Ralhrang In Phun 10 Sung Pawl Caan An Pe

Ralhrang In Phun 10 Sung Pawl Caan An Pe – Ralhrang ralkap cun 2022 kum sungih phun 10 sung le phun 10 phi remcang lo pawl cu 2023 phun 10 camipuai tuah caan ah an tuah thei ding tin’ June thla ah thu an rak suah zo ih, tu ahcun September thla tiang caan an on thu an thansal.

Ralhrang ralkap cun phun 10 sung le phi remcang lo pawl cu an phisal thei dingih, cumi hrang September 1 in 30 tiang myone tin famzirzung ah hminpek theih a si tin’ ca an suah. Camipuai phisal dingin dilnak ca leiman 200 kyats a si ih, tacik man ah 700 kyats a si ding tin’ an tarlang.

Ralhrang ralkap cun July 17 ah ramsung phun 10 ongtu pawl hmin cazin an rak suah ih, zatek sungin 46% ong an um tin an tarlang. Myanmar in covid 19 natnak a tuar hlanah phun 10 camipuai phitu ting 9 tlun an rak um theu nan, ralhrang kuthnuai ahcun phun 10 camibuai phitu ting 2 fang lawng an si.

NUG cozah cun ralhrang hnuaiah phun 10 phi duh lo tlawngta ting 7 hrawng an um tin’ thu an rak suah ih, ralhrang uknak dokalh in phun 10 phi lo pawl upatnak an pek hnuah ralhrang hnuai ih phun 10 phi ong pawl cu phun 10 ah kan cohlang lo tin’ NUG cun thu an rak suah ve zo.

AA Tih Ah Ralhrang Pawl Bomb An Puah – Rakhine ramkulh Maungtaw myone sungah AA le ralhrang doawknak a sosang peh hrih ih, AA cun Maungtaw mipi pawl cu ralhrang umnak hmun kiangkap ah um lo dingin theihterna ca an suah.

Hivek in AA in mipi theihternak an neihmi cu ralhrang lamin an rak thei ve ih, an thinphang ah ralhrang hmunpi pawl cun duhtawk in kiangkap an kap ciamco. Maungtaw ahcun AA lam mipum an finkhawm aw rero ih, nasaten ralhrang do an tum. Cumi khamnak ah ralhrang pawl cun anmahten ralthuampi an kap puak rero zo.

Maungtaw ih um pakhat cun “AA in ralhrang umnak kiangah feh lo dingin le um lo dingin ca an suah hnuah ralhrang hmunpi pawl cun an umnak kiangkap cu ralthuampi in an kap ciamco. A thok ahcun AA le ralhrang an do aw ah kan ruat,Asinan AA tuanvo neitu kan suh tikah kan thusuahmi thawn pehparaw in ralhrang pawl an thinphang ih, anmahten ralthuampi an kap ciamco hrih tin’ in sim. Maungtaw lamah AA pawl an finkhawm rero ih, ralhrang pawlin an theih tikah an thinphang siko,” tin a sim.

A tufang Rakhine ramkulh tlunah Chin ramkulh Thlanglam Paletwa peng sungah AA le ralhrang an pel aw rero ih, mipi cun puak awn phunphun an thei deuh ringring. Doawknak ruangah Maungtaw in mipi tamtuk raltlan an um zo ih, Paletwa lamah doawknak ruangah eiin zianghman phur thei loin an um ve.

Thinlung Kim Loin Palik A That – Yangon ramthen Thanhlin myone Phayakung vengah ralhrang palik pawl cun thinlung kim lo pakhat cu PDF thawn pehparawknak a nei tin’ kaih an tumih, thinlung kim lo cun palik pakhat a rak at that.

Thanhlin ih um pakhat cun “Thinlung kim lopa cun a hlan khalah a thinlung buai ruangah mi pakhat a rak that zo. Tuitum ah palik pawlin PDF thawn a pehpar tin kaih an tumih, thupten nam a rak ken tikah amah kai hmaisabiktu a rak at. A hngawng ah a at fuh tukih a hmunah a thi cih. A kiangih palik dang khal hriamhma a ngah.

