Ralhrang In NUG Vuanci Ih Inn An Urkang

Ralhrang ralkap cun NUG cozah in humhimnak vuanci zung sungtel U Naing Htoo Aung ih inn cu may 17 , zan nazi 12 hrawngah an urkang sak.

U Naing Htoo Aung ih inn cu Mandalay ramthen Nua Htoo Kyi myone ahmat 3 vengah a um ih, ralhrang ralkap mipum 15 hrawngin mawtaw pahnih in an pan hnuah an urkang.

An Inn kiangih um pakhat cun “Ralhrang pawl mawtaw pahnih to in an ra ih, vei 10 hrawng meithal an kap puak. Ralthuam an ken tikah zohman lengah suakin kan zoh ngam lo. Inn sungin kan hmuh dan vek asile hrekkhat fawm hruh an um ih,hrekkhat cu fawm hruh lo khal an si.

“U Naing Htoo Aung ih inn an urkang ding timi thuhla cu zarh khat lenglo a thang zo. Asinan, vanthat malmak ah ralhrang pawlin U Naing Htoo Aung inn an urkangmi cu coka lawng a kangih, innpi lam a kang lo. Zohman in kan mit lo nan, amahten innkang a ziam.

“Ralhrang in U Naing Htoo Aung Inn an urkang hlan ni 2 ah a kiangkap ih um inn pawl cu an himnak hrang inn suahsan dingin an rak sim cia. Ram buainak ruangah U Naing Htoo Aung inn ahcun kum 1 leng a sizo zohman an um nawn lo a si,” tin a sim.

U Naing Htoo Aung cu Mandalay ramthen Nua Hto Kyi myone ah NLD party in pituh hlutdaw palai ah nehnak rak cotu a si ih, ralhrang in rampi thuneihnak an lak tikah NUG cozah ah a rak lut ve.