Ralhrang ralkap in rampi thuneihnak an lak hnuah lamzawhnak nei hmaisabik mi 4 pawl cu ralrang ralkap in an kaih hnuah kum 1 le thla 9 sung thawngtla dingin hremnak an pe fel.
Yantanapung tlawngta hotu Htet Myat Aung cun “A thok ahcun lenglam Court ah an thuhla rel a sinan, dik lo zetih kaihmi an si ruangah mipi cun an dinpi ih, thlah dingin an au ciamco. Cutikah lenglam Court ah an hruai duh nawn lo ih, thawnginn sung Court ah an thuhla an rel ih, hremnak an pekmi a si,” tin a sim.
Ralhrang ralkap in hremnak an pekmi pawl cu Yatanapung tlawngta hotu hlun Ngyi Ngyi Kuan, Mandalay ramdang tlawngta Saw Ukka Oo, Ye Win Htun le Pyah Soeng Aung pawl an si.
Ralhrang ralkap in rampi thuneihnak an lak hnuah zohman lengsuak ngam lo, duhphorhnak nei ngam loin ni 3 sung mipi an um lawk nan, 2021, February 4 ah Dr.Tiza San ih hohanak in tlawngta pawl cu mandalay ah ralhrang uknak duh loin lamzawh duhphorhnak an nei ih, ralhrang cun mi 4 an rak kai.
Russia Le China An Kop Aw – Russia le China cun ram pahnih rualpitha sinak hnget sinsin dingin May 24 ah tlunsang raldo zirtlangnak an nei ih, China tipi ah an zam kual.
Ram pahnih hivekin tlunsang ah an zamtlang cu Japan, S.Korea le US pawlin an ngaih lo zetih, China le Russia cangvaihnak an mawhthluk thu an sim. China cun ram pahnih hivekin tlunsang ah zamtlangnak kan nei nan, ziang ram khal tihrim kan nei lo ih, kan ram pahnih rualpitha sinak langternak men a si tin an sim.
Russia in Ukraine an do hnuah China cu Russia dinpitu an si ih, Russia thawn ralthuam dinhmun le sumpai tuahnak dinhmun ah an tuantlang sinsin. Leitlun in Russia an mawhthluk , an hrem rero laiah China cun Russia a tuanpi sawn ih, Russia mawhtluktu ram khal an mawhthluk sawng ve sawn.
Tu ah China cun Taiwan thuhla ah US cu ralrinnak an pe rero ih, Taiwan thu ah hrolh aw lo dingin an theihter. US cun ziangvek dinhmun khalah Taiwan an humhim vivo ding thu an sim ve. Hivek ruangah US le China karlak boruak a tha lo deuhdeuh.
Leave a Reply