Ralhrang ralkap in ram buainak ruangah an kaihmi lakin thihdan an pekmi mi 4 pawl cu a takin an thlaithat zo tin mipi an theihter ih, hivek cu ralhrang in mipi in ngiarnak a si tin AA lam cun thu an rak suah cih ve.
AA cun “Ralhrang ralkap in thihdan an pekmi mi 4 pawl a takin an thlaithat zo timi cu ramsung thuthangca hmangin mipi theihternak an nei ih, cuvek kan theih tikah kan mangbang ih,rapthlak kan tituk. Khatlam ah an innsang pawl kan tuarpi tuk ih, kan riahse tuk timi kan langter duh. Hivek cu Myanmar ramsung remdaihnak hrang thinphang umza a si.
“Ralhrang in thu an suah bangin a takin an tuah asile innhnen ram siseh, ASEAN tlunah Myanmar remdaihnak hrang zuamtu pawl ih cangvaihnak khal an tawpter vek a bang. Cun, hivek ruangah Myanmar mipi sosang in ralhrang an thungrul ciamco pang ding khal a phan umzet. Ramleng cun tuah lo dingin an dil rero laiah ralhrang cun ramleng ih dilnak khal ngai poimawh loin thihdan an pekmi pawl a takin an thlaithat timi thu an suah tikah Myanmar mipi zaten thinheng le tuar thei loin an um ih, ralhrang in mipi in ngiar tinak a si.
“Ralhrang cun Phyu Ziya Thaw, Jimmy, Hla Myo Aung le Aung Thura Zaw pawl cu thihdan an pek hnuah an that nan, anmah vekih raltha le nunnak tiang hlan ngamtu dothlengnak ah an suak bet vivo thotho ding tin zumnak kan nei a si,” tin thu an suah.
Bomb Puak Ah Ralhrang 5 An Thi – Sagaing ramthen Ayadaw myone Zipinle khua lamih feh ralhrang ralkap pawl cun lamlak ih kammi bomb an palpuak ngah ih, a hmunah ralhrang 5 an thi tin Ayadaw PDF cun July 25 zingah thu an suah.
Ayadaw PDF cun “Zinpile khua lamah ralhrang pawl an feh timi kan theih veten lamzin in kan rak hngak ih kan bawh. Zinglam nazi 5 zikte ah ralhrang pawl cu lamzin ih bomb kan kammi in kan rak puah. Ralhrang mawtaw pahnih bomb kan puahmi ah neta sawn a fuh tukih, a hmunah ralhrang 5 thi an um bangin ralhrang hriamhma ngah 8 hrawng an um.
“Bomb puak ih ralhrang thi le hriamhma ngah pawl cu damlo mawtaw in an phursuak. Ralhrang pawl cun kiangkap cu duhtawk in a kap ciamco ih, ralhtuampi an kahmi cun mipi inn pakhat a tlaksiat. Inn hrekkhat an luhcilh ih thilri an lalsakmi khal a um a si,” tin thu an suah.
Myanmar Ih Innpi Sak Pawl An Suak – Myanmar ram buainak ruangah ramdang hnatuan tampi cun Myanmar ram an rak suahsan rero zo ih, tukhalah ramdang company in dollar 1.3Billion cem dingin innpi an sakmi 3 cu sak peh nawn loin an cawlhsan thluh.
Innpi 3 pawl cu sum tuahnak, Hotel, Shoping Mall, zungkhan, bazar hmunpi, thil pholangnak tivek ah hman tummi an si ih, innpi 3 an sakmi ruangah Myanmar mipi tamzet in hnatuan an ngah phah nan, tu ahcun innpi sak an cawlhsan tikah hnatuan nei lo an tam sinsin.
Innpi an sakmi ah dollar tamzet an hmangral zo nan, sak peh thei an zuam nawn lo ih, cawl hrih dingin hotu pawl cun thu an suah. Hivek in thu an suahmi ah hlawknak zianghman a um lo, a sung hlir in hram kan thok zo ih, kan cawl hrih tin mipi an theihter.
