Ralhrang In Tlawngta 7 Thih Dan An Pe – Ralhrang uknak dokalh ih lamzawh duhphorhnak neitu Dagon phunsang tlawngta 7 pawl cu ralhrang in an kaih hnuah an zaten that dingin November 30,2022 ah an tlun thu an relcat sak.
Phunsang tlawngta 7 pawl cu Khant Zin Win, Thura Maung, Zaw Lin Naing, Thiha Htet Zaw, Hein Htet, Thet Paing Oo, Khnat Lin Maung Maung pawl an si. 2022 April thlah ah an rak hlo ih, an thuhla zingzoi a si tikah ralhrang pawlin an kai. 2022, April 18 ah Dagon ih ralrhang bawi Saw Moe Win thah a si ih, cumi thuhla ah tlawngta 7 pawl cu ralbawi Saw Moe Win thattu ah an puh ih ralhrang pawlin an rak kai. Cucu, tuah ralhrang pawlin hremnak an pe.
Dogan phunsang tlawngta pakhat cun “An zaten veikhat kaih ah an kai ih thubuai pakhat bangaw in an tuahsak thluh. Mithat thubuai an tuahsak ih, tu ahcun an zaten thi dingin thu an relsak. Ralhrang pawlin thih dan an pek bangin an that taktak pei maw ti cu kan thlir ringring. Ralhrang in hivekin tlawngta 7 pawl thih dan an pek thu cu ramdang thuthang pawl khal kan sim thluh ding a si,” tin a sim.
Ralhrang in Yangon Insein thawnginn sung Court ah tlawngta 7 pawl thih dan an pekmi a si ih, tu ah tlawngta 7 in thubuai dang pahnih khal an tuahsak betih cumi khal Court ah an rel peh. Ralhrang ralkap cun ralhrang bawi pakhat a thih thu ah tlawngta 7 lawng siloin mino dang 4 pawl khal thih dan an pe.
Ralhrang in rampi thuneihnak an lak hnuah anmah dokalhtu mino pawl an kai rero ih, thawng an thlak hnuah thih dan an pekmi a tam zo. Ralhrang in thih dan an pekmi lakah mi 4 pawl cu 2022, July thla ah a takin an rak thlai that.
Ralhrang Lawng 7 An Kap – Sagaing ramthen Salinkyi myone Shwekung khua kiang Chindwin tivapi tluanih ralhrang thilri lawng 7 cu PDF komkhawm in an rak kapih, ralhrang 6 an thi tin thu an suah.
PDF KLG hotu cun “Mandalay lamin Sagaing ramthen sungah an lutih Chindwin tivapi an zawh. Ralthuam phunphun thawn ralhrang lawng 7 kan rak kah tikah ralhrang 6 an thi. Cuveten Mungzua in ralhrang dang lawng pahnih toin an ra thleng bet. Cumi hnu ahcun ralhrang mipum 200 hrawng an si ding. An feh tinkim ah kan rak kap ih, meithal tlunah RPG tiang kan hmang.
“Sun nazi 1 in zanlam nazi 3 tiang ralhrang lawng pawl kan kap vivo ih, ralhrang lawng pakhat siat ah ralhrang 6 an thi. Kanmah lam cu kan him. Kiangkap PDF pawl kom aw in ralhrang lawng pawl rak kap kan si,” tin a sim.
Pyu Saw Htee Umnak Hmun An Kap – Minkin myone Kyawzua ih umhmun khuar Pyu Saw Htee pawl cu Minkin PDF le an tuanpi pawl in an kap ih ralhrang le Pyu Saw Htee thi an um tin thu an suah.
Minkin pDF cun “PYu Saw Htee sakhan ahcun ralhrang pawl khal an um ve. Ralthuampi in kan kapih, ralhrang le Pyu Saw Htee thi a um rori nan, a zat ka fiah thei lo. PYu saw Htee sakhan ahcun ralhrang le Pyu Saw Htee pawl an umtlang ih, kiangkap khua pawl an hnaihok ringring. Cumi ruangah Pyu Saw Htee le ralhrang pawl umnak kap lawlaw kan si,” tin a sim.
Ralhrang In KNU Bomb An Thlak – Ralhrang ralkap cun December 1, zinglam nazi 1 hrawngah KNU hmunram sung bomb an va thlak ih kiangkap thilri le ummak hmun pawl a kang siat thluh.
KNU sungtel pakhat cun “November 1, zinglam nazi 1 hrawngah a si ih, ralhrang raldonak vanzam cun kan hmunram 6-nak sungih lung leihnak hmun pawl bomb an thlak. Bomb puak ruangah hnatuan pawl lakin hriamhma ngah an um. Ralhrang cun tlunsang in bomb vei 2 an thlak.