“Taktak ih rel ahcun thinlung kim lo cu PDF thawn pehparawknak a nei lo. Thinlung kim lo a si tikah a buai theu ih, cumi ruangah kaih an tum siko ding. A sungte pawl cu ralhrang lamtang le ralhrang dinpitu tivek an tel rero sawn a si,” tin a sim.

KIA le PDF In Ralhrang 42 An That – Kachin ramri Sagaing ramthen kathar myone Banbuikung ( ဘန့်ဘွေးကုန်း ) khua ih umhmun khuar ralhrang ralkap pawl cu August 22, zinglam nazi 5 hrawngah Kachin ralkap KIA le Kathar PDF in an do ih, nazi 2 sung tluk doawknak ah ralhrang 40 tlun an thi tin’ Kathar PDF hotu cun RFA a simthei.

Kathar PDF hotu cun “KIA pawlin in hoha ih, anmah KIA sungih PDF pawl khal an tel. Kanmah khalin PDF pawl kan komkhawm aw ih, mipum tampi kan si. Kan doawk caan nazi 2 sung a kim ding. Kathar ih ralhrang hmunpi khalin ralthuampi thawn in kap. Doawknak laiah vanzam awn kan thei ih, dung kan sip.

“Ralhrang vanzam a thlen tikah kannih cu kan zaten dung kan rak sip fel thluh zo ih, ralhrang in tlunlam in bomb an thlak ciamco tikah anmah ralhrang hnuailam ih um pawl an thlak that ngah. Cumi ah ralhrang 8 an thi tin kan thei. Doawknak ih thi ralhrang thawn ralhrang 42 an thi. Ralhrang mipum 48 in Banbuikung khua an luhcilh ih, ralhrang 6 hrawng lawng an him.

“A thok ahcun ralhrang pawlin hmunram an nor tikah ralhrang mipum 200 tivek an si. Neta ahcun ralhrang mipum 100 ah a tla ih, tu ahcun ralhrang mipum 100 hnuai khalin mi an nor thlang. Cumi ih umzia cu a hlan bangin ralhrang an daih aw tuk nawn lo siko. Kannih mipi ralkap lam cu kanmai tuahmi ralthuam kan hmang tlangpi ih, tu ahcun ralthuam thatha kan tuah thei ve thlang.

“Bomb kan tuahmi pawl ah veikhat puah ih ralhrang tampi thi thei tivek khal kan nei ve. A thok ahcun tuahcop meithal sete rori kan hmangih duhthu a sam lo. Tu ahcun ralthuam donmi khal kan nei ih, anmah ralhrang hnenin ralthuam laksakmi khal kan nei. Cun, meithal dang zoh in meithal thasin tuahmi khal kan nei. Kan ralthuam a tha vivo ih, ralhrang kan do neh deuhdeuh tikah ralhrang pawl cun tlunsang raldonak vanzam rori an hmang thlang ve.

“Tuih ralhrang pawl cangvaih dan cu ke in an vaksuak ngam nawn lo. Khua pakhat an luhcilh duh asile Helicoter in an tumih, khua sungah an lut. Khua an urkang ih, ni 2, 3 khua sungih an um hnuah Helicopter in an thiar suak sal. Helicopter in khua khat hnu khua khat an feh. Ke in an feh ngam nawn lo. Ke ih an fehnak ding lamzin ah bomb puah an phang tuk thlang.

“Khua ih an luh tikah ralhrang pawl an rapthlak deuhdeuh ih ,nunau an kaihmi cu kum upa khal zuah loin an sualpi. An hmuhmi mipi thilri pohpoh an la ih, Cumi hnuah khua an urkang theu. Nunau thuamhnaw khal an la thotho ih, a mak ngaingai a si,” tin’ RFA a sim.

UN Myanmar Palai In Rohingya Raltlan Hmun A Zoh – Myanmar a tlawn hnuah UN Myanmar palai Noeleen Heyzer cu Bangladesh ih Rohingya raltlan hmunpi ah a feh ih, thuhla suhfelnak a nei.

UN ih bomnak nan dong maw? ziagntluk nan harsa tivek pawl thusuhnak a nei. Cumi hnuah raltlan hmunih nunau hruaitu, biaknak hruaitu le nauhak kilkhawitu pawl khal a kawm hai. Cumi hnuah Rohingya buaipitu pawl thawn an kawm aw bet.

