Ralhrang In Model Nan Mwe San Hremnak An Pe

Ralhrang In Model Nan Mwe San Hremnak An Pe – Ralhrang ralkap cun Myanmar nunau daan na pahbal ti ih an kaihmi Model Nan Mwe San cu September 27 ah kum 6 sung thawngtla dingin hremnak an pe tin thu an suah.

Model Nan Mwe San hi Yangon N.Dragon ah a um ih, N.Dragon cu ralhrang in martial pawl an rak phuannak hmun a si tikah Nan Mwe San khal ralhrang thuthennak zung ah a thu an relsak ih, hremnak an pe.

Ralhrang ralkap cun August 5 ah Myanmar nunau daan nan thlun lo ih, ramdang ah nan zuk le video pawl nan zuar tin Myanmar Model Nan Mwe San le Thinzar Wint Kyaw an rak kai ih thubuai an tuahsak. Thinzar Wint Kyaw sawn cu Court ah Insein thawnginn ah an khum ih, an tlun thu an relsak rero lai.

Nan Mwe San sawn hi ralhrang in zamrang zetin hremnak an pe. Thinzar Wint Kyaw le Nan Mwe San hi leitlun ramdang tiangih lar ban Myanmar model pahnih an si ih, ralhrang in rampi thuneihnak an lak tikah mipi lamtang in lamzawh duhphorhnak ah an rak tel rero zo. Curuangah, ralhrang pawlin an hua tukih kaih rori an rak tumcia.

Kaih dan ding felfai an theih lo ruangah Myanmar nunau daan nan pahsal tin an kai ih,thubuai an tuahsakmi an si.

CNO/CNDF In A Lakin Mipi An Tuamhlawm – Chin miphun humhimtu CNO/CNDF cun Falam peng sungah sizung pakhat le Center 7 an din ih, cumi hmangin damlo pawl a lakin an tuamhlawm rero tin tuanvo neitu pawl cun an sim.

CNO/CNDF ih harhdamnak lam tuanvo latu Salai Hmungte cun “April thla ihsin kan tithei tawkten damlo kan rak zoh thok zo. Tu ah sizung pakhat le Center 7 kan din fel zo ih, Operation tiang kan tuah thei. Sizung le Center kan neih hnuah damlo mipum thawng 10 le 200 kan tuamhlawm dam zo,” tin a sim.

CNO/CNDF ih Nurse hnatuan Mai Cuaite cun ““2021 November ihsin 2022 September tiang Minor operation hi (pum at ih nausar telin) 106 luan kan tuah zo ih major operation hi 52 luan kan tuah zo. Punghman in naunei theimi pawl nausarnak kan nei sak zo mi hi 9 an si ih operation tuah tullo nan natnak dangdang ruangih Siizung to mi hi 63 an si” tin a sim.

CNO/CNDF ih harhdamnak lam tuantu Sibawi 5 le Nurse 16 an um ih, an zaten CDM dinhmun in mipi lamtang le mipi riantu an si tlunah nunnak tiang thap ngam in CNO/CNDF hrang pumpe aw an si.

Operation tul le damlo bese deuh tuamhlawmnak cet cu CNDF le Kalay pDF in an ttawm aw ih, Falam peng sungah an ret. Kalay ih damlo besia pawl khal Falam ah an fehpi ih, an tuamhlawm dam theu.

Mai Cuaite cun ““Mobile clinic khal a cang thei tawkin kan feh ih Mobile Clinic le Center pawl ah a khua zawngin Laitlang Falam peng le Lairawn huap khua 140 luanah mipi damlo tuamhlawmnak kan nei zo. OPD, Center le mobile clinic ih damlo kan tuamhlawmmi zate kom hi 10,000 luan a si zo. Sii le tuamhlawmnak thilri pawl siseh damlo nat checknak le operation tuahnak cet pawl tiang kan tul zet. A cangthei tawkin nun thap tiang huam in kan doctor pawl le kannih nurse pawl in pumpek kan ngam ih mipi hrang ramleng ih um mipi pawl nan bomnak kan tul ngaingai a si” tin a sim.

AA In Ralhrang Sakhan 9 An Lafel – Rakhine ralkap AA cun August 25 ihsin September 10 tiangah Rakhine ramkulh le Paletwa peng sungih ralhrang sakhan 9 an lakfel thu September 27 ni ah thu an suah.

AA cun August 25, nikhat sung lawngah Chin ramkulh Paletwa peng sungin ralhrang sakhan 5 rori an rak lafel thei ih, AA in Paletwa peng sungin ralhrang sakhan an lalfelmi 5 pawl cu Namatta sakhan, Ta’Hty Kung sakhan, Taka Chuang sakhan, Abuangtar’ sakhan le Kyat Ya Kai sakan pawl an si.

August 31 ah AA cun Rakhine ramkulh Bangladesh ramri ih ralhrang sakhan pakhat an lafel ih, September 9 ah AA cun ramri kil ralhrang sakhan an laksak bet. September 10 ah AA cun Maungtaw myone ih Cingchuang sakhan an laksak betih, September 10 thotho ah Maungtaw myone ih, Khah Marah ralhrang sakhan khal an lafel zo tin AA cun thu an suah.

September 27 khalah AA cun Rakhine ramkulh Maungtaw myone ih ralhrang ramri kil sakhan pakhat an la fel tin a kiangih um pawl cun an sim.

Maungtaw ih um pakhat cun “Ralhrang in Maungtaw myone ramri ih ralhrang sakhan pakhat cu September 27, zanlam nazi 4 hrawngin an do thokih, zanlam nazi 5 hrawng ahcun ralhrang sakhan in meikhu a suak luilo ih, AA in ralhrang sakhan an lafel tin thuhla kan thei cih. AA ih lakmi sakhan ahcun ralhrang ralkap le ramri kil pawl an um.

“Kan sung zarh lamin AA cun mipum 300 hrawng thawn sakhan an rak kulh zo ih, an rak thok zo. Tuini ahcun AA lamin sakhan an la fel thei. Kan dungih AA hnenih pe aw, ralhrang pawl khal tuitum ih AA lakmi ralhrang sakhan ih um pawl an si. Tlansuahnak ding an nei nawn lo tikah lungfim pawl cu AA hnenah an pe aw lohli siko. Doawknak ih thi tivek cu cipciar in kan thei hrih lo a si,” tin a sim.

China President A Pholang Aw – India thuthang pawlin China president an kai ih, China ah ralkap an lal ding tin thu an rak thehdarh ciamco nan, a dik hmel lo zetih,September 27 ah China president Zi Jinping cun Beijing ih thilri retnak hmunpi a hal.

China hi October thla ah hrilawknak nei ve ding an si ih, cumi ruangah leitlun ramdang pawl cun China ram hrilawk ding thuhla thawn pehparaw in thuhla phunphun an suah rero. Xi Jinping in amah lal lanta theinak daan tuah a tum tivek khal thu a suak ve.

India le China hi ramri cuhawk ruangah ral aw zet an si ih, India lamin China siatnak phunphun an tarlang duh zet bangin China lam khalin India an rak mawhthluk ringring ve.