Myanmar ram buainak kum 1 a luan zo ih, buainak a fel thei hrih lo ruangah ramdang sumdawng pawl cun Myanmar ram an suahsan celcel ih, Myanmar ah sum tuah peh an tum hrih lo. Ramleng pawl cun Myanmar cu umnak tha lo, nunnak hrang tihnung tin an sim.
Sri Lanka Mipi In Rampi Thilri 1000 Tlun An Ru – Sri Lanka ram buainak ah mipi cun rampi president inn le Prime Minister inn cu July 9 ah an rak luhcilh ih, inn sungah duhtawk in mipi pawl nuam an rak cen.
July 20 ahcun Sri Lanka president bik a tlansuah ruangah Sri Lanka hlutdaw cun an ram president thar ding an hril ih, Prime Minister hlun Ranil cu Sri Lanka president thar ah an nemhnget. President thar an neih hnuah president thar thupek vekin cozah innpi pawl cu Sri Lanka ralkap pawlin an kil thlangih mipi siatsuahter an tum nawn lo.
Hmaisa sawn mipi in president inn le Prime Minister inn an luhcilhmi ah president inn le Prime Minister inn in thil mankhung, rampi thilri 1000 lenglo a hlo ih, innpi luhcilhtu mipi pawl in an rak la in Sir Lanka palik cun thu an suah. Hivek ruangah president thar cun khoh zetin Sri lanka ralkap pawl thu a pe.
Sri Lanka president thar Ranil cun “Mipi in an duhmi ausuahpi in lamzawh duhphorhnak an neihmi cu kan theihthiampi tuk ko,Asinan cozah innpi an luhcilh ding cu rem ka ti nawn lo. Curuangah cozah innpi pawl ah kiltu ralkap pawl ret thluh an si ih, cozah innpi hnaihnok tumtu pohpoh cu ralkap lamin a tuldan vekin hremnak an pe thlang ding a si,” tin thu a suah.
Sri Lanka in president thar an nei nan, an ram mipi duhmi a si cuang lo tikah Sri Lanka ram buainak a fel thei hrih lo ih, mipi cun lamzawh duhphorhnak an nei peh hrih.
WHO In Monkeypox A Tihnun Thu An Suah – A tufang leitlun ram tinkim ih darh vivo Mongkeypox natnak cu mipi hrang tihnung a si tin WHO cun thu an suah ih, mipi fimkhur dingin an theihter.
WHO cun “Ram 70 tlunah Mongkeypox natnak a darh zo ih, mipi kan fimkhur thiam a tul thlang. Culawng siloin leitlun in lungrual zetih kan do dingmi natnak pakhat khal a si. Nathrik thah dan ding le nathrik khamnak sii pawl a rangthei bikin kan buaipi a tul ih, khat le khat bom aw ton ding kan si.
“Ram tin sizung ih hnatuan pawl mipi hnenah Mongkeypox ih sinak le kaiawk thei dan thaten simthei uhla , kilhimawknak thaten fehpi uh. Tu ahcun Mongkeypox natnak hi kan zohliam men dingmi natnak a si lo ih, lungrual zetih kan doneh tulmi natnak a si,” tin leitlun mipi an theihter.
Chinmi umnak lakin Mongkeypox nat umnak ram pawl cu Australia, India, Canada, Denmark ,Finland, France, Germany, Israel, Netherlands, Singapore,Malaysia, Taiwan , Thailand, Switzerland, UAE, USA le UK ram pawl an si.
Monkeypox natnak cu taksa ah pol in a suak ih, khuasik ,thak le luna tivek in a tuan. Rannung tlunah minung khat le khat kaiawk ol zetmi natnak a si ih, a thahnak ding sii le a khamnak sii an hmu hrih lo.
Leave a Reply