Ralhrang In Party Pawl Ramleng Biak An Kham

Mungzua Mino Hotu Kum 10 Hremnak An Pe – Ralhrang ralkap cun an kaihmi Mungzua mino hotu Wai Moe Naing cu thubuai 5 hrang kum 10 sung thawngtla dingin August 12 ah hremnak an pe ih,thubuai dang 4 relfel ding a umlai.

Mungzua mino hotu Wai Moe Naig cu ralhrang ralkap in pukmah 505 hmangin thubuai 5 an tuahsak ih, kum 10 sung thawngtla dingin hremnak an pe. Ralhrang ralap cun Wai Moe Naing cu mithat thubuai,misuam thubuai, dalan thattu thubuai le cozah dokalh thubuai tivek pawl an orhter ih, relfel thluh lai ding an si.

Buaipitu pakhat cun “A thubuai zaten dilnak kan nei rero nan, pakhat hman in pom lo ih, an hrial thluh. Ralhrang in thubuai an puh vekin a tuahmi pakhat khal a um lo. Amah khalin a tuahm a silo thu Court ah a sim rero nan umzia a nei lo. Tu ah thubuai 5 hrang kum 10 thawngtla dingin hremnak an pe zo ih, thubuai 4 a nei lai a si,” tin a sim.

Dothlenak ah Mungzua mino pawl hotu Wai Moe Naing cu 2021, April 15 ah ralhrang ralkap pawlin mawtaw in an pah ih, an rak kai. Kaih a si hnuah a phunphun in an hrem ih, a nunnak hrang phan a um zet nan, a rak him. Tuitum ih a thu an then tum khalah amai sihni pawl rori khal ralhrang pawlin tel an siang lo tin buaipitu pawl cun an sim.

KNDF In Ralhrang 7 An That – Kaya ramthen Siattaw hmunram sungah KNDF le ralhrang ralkap vei 4 an do aw ih, doawknak ah ralhrang 7 an thi tin August 12 ah KNDF cun thu an suah.

Siattaw khua ralhrang sakhan in suak ralhrnag ralkap pawl cu KNDF pawlin an rak kap. Vei 3 an doawkak ah ralhrang ralkap 2 an thi ih, hriamhma an tam. Ralhrang feh vivo pawl cu KNDF lamin an dosal ih, ralhrang 5 an thih tlunah hriamhma ngah an tam tin KNDF cun mipi an simthei.

Siattaw lamzinpi ih doawknak sosang ruangah KNDF cun August 10 in zohman Siattaw lamzinpi zawh lo dingin mipi an theihter. Kaya ramkulh sungah Demoso , Pruso le Loikaw myone pawl ah doawknak a um peh ringring tin KNDF lam cun an sim.

KNU Hotu In Ralhrang A Zum Lo – Raldonak hnakin a relten rel in remdaihnak a um sawn ti ih rak tongsuak ringringtu KNU hotu bik Saw Mutu Say Poe khal ralhrang cangvaih dan ah a lungkim thei nawn loin a langih, ralhrang pawlin remnak an pitlin lo ding tin a tongsuak.

Ralhang hotu Min Aung Hlaing cun 2022 cu remdaihnak kum a si dingih remdaihnak um dingin theitawk kan zuam ding. Tlangpar ralthuamkai zaten thureltlangnak kan neihpi dingih,remdaihnak pawlkom khal hmailam pan dingin lamzin kan sialsak ding tin August 1 ah a rak tongsuak sal.

KNU hotu bik Saw Mutu Say Poe cun “Kannih KNU ih ram dinhmun fehpi dan cu ram a buai tikah ram buainak relfel dan vekin relfel ding timi a si. Asinan, tuhrih tiang ahcun ralhrang pawlin a relten rel ih remnak tuah an tum taktak loin a lang. An kekar dan ah remnak hmel a um hrih lo. Curuangah ram buainak fel dingin lamzin phunphun kan dap a ttul. Ralhrang in rampi thuneihnak an lak hnuah Federal Democracy lamzin cu zawh an tum lo lawlaw a si,” tin a sim.

Ralhrang ralkap cun tlangpar ralthuamkai pawlkom 10 an tong zo nan, tuih dinhmun ah Myamar ram buainak a sosang tuk peh hrih ih, Karen, kaya, Kachin, Chin, Sagaing le Makui pawlah doawknak a um ringring.

Ralhrang In Party Pawl Ramleng Biak An Kham – Ralhrang ralkap hnuai ih UEC thar cun Myanmar ram sungih party zaten ziang party khalin kan siannak tel lo cun ramleng palai hrimhrim nan be lo dingin tin August 11 ah ramsung party zaten ca an kuat thluh.

