Ralhrang In Lamzinpi An Siat

Ralhrang In Lamzinpi An Siat – Sagaing ramthen Mungzua myone sungih Mungzua lamzinpi cu ralhrang pawlin JCB in an huat ih, lamzinpi an siatter ruangah mawtaw le bike a feh thei lo.

October 4, sun nazi 2 hrawngah ralhrang ralkap mipum hrawng cun mawtaw pakhat le JCB pakhat thawn Mungzua khawpi fehnak lamzin an pan ih, zanlam nazi 3 hrawngah mawtaw lamzinpi cu ralhrang pawlin JCB in an huatter ih, lamzinpi an siatter.

Mungzua ih um pakhat cun “Kannih Mungzua myone hi nasaten ralhrang uknak do rerotu kan si. Mungzua lamzinpi khalah vei tampi ralhrang pawl bomb puah an si ih, ralhrang tampi an thi zo. Mungzua khawpi sung siseh Mungzua kiangkap ih khua pawl khal tuisun nitiang ralhrang uknak dokalh in lamzawh duhphorhnak kan nei rero lai.

“Hivek ruangah ralhrang pawlin an tuar thei lo ih,mipi tihrimnak ah lamzin an siat hrim in a lang. Ralhrang pawlih siatmi cu Mungzua le Chuang Oo fehnak lamzinpi a si ih, mipi in kan sor tuk lawlaw. Tu ahcun ralhrang pawlin mawtaw lamzinpi an siat ruangah mawtaw a feh thei lo ih, mipi ka buai phah tuk zo. Ralhrang pawl cun khua khat hnu khat mipi hman tangkaimi lamzin siat vivo an tum tin kan thei. Ralhrang pawl cangvaih dan cu a rapthlak tuk lawlaw,” tin a sim.

Ralhrang In Matupi Khua An Khar – Chin ramkulh Matupi khuapi cu ralhrang ralkap in zokhal lut le suak um lo dingin an khar ih,khua pawn suahnak gate in an kil.

Ralhrang ralkap cun September 19 ih buainak ruangah Matupi khua khar an si ih, khawsung ah midang zohman an lut better nawn lo. September 19 ahcun Matupi le Hakha karlak ih lamzin thianfainak nei ralhrang ralkap pawl cu ni 3 peh in Matupi CDF Pawlin an rak kapih, ni 3 sungah ralhrang 11 an thi tin CDF matupi cun thu an rak suah.

Ni 3 sung an doawk hnuin ralhrang pawl cun Matupi khawpi an khar ih, October 4 tiang Khawpi in suah le luh an siang hrih lo tin Matupi khawpi sungih um pawl cun an sim. Matupi khuapi sung ahcun khawte ihsin ra ih tlung thei nawn lo tivek khal an um. Ralhrang in Matupi khawpi an khar ruangah khua sung thilri man a kai tukih ralhrang lamin khua luhnak an khar peh vivo asile a sungih um mipi pawl harsa in kan um mai ding tin a sungih um pawl cun an sim.

Tedim Ah Bike Ru Pahnih An Kai – Chin ramkulh Tedim khawpi ah Bike ru mi pahnih cu October 3,zanlam nazi 5 hrawngah mino pawlin an kai ngah ih, thla an camsak hnuah an thlahsal tin an sim.

Sun nazi 2 hrawngah Bethel biakinn kiangkap ah bike a hlo tin khua mipi pawl cun mino pawlkom an simthei ih, mino pawlkom cun zamrang thei bikin bike rutu pawl an hawl cih. Mino pawl cun zanlam nazi 5 hrawngah bike ru pawl cu an kai ngah.

Khua mipi 4 cun kan bike a hlo tin Tedim mino pawlkom hnenah an hek ih, tu ah bike 2 ru lawng an kai hrih. Bike ru mi pahnih an kaihmi lakin pakhat sawn cu a hlan khalah bike ru in an rak kai dah zo.

