Ralhrang In Mi Thlaithat Peh An Tum

Kalay Ah Mi 70 Tlun An Kai – Sagaing ramthen Kalaymyo ah raltlan pawl bawmtu mi pakhat cu ralhrang ralkap in an kai ngah ih, an kaihmi hmangin ralhrang pawl cun mi 70 tlun an kai bet zo tin Mizzima thuthang cun a tarlang.

Kalaymyo Chanmyay Aungsi veng nemi 12-nak ih um Chit Min Khant cu ralhrang ralkap in July 28 ,zinglam nazi 10 hrawngah an kai ih,a thurelmi hmangin ralhrang pawl cun July 29 tiangah mi 70 tlun an kai zo.

Kalay PDF sungtel pakhat cun “Amah Chit Min Khant cu raltlan pawl bawmtu a si ih, kan dungah raltlan pawl bomnak hrang lucky ticket a tuah. Tu ah amah bik ralhrang ralkap pawlin an kai ngah ih, a phone sungih hmin cazin a khummi le a ticket zuarmi leitu pawl cu ralhrang in a sangsangten an kai vivo. An kaihmi lakah zianghman ih tel lo khal tampi an tel.

“Amah fehtlang in raltlan pawl bawmtu an rak um vivo ih, cuvek pawl khal kaih tuar an um. Curuangah tuhrih ahcun amah theitu, a ticket leitu le a phone number neitu pawl hrang an him lo ih, hmunhim pan dingin kan theihter duh. Tu ah kaihmi pawl cu ralhrang pawlin thu an sut rero ih, thlasal cih ding khal an um ko ding. Ralhrang in an kaihmi pawl cu hremnak hmunah an hruai cih ih, thu an sut thluh,” tin Mizzima a simthei.

Ralhrang Hrang Thlahlawh Suahtu Bawi An Kap That – Yangon ramthen Hlaku myone ih um ralhrang pawl hrang thlahlawh suahtu ralhrang bawi pakhat cu July 29, zanlam nazi 3 hrawngah ralthuamkai hrekkhat in an kap that ih, ralhrang hlawh a kenmi ting 200 tlun khal an laksak.

Ralhrang pawl hrang thlahlawh suahtu ralhrang bawi cu Hleku le Phaungkyi karlak datsi dawr pakhat ah datsi a thunih, cumi laifang ah meithal keng pawlin an kap that ih, a tangka suahmi zaten khal an laksak thluh.

Ralkap pakhat cun “A thihnak hmun le an kahnak hmun cekfel a si tikah an rak kap fuh tukih a hmun rori ah a thi. Hlawh a suah ding timi thuhla theitu an um ruangah ralkap lak ihsin midang pakhat khat an sipang pei maw timi rinhlelhnak khal a um. Umdan cu hlawh a suah hnuah a dunglam in an thlun vivo ih, datsi thunin a cawlhnak ah an kap that a sihmel. Cucu, an zingzoi hnuih ralkap lam thusuak a si,” tin a sim.

Ralhrang hrang hlawh suahtu an kah that ruangah ralhrang pawl cun a thihnak hmun kiangkap ih khua mipi pawl an cek vivo. Tuih ralhrang hlawh suahtu an kah thatnak hmun cu buainak um dah loin an rel. Curuangah anmah ralhrang le ralhrang sumpai cuhawknak a si thei men titu khal an um ve.

Rakhine Lamah Ralhrang An Feh Tam – Rakhine ramkulh Maungtaw ih kahawknak a um hnuah ralhrang ralkap cun Maungtaw dunglam ah ralhrang dang an kuat bet vivo ih ,Rakhine ih ralhrang thleng thar pawl cun ralthuam, eiin le thuamhnaw pawl khal an keng thluh tin mit hmutu mipi pawl cun an sim.

Mit hmutu pakhat cun “July 29, zingah ralhrang lawng pakhat a thleng bet. Lawngih phurhmi ralhrang pawl cu mawtaw 17 sungah an lut ih, ralthuam le eiin an phur. Mani lamah ralhrang mipum 55 an fehsuak zo. mani tihni ah ralhrang 95 an fehsuak ih, ni 3 peh in kan lamah ralhrang an thleng ciamco. Rakhine tipi ahcun lawng an hmangih, cutin Maungtaw le Butitaung lamah ralhrang an kuat betmi a si,” tin a sim.

Rakhine ahcun 2022, July 18 ah AA cun Maungtaw myone ih ralhrang pawl an kap ih, ralhrang thi 11 hrawng an um tlunah ralhrang 14 nungdam in an rak kai. Hivek a thlen hnuah Rakhine ah doawknak a umsal hrih lo nan, ralhrang thuphuangtu Zaw Min Tun cun AA lamin in ngiar ih, doawknak hram an thok tin a sim.

AA thuphuangtu KhaiThukhah cun “Rakhine ramkulh sungah kannih AA le ralhrang pawl cu kan pel aw ringring thlang ko. Kan do aw pei maw, do aw lo ding timi cu anmah ralhrang pawl cangvaih danah a tthum aw a si,” tin a sim.

