Ralhrang In Mibur Ih Thahmi An Nei Tam Deuhdeuh

Ralhrang In Mibur Ih Thahmi An Nei Tam Deuhdeuh – Ralhrang ralkap cun thla 3 sungah ramsung hmun tinkim ah a bur ih mi thahmi an nei tam deuhdeuh ih , a then cu sualpi, a then cu lu tansak tivek an si.

Sagaing ramthen တာတိုင်ကျေးရွာ khuami 17 pawl cu Ralhrang in March 1 ah an rak kai ih March 2 ahcun an zaten an that thluh. Thahmi lakah nunau 3 an telih ralhrang in an sualpi hmaisa hnuah an that ih an zahmawh ah khasuan sen an rak thun. Thahmi mipa lak khalin 5 pawlih lu an tansak.

Tanintharyi Launglung myone Auh Kyauk Wat khua ih mipi 5 khal ralhrang in March 4 ah an rak kai ih, rapthlak zetin an that. Ralhrang cun khuami 5 an thah men duhtawk loin mipi 4 khal an urkang. Mipi thattu lakah Pyu Saw Htee pawl khal an tel ve.

Sagaing ramthen Ye Oo myone Nan madaw khua ih pah khah pah 5 khal ralhrang ralkap cun an umnak tlawnginn an luhcilh ih an zaten an kap that thluh. Ralhrang pawl cun mi 5 an thah hnuah inn 1 an nawkkang.

Sagaing ramthen Yinmarpin myone Miuk Nung khua ih mi 2 khal ralhrang in March 3 ah an kai ih an that. Ralhrang ih thahmi pahnih lakah pakhat sawn hi thinlung kim lo a si. Ralhrang cun mi pahnih an thah hnuah khua sungih nunau pakhat khal an sualpi.

Mandalay ramthen Lizuasung khua ih mi 4 khal ralhrang in February 28 , zan nazi 10 hrawngah an kai ih an that thluh. Ralhrang ih thahmi pawl cu mipa 3 le nunau pakhat an si. Khua ih Pyu Saw Htee pakhat thah a si tikah ralhrang pawlin khua an luhcilh ih rinhlelhmi khua mipi 4 an kaih hnuah an that thluh.

Sagaing ramthen Mungzua myone Sulikung khua ih mi pakhat khal ralrhang in February 6 ,zan nazi 11 hrawngah an rak kai an thah hnuah a lu khal an tansak. Makui ramthen Yisakyo myone Tetuang khua ih PDF pahnih khal February 17, zinglam nazi 6:45 hrawngah ralhrang in an kaih hnuah an that ih an ruang khal an urkang cih. PDF pahnih cu nei aw cing ding an si ih, an neihawk man hlanah ralhrang pawlin an that.

Sagaing ramthen Ayadaw myone Kandaw khua kiangah ralrhang pawl cun February 26 ah PDF pahnhih an kai ih an lu an tansak. Yi Oo le Khin Oo karlak ih duty PDF pahnih khal February 27 ah ralhrang pawlin an kai ngah ih an thah hnuah an lu an tansak. Sagaing ramthen Chuang Oo myone Kin Mun khua ih kum 13 pate le nupinu pakhat khal ralhrang ralthuampi in a tlak ngah ih FEbruary 3 ah an thi. Kaya ramkulh Khuang Pih khua ih um tleirawl pahnih khal ralhrang ralthuampi in a tlak ngah ih February 28 ah an thi.

Bago ramthen Ukphu ah ralhrang cun PDF pahnih an that ih an lu an tansak. CDM sayamah khal an sualpi hnuah an that ih an urkang. Sagaing ramthen Khin Oo myone Ale khua ih mipi 9 khal ralhrang in 2022, December 28 ah an kai ih rapthlak zetin an rak that zo. Bago ramthen htan Tapin myone Zualikung khua ih CDM tlawng saya Myo Min Htaih khal February 18 ah ralhrang pawlin an ra kai ih an that. Sagaing ramthen Kanbilu myone Ngiokung khua ih mi pahnih khal FEbruary 14 , zanlam nazi 3:50 rhawngah ralhrang in a kai ih an rak that.