2017 kum ah Rakhine ramkulh ih Rohingya miphun pawl cu Myanmar rammi nan silo tin’ ralhrang pawlin an rak dawi ih, nasaten an buai. Rohingya lamin ralhrang an rak do ih, thahawknak runpi a thleng. Roingya mipum tampi an thih bangin ralhrang tampi an thih phah ve. Buainak ruangah Rohingya mipum tingtel cu Bangladesh ramah an rak tlan ih tu ahcun Bangladesh ram ah kum 5 an um kim thlang.

Bangladesh ram cun an ram ih umter ringring rem an tilo ih, leitlun ramdang khalin an ram ih um dingin Rohingya miphun an duh lo cio. Curuangah, Bangladesh ih Rohingya pawl cu Myanmar ah kuat kir tumsal an si ih, tutiang cu a takin Myanmar ah kuat kir an si hrih lo.

CDm Tuah Ralkap 3500 An Kim – Ralhrang ralkap in rampi thuneihnak an lak hnuah ralkap lakin mipi lamtang ih CDm tuah an um rero ih, tu ahcun ralkap CDM tuah 3500 an kim zo tin’ buaipitu pawl cun an sim.

CDM ralbawi Nyi Thutah cun “Tutiang ih hmin cazin kan ngah dan vek asile ralhrang in rampi thuneihnak an lak hnuah CDM tuah ralkap 3500 an kim. Thenkhat hmin pelo ih CDM tuah tla an ummen ding. Tuih ralkap CDm tuah hmin cazin kan neihmi a si.

“CDM tuah lakah ralbawi an mal hrih. Sithiam le engineer ralkap lamin ralbawi CDM tuah ralbawi an tam nan, raldotu ralbawi lakin CDm tuah an mal hrih. Raldotu lakin ralbawi pawlih sinak tiang thleng vivo thei an si tlunah tlansuak ih kaih salmi khal an tam. Khatlam ah Sibawi le engineer cu zirsuak mifim an si ih, an ruahnak a fim. Tu ahcun ralhrang lakah CDm tuahtu pohpoh thah hngal dingin thu an suah ih, nasaten an hro aw. Cuti cingin mipi lamzin hawl rero khal an um tampi,” tin a sim.

Ralhrang in rampi thuneihnak an lak hnuah ralkap hnakin palik lakah CDM tuah an tamawn ih , Palik CDM tuah thawng 7 tlun an um zo tin an sim. Ralkap le palik komkhawm ih CDM tuah cu thawng 10 an um zo tin tuanvo neitu lam cun an sim. Himi ah cozah hnatuan , zirhtu le thildang ih CDm tuah pawl telh an silo.

Taiwan Lam Timtuahnak An Nei – China in Taiwan do tumin an hel rero ruangah Taiwan khal mah le mah humhimawknak hrang timtuahnak an nei ih, kanmah in dotu cu sunnak nasaten an tuar ve ding tin’ Taiwan President a tongsuak.

American House Speaker Nancy in Taiwan a tlawn hnuah American tlangsuak upa thenkhat cun thupten Taiwan an tlawng betih, China lam thinheng sosang in an um. Taiwan ramri ah raldo an zir ciamco ih, Taiwan tupi lam an kap hrim theu. Asinan, Taiwan lamin ralthuam hman hmaisa an duh lo ih, boruak an thlir. Tutiang cu ram pahnih a takin an kap aw hrih lo ih, tongkam in an hro aw rero.

Taiwan President cun “1958 kum ah China cun Taiwa bomb an rak thlak zo. Asinan, Taiwan lam beidong loin an rak kham aw thei ve. Cutluk miraltha Taiwan pupa hruaitu pawl cu upatnak ka pe. Taiwan in kan ral lakin kilhimawk theinak kan nei timi khal leitlun kan rak hmuhter zo. Tu khalah Taiwan humhimnak hrang ziangkim kan tawlrel thluh zo. Kan humhim aw thei timi cu kan ral pawl kan hmuhter dingmi a si ih, Taiwan dotu pohpoh nasaten an tuar ve ding a si,” tin a sim.