Thuthanglatu Kum 6 Hremnak An Pe – Ralhrang ralkap in kachin ramkulh Pha-An myone ih an kaihmi thuthanglatu pakhat cu July 29 ah kum 6 sung thawngtla dingin le hna harsa tuan dingin hremnak an pe.

Mekhuang thuthang hrang thuthanglatu dinhmun in hnatuan Maung Maung Myo cu 2021 March thla ah ralhrang ralkap pawlin Pha-An lamzin ceknak ah a phone an ceksak ih, dothlengnak zuk a um ruangah ralhrang pawlin an rak kai tin a sungte pawl cun an sim.

A sungte pakhat cun “Anmah ralhrang pawl rel dan vek asile Maung Maung Myo phone ah ralthuam thawn a zukawkmi a um ih, facebook khalah ralkap huatnak ca a um. Cumi ruangah rampi dokalh timi thubuai hmangin kan kai tin an rel aw. Tu ahcun hremnak an pe zo ih, Pha-An thawnginn sungah a um hrih a si,” tin a sim.

Ralhrag ralkap cun kan dung zarh khalah Mizzima thuthanglatu pakhat Mah Ngyin Ngyin Aye cu kum 3 sung thawngtla dingin le hna harsa tuan dingin hremnak an rak pe zo. Ralhrang in rampi thuneihnak an lak hnuah thuthanglatu 140 an kai zo ih, cumi lakin 55 pawl cu thlah zalen hrih loin thawnginn sungah khum thluh an si.

Australia Ah NUG Palai Zung An Ong Ding – NUG cozah cun Australia ah palai zung an on thar ding thu mipi theihternak an nei ih, zung on thar puai ahcun Australia ram hruaitu pawl khal an tel ding tin mipi an simthei.

NUG palai zung cu Australia khawpi Canberra ah ong ding an si ih, hmaizarh sungah onfel an tum. Australia ih NUG palai zung ahcun Dr. Htun Aung Shwe a to dingih, Australia ih um Myanmar mi thenkhat in hlawh nei in hnatuan an bawm ding.

Dr.Htun Aung Shwe cun “NUG cu thlilak ih um cozah men a si tin in reltu an um,Asinan tu ahcun Australia ah hmuh thei zung kan ong ding. Cucu mithmuh rori a si ding,” tin a sim.

Australia ih NUG zung thar cu Australia ih ralhrang Embassy thawn peng khat tluk lawng a hla aw tin an sim. Hitin NUG cun US,UK, Norway, France, Czech,S.Korea le Australia pawlah palai zung an nei thlang ding a si.

Ralhrang In Mi Thlaithat Peh An Tum – Ralhrang ralkap in dothlengnak ruangih an kaihmi mi 4 pawl thihdan an pek hnuah a takin an thlaithat zo tin thu an suah ih, neta ah mi nan thlaithat vivo lai nan tum maw tin Media thusuhnak cu ralhrang thuphuangtu Zaw Min Tun in a let.

Zaw Min Tun cun “Thihdan kan pekmi zaten kan thlaithat thluh rori ding timi cu a um lo. Thihdan pek an si hnuah dilnak an nei bet thei. Ziangmi sualnak an tuah, ziangmi daan an pahbal timi ah tampi a tthum aw. Thihdan vei tampi an pekmi cu daan bangin tuah ding a si,” tin a sim.

Ralhrang ralkap cun rampi thuneihnak an lak hnuah anmah dokalhtu ti ih an kaihmi mino tampi lakin thihdan an pekmi mipum 74 an um zo ih, cumi sungin mi 4 pawl cu a takin an thlaithat zo tin anmah ralhrang cun thu an suah zo.

US le China An Be Aw – Taiwan thuhla ah US President le China president cu July 28 ah online in an be aw ih, remawknak taktak tuahmi an nei thei lo.

Ram pahnih aiawh in president pahnih biakawknak ah China president Ji Xinping cun Biden hnenah Taiwan thuhla thawn pehpar aw in hrosuang ciamco hlah uh. Taiwan thuhla ruangah sosang zetin nan um ding a si ahcun a poi ding tin a simthei.

Biden cun China president Ji Xinping hnenah “Kannih US cu Taiwan parih kan thupom dan a danglam dah lo ding. Curuangah,luarkai tukih in nortu cu kan mawhthluk sawn lam. Ram pakhat zalennak an ngah ding cu kan duhpi tukmi an si,” tin a sim ve.

Taiwan thuhla ah ram pahnih president veve an be aw nan, zianghman remawknak an nei thei lo ih, Taiwan thuhla ah an buai vivo hrih dingin a lang.

China cun Taiwan cu kan thuhnuai ih um le kan ram pengthen pakhat a si an ti ih, Taiwan lam cun ram pakhat, mahte ukawknak nei duh kan si tin an ttang ve. US cu Taiwan lamah an dingih, Taiwan in zalennak diktak an ngah theinak dingah theitawk an bom ding thu an tiam ve.