Shan ramkulh, Tachileik myone, Wing Kyauk vengih um Ai Sai Mein( Kum 24 ) cu ralhrang pawlin an kai ih a thih hlanlo hridai thawn thlai that dingin JUne 1 ah ralhrang kuthnuai Court cun thu a suah.
An sungte pakhat cun “A thih hlanhlo hridai thawn thlaithat dingin hremnak an pe timi cu a dik ko. Ziangahtile,District Court khal kan sut zo. Thu an then ni ah a sungte pawl khal an ran thei lo. Tu ahcun thuhla an thei zo dingih, an um a nuam lo zet ding. Zianghman fiahnak um loin an kai ih, hivek hremnak an pe cu kan tuarna tuk lawlaw a si,” tin a sim.
Ralhrang ralkap cun Ai Sai Mein thawn an kaihmi mino pakhat khal kum 7 sung thawngtla dingin hremnak an pe. Ai Sai Mein cu sual tuahnak ah hotu bikah an retih, a rualpa cu a bawmtu vek dinhmun in hremnak an pe.
Ralhrang ralkap in rampi thuneihnak an lakmi kum 1 kim cam, 2022 February 1 ah Tachileik myo ahcun ralhrang ni lawmin puai an tuah ih, an nuamawter ciamco. Culaifang ah bomb a puak ih, mi 4 an thih tlunah mi 30 tlukin hriam an ngah. Bomb puak thawn pehpar aw in ralhrang ralkap cun Ai Sai Mein le Ko Htin Lin Aung an rak kai ih, tu ah hridai ih thlaithat dingin le kum 7 sung thawngtla dingin hremnak an pe fel.
Ralhrang ralkap cun Ai Sai mein cu pukmah 54 hmangin thubuai an tuahsakmi a si ih, a malbik kum 10 sung thawngtla dingin , damsung thawngtla dingin le a thih hlanhlo hridar thawn thlai dingin timi pathum ah duhduh hremnak pek theih a si. Cumi sungin a naa bik hremnak an pekmi a si ih,ralhrang in rampi thuneihnak an lak hnuah hridai thawn thlaithat dingin hremnak an pek hmaisabikmi a si.
Sihni pakhat cun “Thih dan siseh , hridai thawn thlaithat ding siseh ni 7 sungah tlangsuak upa hnenah dilnak thehlut theih a si. A sungte pawlin dilnak an tuah lo asikhalle hremnak pekmi ih duhdan in dilnak tuah a theih. Thih dan an pekmi ah hridai thawn thlaithat ding timi telnak pukmah in hremnak an pekmi a si,” tin a sim.
Ralhrang ralkap in rampi thuneihnak an lak hnuah thihdan an pekmi 114 an um zo ih,damsung thawngtla dingin hremnak an pekmi 78 an um zo.
Ralhrang 8 Bomb An Puah That – Makui ramthen Yesakyo ah ralhrang ralkap pawl ih tomi bike 3 le ralhrang mawtaw cu June 2, zinglam nazi 11:30 hrawngah Yesagyo PDF in bomb an puah ih, ralhrang 8 an thi tin thu an suah.
Yesagyo PDF cun “June 2, zinglam nazi 11:30 hrawngah Makui ramthen Yesagyo myone Zikung khua le Ku’ng Talin khua kiangih cawl ralhrang ralkap bike 3 le mawtaw cu kannih Yesagyo PDF in bomb kan puah. Ralhrang bike 3 le mawtaw cu mipi hnenih thilri an firmi phurtu pawl an si.
“Bomb puak ruangah Ralhrang bike 3 cu an pet lurlo ih, ralhrang mawtaw khal lamzin sirah a let. Cumi ruangah,nungdam ralhrang pawl cun kiangkap cu duhtawk in an kap ciamco. Asinan, kannih Yesagyo PDF cu himdam ten dung kan sip thei. Mipi hnenih kan cah duhmi cu ralhrang kiangah um hrimhrim hlah uh timi a si,” tin thu an suah.
Leave a Reply