Ralhrang In Lawngkasa An Buaipi

Ralhrang In Lawngkasa An Buaipi – Makui ramthen Salinkyi myone Taungkan khua ah khawlal hlun le palik tangtlang cun sumpai thapawknak lawngkasa an tuah ih, zarh tin tuah an tummi ah mipi tel dingin an sawm.

September 14 ah khawlal hlun bomin cun palik Zaw Lwin SOe a sawm hnuah lawngkasa an rak kdin. Lawngkasa an tuahmi ahcun sumpai thap ih ar sualawknak le thildang tampi khal an telh. Lawngkasa an tuahmi cu zarh khat sungah nihnih ni, nithum ni le nili ni pawl ah tuah a si ding thu mipi an theihter.

Khuami pakhat cun “Bomin cu a hlanah khawlal rak tuan zo a si. 2019 kum ah khua mipi hmin in sumpai a rak bawi ciamco ih, a rulh thei lo ruangah a rak tlan. A hlan ihsin lawngkasa tuah ringring a si ih, nupi 3 a nei zo. Tu ah palik thawn kop aw in lawngkasa an tuah. Khawlal tuan rero lai an sungte a si. Lawngkasa a tuahmi ahcun palik pawl khal an tel ih, zalen zetin an cangvai rero men a si,” tin a sim.

Ralhrang in thuneihnak an lak hnuah langpang zetin lawngkasa tuah an tam deuhdeuh. Ramsung hmun tinkim ah lawngkasa tuah an tumih, lawngkasa tuah pawl cu ralhrang thawn remawknak thup nei an si tlangpi. Ayeyarwaddy ramthen Kanpio uksuh khalah zalen zetin lawngkasa tuah an tam tukih zarhte tinten mipi pungkhawm in lawngkasa an tuah ve.

Khuami pakhat cun “Zarhte tinten lawngkasa an tuah ringring ih, thla 3 sung an tuah zo. Ar sualawk tlunah thildang tangka leknak khal an tuah. Rawldawr khal an tuah ih, rittheihsi hkal man lolten lei ding a tam. 2000 kyats in rittheihsi lei a theih ih, zalen zetin an hmang thei ringring a si,” tin a sim.

Yangon ramthen sung khalah lawngkasa tuah an tam deuhdeuh tin an sim ih, thenkhat langpang zetin tuah an um laiah thenkhat cu thupte lawngkasa tuah khal an um. A tamsawn cu ralhrang ih siannak pekmi an si tin an sim.

Mipi ralkap lam cun harsat le ram buai thawn mipi pawlin lawngkasa an tuah cu an duh lo tukih an kham rero. Mandalay khalah lawngkasa tuah pawl cu mipi ralkap pawlin an va thaisiat sak thluh ih, neta ah lawngkasa tuah nawn loin an theihter.

NUG In Kum 1 Sung Cangvaih Dan Ding Relfel – NUG cozah cun thlatin meeting an neihmi ah kum 1 sung an cangvaihnak dan ding an relfel zo thu mipi theihternak an nei ih, kan tuanpi pawl thawn khalin reltlangnak kan nei tin thu an suah.

NUG cozah in Prime Minister Man Win Khaing Than cun “Tu ahcun tuikum sungih kan cangvaih dan ding thupipa pawl kan relfel thluh zo. Kanmah lawng siloin NUG ih tuanpimi pawlkom zaten khal kan relpi. Tu cu kan relfel bangin a takih tuah dingih theitawk kan suah caan le a takin kan cangvaih ding caan a si,” tin mipi a simthei.

NUG cozah in tuikum sungah ziangtin an cangvai ding timi cu anmahten an relfel thluh zo nan, an cangvaih dan ding cipiar cu mipi an theither lo ih,anmah in an relcat bangin a takih an fehpi cih ding thu mipi an simthei.

Russia Ralkap Pawl Ih Suahsanmi Ah Mibur Phumnak An Hmu – Ukraine ram nisuahnak lam ih Russia ralkap pawl ih suahsanmi Izyum khua cu Uraine ralkap lamin thianfainak an neih tikah mibur phumnak khur tumpi an hmu.

Izyum khawpi ahcun Russia ralkap pawl thla 5 sung an rak um ih, September thla thokah Russia ralkap pawl cun Izyum khuapi an suahsan. Cumi hnuah Ukraine ralkap pawl lut an si ih, khur tumpi an hmuhmi ahcun minung 400 hrawng phum an si men ding tin an sim.

September thla thok ihsin Russia ralkap pawl cun Ukraine ram sungin khawpi an luahmi thenkhat an suahsan rero ih, Ukraine ralkap lamin thianfainak an neih tikah Izyum khawpi lawngah siloin khawpi dang khalah a bur ih miphumnak khuar an hmu phah.

Mithi pawl cu bomb in tlak thatmi, ei ding nei ruangah thi, suakvak thei lo ruangah thi, doawknak ruangah thi tivek pawl thaten an phum paih lo ih, hmunkhat ah an retkhawm men siko ding tin Ukraine lam cun an sim.