Ralhrang In Mino 7 Thih Daan An Pe

Ralhrang ralkap cun Yangon Hlaingtaya myone ih um mino 7 pawl cu pukmah 54 hmangin May 18 ah thih dan an pe. Ralhrang ih thih dan pekmi pawl cu Ko Ye Min Naing, Ko Soe Moe, Ko Thant Zin, Ko De Wah, Ko San Si, Ko Atili le Mah Aye Aye Min pawl an si.

Ralhrang ralkap cun mino 7 pawl cu Hlaingtaya vengih veng uktu thattu ah an puh. Hlaingtaya vengih veng uktu cu march 6 ah thah a rak si ih, ralhrang lamtang dalan a si tin thianfaitu pawl cun an rak sim.

N.Dagon vengih um Ko Htet Myat Naing khal dankalh pawlkom thawn pehparawknak na nei , an hrang sumpai na hawlsak ih,bomnak na pe theu tin ralhrang ralkap cun pukmah 50 thawn thubuai an tuahsak ih , May 18 thotho ah damsung thawngtla dingin hremnak an pe.

Yangon Mino hruaitu cun “Hivek pawlin mino rori an bat ih an kai, hremnak an pe timi ih langfiang zet cu mino pawl dungsip haiseh an ti duhnak siko. Ralhrang pawl ziangvekin an cangvai asikhalle kannih mino pawl cun dothlengnak ah dung kan sip men lo ding tin thutluknak kan tuah thluh zo. Curuangah mipi khal kan sawm duh hai, mino pawl in dinpi hrih uhla in somdawl hram uh,” tin a sim.

Ralhrang ralkap in rampi thuneihnak an lak hnuah mino tamzet an kai zo ih, cumi sungin mipum 150 pawl cu thih dan le damsung thawngtla dingin hremnak an pe zo. Yangon ramthen sungin Hlaingtaya, Shwepita, Dagon myotit , Dogon sikkan le N, Okalapah pawl cu ralhrang in kan dung kumah ralkap uknak thu an rak suah ih, ralhrang thazang in an uk hrihmi pawl an si.

Ralhrang In Mitat 4 An Kai – Makui ramthen Pakokku district Pauk myone mitat zungih hnatuan mitat mi 4 pawl cu may 20 , zanlam nazi 6 hrawngah ralhrang ralkap in an kai.

Mitat sungtel pakhat cun “Ralhrang pawl an ra ih, kan lakin mitat 4 an kai. Ziangruangah an kai timi suh khal an theih lo. Zanlam tiang khalah khawitawk ah an retih, an khum tikhal kan thei hrih lo. An sungte pawl khalin theitawkin an zingzoi rero nan, tuitiang cu an thuhla kan theithei hrih lo a si,” tin a sim.

Thilthleng thawn pehpar aw in Pakokko ih ralkap bawi thusuh a si tikah anih cun “Midat 4 kan kai timi cu a dik ko. Kan kaihnak san cu thahrum thawh cangvaihnak le dankalh cangvaihnak ih an hrolhawk ruangah a siko. Thaten kan retih , thusuhnak kan nei rero hrih a si,” tin a sim ve.