a sim.
Tlawngta nu pakhat cun “Ka fapa cu phun 3 kai rero lai a si. Tu ahcun covid 19 nat khamnak sii an dawh zo tikah hna ngam. Hivek a si tikah tlawngta nauhak pawl khal hahdam ten tlawng an kai thei ding. Hivek in nat khamnak hrang sii dawh ciami cu humhimawknak ah a tha tukmi a si,” tin a sim.
Rakhine ramkulh sungah hramthok tlawng ( Muladan ) kai dingin tlawngta nauhak ting 3 le thawng 50 an um ih, lailak tlawng le suakthawn tlawng thawn cun Rakhine ramkulh sungah tlawngkai nauhak an tam.
Naypidaw ,Kalaymyo le hmundang khalah tlawngkai nauhak kum 5 in kum 12 tiang covid 19 nat khamnak sii an dawt ve ih, ramthen le ramkulh tin khalah tlawngta nauhak kum 5 in kum 12 tiang covid 19 nat khamnak sii kan dawt vivo ding tin ralhrang cun thu an suah.
Ralhrang cun 12 in tlunlam tlawngta nauhak pawl cu covid 19 nat khamnak sii an rak dawt zo ih, kum 12 in tlunlam pawl covid 19 nat khamnak sii dawt hrih lo tlawngta nauhak pawl khal covid 19 nat khamnak sii an dawtter thotho ding. Tlawngta nauhak zaten covid 19 nat khamnak sii an dawt thluh ding a si tin thu an suah.
Ralhrang 6 An Kap That Aw – Tanintharyi ramthen Bukpin myone ih ralkap hmunpi ah ralhrang ralkap pawl khat le khat tongkam an el ih , tongkam men ah duhtawk loin an kap aw. Cuvek ih ralhrang pawl anmah le mah an kahawknak ah ralhrang 3 an thi tin khuami pawl cun an sim.
Ralhrang mi 4 cun ralhrang dang mi 3 an kap that ih, amah ralhrang 4 pawl cu ralthuam la in an tlan. Ralhrang 4 tlan pawl cu ralhrang dangin theitawk in an hawl ih, katurah khua kiangah ralhrang tlan 4 lakin 3 an kap that ih, ralhrang pakhat cu an hmu hrih lo. Ralhrang an hmuh lomi khal ralhrang dang pawl cun theitawk in an hawl peh rero lai.
Khuami pakhat cun “Kan mithmuh rori a si. Ruang an phurh lai kan hmu tlunah an kahawk thawm khal kan thei. Hinah mipi ralkap thawn doawknak a um lo ih, ralhrang pawl anmah le mah kap aw an si. Hilam cu KNU hmunram a si tel tikah doawknak a um phah ringring ko.
“Hitawk ih ralhrang pawl cu Karen ralkulh ah raldo dingin thlah theumi pawl an si ih, Karen ramkulh an thlen tikah nungdam ih kirsal an mal. Curuangah ralbawi sangtu khal ralthuam famkim thawn KNLA kutah a rak pe aw zo. Hivek a si tikah anmah ralkap lak khalah thu a hnok zetih an lungrual lo ngaingai a si,” tin a sim.
Leave a Reply