Tedim mino hruaitu cun “A hlan khalah bike ru kan rak kai zo ih, mipi ralkap hnenah kan lo pe ding maw,Online ah nan zuk kan tarlang ding tin duh kan hrilter ih, online ih zuk tarlang an hrilsawn. Neta ah ka ru nawn lo dingih, neta ah kan ru pang asile in kaih tikah nan duh le in that thei ding titiang in thu an kam.

“Tuitum ah bike ru mi pahnih kan kai ngahsal ih, pakhat sawn cu bike vei 3 a ru thlang. A dang pakhat cu a veikhat bike a ruknak a si hrih. Tuitum khal nun kan sim ih, thlacamnak kan neihsak hnuah kan thlahsal. Neta ah ruk na rusal asile Tedim khawpi zin ah ni 2 sung hridai in kan lo khit dingih kan lo ret ding tin kan hro ta. Cuvekin kan tuah taktak asile rukru pawl khal an tih thlang ko ding,” tin a sim.

Bazar Kai Ralhrang 4 An Kap – Sagaing ramthen Salinkyi myone Ngiopin kyi palik sakhan ih ralhrang 4 pawl cu meithal pain bazar an kai ih, lamlak ah PDF pawlin an rak kap that.

Salinkyi pDF thuphuangtu cun “Ralhrang palik pawl meithal pai in bazar a kai theu timi kan thei. Cutikah kannih PDF komkhawm cun ralhrang pawl bazar kainak lamzin kan rak bawh ih, kan rak kap. Minute 10 hrawng a si ding, kan kap ciamco ih, ralhrang palik 4 an thi. Ralhrang palik thi pawl hnenin G3 meithal zun4, cerek bawm , cerek le bomb pakhat pawl kan laksak thei a si,” tin Media a simthei.

Khuami pakhat cun “Ralhrang palik pawl cu meithal an pai nan, an fawm an hruh lo ih, mipi thuamhnaw vek an hruh. Asinan, PDF pawlin an theifiang tukih lamlak ah an rak kap. Meithal a puak veten bazar ih um mipi pawl cu an tlung thluh ih dawr nei pawl khal an dawr an khar thluh. A sun cu zohman dawr ongsal an um lo ih, bazar ah zokhal an um ngam lo. Salinkyi khawpi sungah ralhrang palik pawl an kap zo ih, lakphak dawr khalah ralhrang pawl an kap zo. Tu ah bazar kai ralhrang pawl khal an kap ih, ralhrang pawl cu an sakhan an suahsan hnuhnu cun an him nawn lo a si,” tin a sim.

Ralhrang In Palik An That – Makui ramthen Pauk myone Tayetkan palik sakhan ih palik pakhat cu ralhrang pawlin an kaih hnuah an that ih lamzin sir ah a ruang an hlon men.

PDF hotu cun “Tayet kan palik sakhan cu kan dungah ralhrang pawlin sakhan an urkang thluh hnuah an suahsanmi kha a si. Palik sakhan ah palik 9 an um ih, ralhrang pawlin an zaten an hruai thluh. Palik sakhan khal umnak tha nawn lo dingin an urkang. Ralhrang pawl cun ralphaw ah khua mipi an rak hruai nan,khua mipi pawl cu an thlahsal.

“Palik sakhan ih an umlai ah palik pakhat cun in phone leuhleuh. Cucu, anmah hotu in a theih tikah a phone a ceksak ih, tongkam an el aw ciamco. Curuangah palik cu a tlan nan, an kai ngahsal ih, an that. Palik sakhan in CDM tuah duh palik an um nan, kan hnen an thlen man hlanah ralhrang pawl an thlengih an zaten an hruai thluh. Cutikah palik pahnih khal CDM an tuah man nawn lo. Palik pakhat an thahmi ruang cu lamzin sirah an hlon menih, kan mit hmuh rori a si,” tin a sim.