Mipum Siarnak Nei tum Sal Ralhrang – Ralhrang ralkap in hrilawknak tuah an tummi thawn pehparaw in mipum ziarnak an rak neihmi cu duh vekin an rak siar thei lo ih, tu ah mipum siarnak an nei tumsal.
Rahrang vuanci Myint Cai cun “2023, January 9 ihsin ramsung hmun tinkim ah hrilawknak hrang mipum siarnak kan rak nei. Hmun tamsawn ah mipum siarnak kan nei thei nan, hmun thenkhat ah mipum siarnak kan nei thei lo. Curuangah tu ahcun a theih dandan in mipum siarnak kan neisal ding a si,” tin BBC a sim.
Ralhrang ralkap in mipum siarnak an neih tikah mipi raklap pawlin an rak kap ih ralhrang hnuai ih mipum siarnak neitu lakah thih phah tamzet an rak um. Cuvek ruangah duh vekin mipum siarnak rak nei thei lo an si.
Daw Suh Kap Tumtu Ralhrang ih Tupa Thi – Yangon le Mandalay karlak mawtaw letih thi ralhrang bawi Zaw Win Theing cu Daw Suh Kyi kap dingin meithal ra tintu ralhrang bawi Myint Oo ih tupa a si tin thuhla theitu pawl cun an sim.
Amah Daw Suh Kyi kap dingin meithal rak tin dahtu ralbawi hlun Myint Oo le a nupi cu 2021 ah covid 19 natnak in an rak thi zo. Ralhrang bawi hlun Myint Oo cun 1989 kum ah Ayeyarwaddy ramthen ih tlawng Daw Suh kyi cu kap dingin a rak hro ih meithal in a rak tin dah.
Mawtaw letih thi ih a tupa ralbawi Zaw Win Theing cu Shan ramkulh ihsin Yangon ah tlungduak a si ih, amai mawtaw to ngam loin mipi mawtaw vek a to ih a tomi mawtaw letih mi 3 thi lakah ralhrang bawi Zaw Win Theing khal a rak tel ve.
Ralhrang thuthup phuangtu cun “1989 kum ah Daw Suh cu hrilawknak thuhla thawn pehparaw in Ayeyarwaddy a rak feh ih ralhrang cun mipum 5 tlun pungkhawm theih lo tin thu an rak suah. Cumi ahcun mipi an tam tikah ralbawi Myint Oo cun Daw Suh Kyi kap tumin a tin zo, Asinan ralbawi dang Tin Phi Aye in a kham ruangah a rak kap ngah zo.
‘A tufa mawtaw letih thi ralawi Zaw Win Thein cu Tuangkyi ah a ruang kuatsal a si ih, March 6 ah ralhrang pawlin an vui zo,” tin a sim.
Isreal In West Bank An Kap – Israel cun Palestine ram an luahmi West Bank sungih um Palestine miphun pawl an kap ih , Palestine 6 an thi. Isreal in West Bank an kahnak san cu Israel mi pahnih thah an si ruangah,cumi thungrulnak hrang cangvai an si thu an sim.
West Bank ih Palestine tapung pawl cun Israel lam an cangvaih hmaisa ruangah Israel ralkap pawl rak kap ve an si thu an sim. Kahawknak ruangah Palestine 6 an thi ih, mi 12 hriamhma an ngah tin Palestine lam cun an sim.
Palestine lam cun ram khat le ram khat rem aw dingin biakawknak an neih rero lai Israel lam ralthuam hmangih an cangvai cu remawknak siatter sinsintu a si tin an sim.
Tuikum sungah Israel le Palestine tapung pawl an kap aw nasa ih Isreal lam mi 14 an thih zo bangin Palestine lam 60 tlun an thi ve zo.
Leave a Reply