“Tu ih ralhrang bomnak thlaknak hmunah kannih KNU sakhan pakhat hman a um lo ih, a kiangkap khalah kan sakhan a um lo. Cuti cingin ralhrang pawl cun bomb an thlak leuhleuh. Ralhrang pawin ziang duhsan in bomb an thlak tikhal kan thei lo. Bomb puak ruangah kiangkap a siat phah zet a si,” tin a sim.
Ralhrang 32 An Thi – Sagaing ramthen shwebo ih vei 4 doawknak ah ralhrang 32 an thi tin Shwebo PDF cun thu an suah.
Shwebo PDF cun “Shwebo myone thlaicinnak tlawngih umhmun khuar ralhrang mipum 130 hrawng cun November 29 ah in ra pan ih, Ngiopintar khua kiangah kan do aw thok. November 29, zinglam nazi 7:30 ah kanmah in pantu ralhrang pawl cu kannih PDF komkhawm in kan rak kap ih, ralhrang 10 an thi.
“Zinglam nazi 8:30 hrawngah ralhrang pawl thawn kan kap aw betih ralhrang 10 an thi. Zinglam nazi 9:36 hrawngah palik sakhan kiangih um ralhrang pawl thawn kan kap aw ih, ralhrang 5 an thi. Zinglam nazi 10:30 hrawngah tlawnginn ih umhmun khuar ralhrang pawl thawn kan kap aw ih, ralhrang 7 an thi.
“Tuitum ah kanmah lawng siloin Fire Dragon, One Day Revolution Force, Khin Oo PDF, LPDF le tualsung PDF pawl thawn ralhrang ralkap do kan si,” tin thu an suah.
NUG In An Umnak Hmun An Rel – NUG cozah in humhimnak vuanci U Yee Mon cu a tufang dothlengnak thuhla thawn pehparaw in thu cipciar suh a si ih, a tufang NUG le PDF dinhmun a rel tlunah NUG hotu pawlih umnak khal mipi simtheihnak a nei.
NUG humhimnak vuanci U Yee Mon cun “Tu ah rampi huapin dothlengnak kan tuahmi a si ih, NUG lailak president Duwa Lashila cun 2021, September 7 ah ralhrang donak ah tel dingin mipi a rak sawm zo. Cumi ihsin kan zoh asile thla 15 zik ralhrang kan do thlangih, ralhrang kan donak zoh tikah thansohnak tampi kan nei. Ahleicein kanmah ih ralthuam pekmi PDF le kan thupek thlun pDF an um tlunah tuanpi tampi kan nei. Tuini tiang mipi lamin in dipi ih in bawm ringringmi khal kan thazang a si. Dothlengnak kan tuahmi lamzin ah kan feh taktak ih Myanmar mipi khal zalen phuzet kan si tin kan hmu.
“Kannih NUG in sumpai kan ngahmi sungin a tamsawn cu PDF pawl ralthuam leihnak ah kan hmang. Curuangah kan thuhnuai ih um PDF felfai kan nei ih ralthuam kan pe rero. Tu ahcun ralthuam hman le umhmun khuar dan tivek khalah hmailam kan pan tuk thlang. Tu ih kan tummi cu pawlkom neuhneuh, mahte din celcel men loin thupek pakhat hnuaiah hmunkhat PDF pawl an umkhawm ding cu kan duhmi an si. Cucu, kanmah NUG thupeknak hnuaiah um thluh haiseh kan tinak cu a si cuang lo, thupetu hi kanmah NUG lawng siloin dothlegnak ih kan tuanpi pawl thawn tuah a si. Curuangah hmuntin ih um dothlengnak ralthuamkai pawl cu hmunkhat ah kom aw dingin le thupeknak hnuaiah um dingin kan sawm rero. Hmunkhat thupek hnuai ih an um lawngah an hrang ralthuam le thilri bomnak kan tawlrel sak thei ding. Kan hnenih lut PDF pawl cu an hrang ralthuam le tulsammi kan pe rero.
“Tuhrih ahcun kanmah NUG thupeknak hnuaiah PDF tatyin 300 an um fel zo ih, tu ah kan thupeknak hnuaiah um dingin hminpe duh khal tampi an um. Mipum lamin kan zoh asile ralhrang neh theinak PDF mipum cazin kan nei lo. PDF hnuaiah kilhim tivek khal din vivo bet kan tum. Tu ah mipum cun ralhrang neh theinak kan nei zo nan,ralthuam lamah harsatnak tampi kan nei. Ralthuam thu ah duhduh in cangvaih a theih lo ih, felfai zetin tawlrel a tul. Kan duhmi PDF zaten ralthuam pek thluh ding a si.