Cakuat ahcun “UEC ih theihpinak tel loin party pakhatin ramleng pawlkom le ramdang nan be thei lo. Nan be duh asile UEC hnenah nan dil hmaisa dingih sianak nan ngah hnu lawngah ramleng pawlkom le palai nan be thei fang. Kanmah UEC siannak tel loin ramleng hrimhrim biak theih lo,” tin an ngan.

Ralhrang hnuai ih UEC tharin hivek ca an suah thu ah Pituh Party Ko Ko Kyi cun “Ziangvek ram khalah party pakhat in ramdang Embassy le ramdang pawlkom biak tivek cu bomnak lak a si tikah kham a theih lo. Asinan, party pakhatin ramleng ihsin bomnak a la thei lo ding timi cu kan thei kan pom thluh ko.

‘Asinan, tu ahcun bomnak tangka lam a silo ih ramdang nan be lo ding, nan biak duh asile UEC nan theihter hmaisa ding tivek cu party zaten an thuhnuai ah ret an tum. Hivek cu Democracy ram hrimhrim ah a um lo. Hivek zin cun neta khalah Media khal nan be thei lo titiang in thu an suah duh men ding. Media biak ding khalah an siannak dil a tum men ding,” tin a sim.

ANP Party Central sungtel U Htun Aung Kyaw cun “Kannih cu party felfai kan si ih, ramdang in kan party tong dingah Rakhine an ra asile an umnak ram in an sian zo ruangah ton ding a siko. Pawlkom pakhat le pakhat tonawk le biakawk men ah buai ding a um lo. Zalen zetin tonawk theih a si ih, sian lo cun a hlanpi ihsin kham mai ding a si,” tin a sim.

Ramsung party dan ah Party pakhat in ramdang in bomnak thilri le tangka a la thei timi daan cu a um cia nan, ramdang hrimhrim nan be lo ding timi cu tuitum lawngah ralhrang kuthnuai ih um UEC thar pawl ih thusuahmi a si.

Japan Palai Le Min Aung Hlaing An Tongaw – Ralhrang ralkap in rampi thuneihnak an lak hnuah a vei khatnak Japan hlutdaw palai khal Myanmar ah a feh ve ih, ralhrang hotu Min Aung Hlaing thawn an kawm aw.

Ralhrang hotu Min Aung Hlaing le Japan hlutdaw palai Hiromichi Watanabe tei pahnih cu August 11 ah tongaw an si ih, tuantlang dan ding le pehtlaihawknak thasin nei dingin tongaw an si tin ralhrang cun thu an suah. Yangon ih Japan Embassy cun Japan hlutdaw palai Myanmar ih a feh thu an thei nan, ziangvek an rel timi cipcar an theih lo thu an sim ve.

Ralhrang ralkap cun July 30 ah Yangon ih um Japan mino pakhat an rak kai ih, thubuai 3 an tuah bet. Japan mino cu thuthanglatu pakhat a si ih, mino pawl duhphorhnak an neih lai video a la. Cumi laiah ralhrang pawlin an kai ngah ih, tutiang an thleh hrih lo. Japan palai le Min Aung Hlaing cun Japan mino kaih a si thu khal an rel dingah ruah a si.

Hivekin Japan hlutdaw palai in ralhrang hotu Min Aung Hlaing a ton tikah Japan ih um Myanmar mipawl cu an thinheng tukih lamzawh duhphorhnak nei in Japan cozah cu ralhrang pehtlaih lo dingin an phut. Ralhrang in rampi thuneihnak an lak pekah Japan cun ralhrang an rak mawhthluk ih, Myannar mipi an dinpi nan, a rei vivo ih, japan cun ralhrang an naih deuhdeuh in a lang.

Covid 19 An Nehtu Aupitu Kim Jong Un – N.Korea hotu Kim Jong Un cun an ram ah covid 19 natnak a um nawn lo thu a ausuahpi ih, covid 19 natnak ruangah an khammi pawl khal bal thluh dingin thu a pe cih.

Leitlun ramdang in nasaten covid 19 natnak an tuar laiah N.Korea cun kan ram ah covid 19 natnak a um lo tin an rak ausuahpi rero. Leitlun ramdang pawlin covid 19 natnak kan neh an ti hnu 2022 ahcun N.Korea in Covid 19 natnak an tuar thok ih, covid 19 natnak ruangah thla reizet sung an buai.

Cumi hnuah N.Korea ram hotu Kim Jong Un cun “Covid 19 natnak kan neh fel ee” tin thu a suah ih, a naunu Kom Yo Jong cun “Kan ramin covid 19 natnak kan tuarnak san cu S.Korea ruangah a si ih, S.Korea in ramri in kan ramsungah covid 19 natnak an darhter hrim a si,” tin S.Korea a puh. Cuveten S.Korea lam an tongsuak ve ih, N.Korea ih covid 19 natnak le kan ram S.Korea pehparawknak a nei lo, an duhduh an tlak men a si tin thu an rak suah ve.