Ralhrang In Model Thinzar Wint Kyaw Le Model NangMwe San An Kai

Ralhrang ralkap cun Model Thinzar Wint Kyaw le Model NangMwe San tei pahnih cu taklawng zuk le taklawng video ramdang ah sumpai in nan zuar ih, Myanmar nunau nunphung dan nan pahbal tin an kai.

Ralhrang in thu an suah dan vek asile Model Thinzar Wint Kyaw cu 2021 August thla ihsin American Website pakhat ah a taklawng zuk le video dollar in a zuar thokih, Model Nangmwe San cu 2020 September thla in India palai a biak hnuah American Website ah a taklawng zuk le video a zuar thok ve tin thu an suah.

Ralhrang ih thusuahmi ahcun Model Thinzar Wint Kyaw le Model Nangmwe San tlunah model dang khal taklawng zuk le video zuar an um tin an tarlang.

Ralhrang ralkap cun “Myanmar nunau pawl ih kilkhawi dingmi Myanmar nunau nunphung dan cu Model Thinzar Wint Kyaw le Model Nangmwe San in taklawng zuk le taklawng video zuar in an pahbal ih,Leitlun ah Myanmar nunau pawl ih hmai an balter. Curuangah an pahnih in kaih an si ih, pukmah 33 hmangin thubuai tuahsak an si. Hmailam khalah Myanmar nunau nunphung dan pahbaltu pohpoh hremnak kan pe vivo ding a si,” tin thu an suah.

Tutiang cu kaihmi Model Thinzar Wint Kyaw le Model Nangmwe San tei pahnih in daan vekin thubuai do theinak caantha an nei hrih lo tin an sim ih, ralhrang in thubuai an tuahsakmi cu kum 7 in kum 15 tiang thawngtlak theih a si tin daanthiam pawl cun an sim.

Lemcangthiam le Model Thinzar Wint Kyaw cu kan dung khalah Shan ralkap fawm thawn a zuk a darh ruangah ralhrang ralkap pawlin an rak kai zo ih, kan thlahsal zo tin thu an suah hnu reilo ah taksawng zuk le taksawng video zuar thubuai in an kaisal.

Model Nangmwe San cu kan dung thlalam ah a pa damlo Thailand fehpi a tum nan, ralhrang ralkap in an sian lo tlunah ramdang a feh theinak an laksak ih , a pa khal a thi zo. 2019 kum khalah Model Nangmwe San cu sibawi thlun dingmi daan na thlun lo tin sibawi a sinak a rak laksak zo.

Model Thinzar Wint Kyaw le Model Nangmwe San cu Myanmar Model le lemcangthiam lakah taklawng zuk uar zet an si ih, mipi zoh theih khalin an taksa tamsawm langnak zuk le video an thlah rero theu.