“Tlangpar ralthuamkai pawl thawn kan dinhmun in sut asile tuanpi tampi kan nei zo ih tuanpi thei dingin biak reormi khal kan nei. Kan rel duh pakhat cu tlangpar ralthuam zaten kan be thluh ih,pehtlaihnak kan nei thluh. Kum 1 sung kan cangvaih dan ding tivek kan ngankhawm. Politics thu ah siseh raldo thu khalah tuanpi pawl thawn hmaikum ah nehnak co rori kan tum. AA le ralhrang kapaw lo dingin remnak an tuah thu ahcun cahnah ih nganmi a silo ih, tongkam men lawngin remnak nei an si. Cumi ih umzia cu a tufang boruak ruangah le mipi zawnruat ruangah a si ih,AA in dothlengnak an bansan cuang lo ding. AA le ralhrang kap aw lo dingin remnak an tuah ruangah Rakhine ih ralhrang pawl cu hmundang an kuat tivek cu kei in ka zum lo lawlaw.
“Dothlegnak ih ke kan kar vivo theinak dingah kan hmunram sung ahcun siah tivek kan khonmi an um. Uknak lam khal kan fehpi vivo ih, ziangkim kan tawlrel. SIAH kan la timi ah mipi harsatnak pek lo, mipi hrang hmansal ding cu kan tummi a si. Asinan, kan than rero zo bangin ralthuamkai in SIAH an khong thei lo ih, SIAH Latu a hranten pawlkom kan din. PDF siseh ralthuamkai dang khalin SIAH lak theinak an nei lo.
“Ralhrang in tlunzuang raldonak an hmang hi an cahnak pakhat vek a si ih, duhduh in tlunzuang raldonak an hmang. Asinan, kan theih dingmi cu ramleng khalah tlunzuang raldonak hmang pawlin nehnak an co thluh cuang lo. Tlunzuang raldonak hi nehnak a si thluh cuang lo. Tlunlam ih cangvaihnak tih a nung a dik ko,Asinan leihnuai ih doawknak sawn hi dinhmun fiangtertu a si. Leihnuai doawknak ahcun ralhrang pawl an cau tuk thlangih kan thazang a tha ngaingai.
“Ramleng dinhmun ahcun tu ih Myanmar mipi pawl dothlengnak kan tuahmi an thei thluh zoin ka ruat. Ramdang bomnak thuhla ahcun ramdang risan in kan tuahmi dothlengnak a silo ih,mipi kan thazang le kan duhmi ruangah dothlengnak tuah kan si ih ramleng bomnak ah kan ttum aw lo. Cuti ka ti tikah ramdang bomnak kan ngah thei lo ding ka ti duhnak a si. Kan cangvaihnak hmuar a nei deuhdeuh ih, kan dinhmun a tha deuhdeuh asile ramleng bomnak cu a lut vutvo mai ding. Dothlegnnak kan tuahmi hi ziagtlukin kan fehcak , kan feh muang ti hnakin a kelten kan feh hngethngo thei ding hi a poimawh tuk.
“Kannih NUG hruaitu pawl khal a tamsawn Myanmar ah kan um ih, poimawh thilthu ah ramleng ih kan suah caan khal a um. NUG ih mi poimawh lailak president Duwa Lashila , Prime Minister Mann Win Khaing Than le mi poimawh dang pawl cu dothlengnak hmunram ah kan um thluh. Mipi kan tlansan lo ih kan ram khal kan tlansan lo. Cuti cingin ramleng ih tuavo nei hrimhrim cu an um. Dothlegnak ralkap pawl kan umcilh dingih dothlengnak kan tuah ding timi cu kan dinnak khal a si.
“Netabik ih ka rel duhmi cu kum 1 tumtahnak kan nei. Cumi cu kannih NUG siseh kan tuanpi pawl thawn kum 1 sung cangvaih dan dingah lungkimnak kan nei. Kan tumtahmi vekin ke kan kar thei asile hmaikum ah dothlengnak kan theksuak ding tin zumnak ka nei. Mipi in dothlengnak kan tuah ih mipi kan tel vivo khal a thupi tuk. Ziangkim tha thlah loin dothlengnak ah tel vivo dingin mipi zaten kan lo sawm duh hai asi,” tin a sim.
China Le Russia In S.Korea An Hel – November 30 ah China ralonak vanzam le Russia raldonak vanzam pawl cu ramri lanin S.Korea ram sungah an lut tin S.Korea lam cun thu an suah.
November 30 zinglam nazi 5:50 hrawngah China raldonak vanzam pahnih cun S.Korea ramsung an lut ih, a hnuah Russia raldonak vanzam khal minute 18 sung S.Korea ramsungah an zam ve. Cumi ruangah kanih S.Korea khalin raldonak vanzam kan thlaksuak ve ih, China le Russia vanzam pawl kan dawi tin S.Korea cun thu an suah.
China le Russia cun S.Korea ramri lannak kan nei lo ih, a kelten bangin tlunzuang raldonak vanzam kan neihmi pawl zohsinnak kan nei men a si tin an rak sim ve.
S.Korea le N.Korea buainak ah China le Russia hi N.Korea dinpitu le ralthuam thuhla ah N.Korea tuanpitu an si. S.Korea le N.Korea thu cu 2022 kum sungah a sosang deuhdeuh ih, kap aw man tiatia in an um veve.
Leave a Reply