Sagaing ramthen Mawlaih myone Wai Daung khua ih mipi 4 khal 2022, December 22 ah ralhrang pawlin an rak kai ih an that. Ralhrang ih an thahmi lakah nauhak kum 7 a tel. Makui ramthe Puak myone Lebe khua ih mi pakhat khal ralhrang in 2022, December 30 ah an rak ih an thah hnuah a hngawng a hlap sak. Yango ramthen Hlegu ih PDF sungte 5 pawl cu ralhrang lamtang Pyu Saw Htee pawlin February 22 ah rapthlak zetin an rak that.

Sagaing ramthen Wetlet myone Musoe khuami pakhat khal February 28 ah ralhrang pawlin an kai ih an that cih. Bago ramthen Ngiopintar khuami pahnih khal February 25 ah ralhrangpawlin an rak kap that. February 7 ah Yangon ramthen Twanty myone Kabin khua ih duty khuami pakhat khal ralhrang pawlin an kap that. Yangon ramthen Twanty thotho ah Daw Suh in neh hramseh ti ih au mi pakhat cu February 1 ah ralhrang pawlin an rak kap that. Sagaing ramthen Kani le Yinmarpin karlak ih lawng to raltlan pawl khal ralhrang in an kap ih an lakin raltlan pakhat a thi. Ralhang cun kan dung kum December thla, tuikum January thla le February thla sungah rapthlak zetin mipi 300 zik an that.

Ralhrang in a bur ih mipi an that ciamco men cu NUG in leitlun theih dingah a rak aupi hngal ih, leitlun pawlkom le ramdang pawl daiten ummen lo dingin ralhrang pawl a takin hremnak pe dingin dilnak an nei bet.

PDF Tih Ih Tlung Ralbawi A Thi – Shan ramkulh Hopung ralhrang hmunih ralhrang bawi Bohmoe Zaw Win Theing cu cawlh la in Yangon ah a tlungih amai mawtaw in a tlung thei nan, PDF pawl a tih ruangah khualtlang mawtaw a to.

Mipi lakah mipi vekin Yangon feh a si ih, Mandalay le Yangon karlak ah a mawtaw tomi a letih ralbawi Bohmoe Zaw Win Theing cu a thi.

A thuhla theitu cun “Naypidaw cun zokhal cawlh an pe lo ih ralkap hmunah um thluh dingin thu an pe. Asinan, ralbawi cun ka fa tuamhlawm a tul tin tlun a dil. Cutikah tatyin hotu in theihthiamnak in a tlungter. Amah in mawtaw a nei nan, lamlak ah PDF in an rak kap ding a phangih khualtlawng mawtaw a to. A mawtaw tomi cu lamlak a letih a thi. A sungte pawl cu Yangon S.Okala ah um an si ih, an tuarna lawlaw,” tin a sim.

Khualtlawng mawtaw let ahcun mi 31 an to ih an lakin mipa 3 a hmunah an thi. Mi 25 hrawng hriamhma ngah an um. Mithi lakah Myanmar Letwait champion hlun khal a tel ve ih, tu ahcun mithi lakah ralhrang bawi Bohmoe Zaw Win Theing khal a tel ve timi an fiah zo.

China Do Ve Tum Taiwan – China le Taiwan buainak hi a tufang thawmvang an nei ciamco lo nan, China in Taiwan lam an hel thup ringring ih, ram pahnih remawknak zianghman an nei hrih lo.

Taiwan cun Demcracy ram din an tumih China kuthnuai ah kan um nawn lo tiah an ti. China cun kan kutsungah nan um camcin ding tin Taiwan an sim ve. Ram pakhat si fel dingin Taiwan cun UN lamah nasaten tan an la rero nan, tuini tiang an duh vekin ziangkim a feh ve lo.

Hivekih ram pahnih an buainak ah US cun taiwan an dinpi ih ziangkimah an bawm. Ram pahnih buainak ah doawknak leh dingih cumi caan ahcun kan ummen lo ding, kan ram humhimnak hrang China kan do ve ding ti’n Taiwan lam thu an suah.

Taiwan cun “Ziangtikah si maw China hin Taiwan parah ralthuam an hmang leh rori ding. Cuvek caan ah kannih Taiwan khalin mah le mah humhimawknak hrang China kan rak do ve ding a si,” tin Taiwan lam an tongsuak. Hivek a si tikah ram pahnih karlak boruak a sosang sinsin thei in a lang.