Ralhrang In Pyu Saw Htee Sungtel Ah Misual Pawlkom An La

Ralhrang In Pyu Saw Htee Sungtel Ah Misual Pawlkom An La – Ralhrang ralkap cun Yangon Insei thawnginn ih an khummi misual hminthang, rukru, mithat, rittheihsi tham le zuar Kyaw Win Sein le a rualpi pawl an thlah ih, Pyu Saw Htee an tuanter.

Misual lalpa tiah a hmin an phuahmi Kyaw Win Sein le a rualpi pawl cun venglal, myone uktu tivek pawl an kop ih, Yangon ramthen sungah misual cazik cek vekin an vak ringring. Dothlegnak ih teltu pawl cu dothlengnak nan bansan lole nan sungkua in kan lo that thluh ding tin an hro.

Yangon ih um pakhat cun “Venglal Soe Myint le innza uktu Po Kyi tei pahnih cun misual Kyaw Win Sein an sawm ih, duhtawk in mipi sumpai an dil, mipi an hro ih, torhmawh zetin an cangvai. Dothlengnak ah nan tel asile sungkua in thah nan si ding tin khawlak khalah an au men. Ralhrang theihpinak telin an duhduh an tuah ih, ralhrang pawlin zalennak an pe.

“Ralthuam an nei ih, za sim hnu khalah misual cekin an vaksuak theu. Anmah lawng siloin ralhrang 7 an hruai ih, venglal pawl thawn an zate mi 23 hrawng an si. Zan ahcun lamzin Gate ah an um theu. Pyu Saw Htee ih a luh hnu ahcun mawtaw khal pek an si ih, khawsung ah ralhrang tikfialmi pohpoh an tuah men a si,” tin a sim.

Misual lalpa Kyaw Win Sein hi NLD cozah sa 2016 kum ah an rak kai ih, license nei lo mawtaw, bike, ralthuam le rittheihsi phunphun thawn an rak kai. 2013 kum ah nunau pakhat an kai ih, ting 200 i nan rak tlanter. 2014 kum hnu lam ahcun nasaten rittheihsi an tham ih, an zuar. Cumi ruangah kaih a si ih, kum 65 sung thawntla dingin hremnak an rak pe.

Hremnak an pek hnuah thawnginn sungin a tlaksuak ih, 2016 kumah an kai ngahsal. An ngaihsak hnuah kum 10 dang thawngtla bet dingin hremnak an pe ih, hremnak an pekmi zaten kum 75 a kim. A thawngtlak kum a cem hrih lo nan, ralhrang in an thlah zalen ih tikfial dingah an sor reromi pakhat a si.

Ralhrang Ruangah Nauhak 134 An Thi Zo – Ralhrang in rampi thuneihnak an lak hnuin tuini tiang ralhrang ruangah nauhak 234 an thi zo tin hminsin tuahtu pawl cun an sim.

Ralhrang in nauhak an thahmi lakah Depayin myone sungih tlawnginn bomb an thlakmi cu relhlawh zet a si ih, ralhrang in tlawnginn bomb an thlak ruangah nauhak 7 an rak thi. Nauhak thi pawl cu ralhrang in an kap that, ralhrang ralthuampi in a tlak that, ralhrang in an hrem that tivek an si.

Ralhrang ruangah nauhak thi an tam bangin ralhrang cun kum 18 hnuailam kaihmi khal an nei tam ih, hminsin tuah dan vek asile ralhrang in kum kim lo 363 an kai.

US Vice President In Korea Ramri A Zoh Ding – Japan Prime minister hlun vuinak ih tel ve US Vice president Kamala Harris cun Japan a feh rualin S.Korea a tlawn phah ding thu a sim ih, S.Korea le N.Korea ramri a feh tum.

N.Korea cun an ramri ah ramdang palai feh rem an ti lo lawlaw ih, ramdang palai an feh asile an thinheng thei tuk. Kan dungah US hourse Speaker Nancy pelosi Korea ramri a rak tlawng zo ih, cumi tum khalah N.Korea cun “Nancy pelosi hi leitlun remdaihnak siattertu a si,” tin an rak mawhthluk zo.

N.KOrea le S.Korea hi an rem aw taktak thei lo ih, a tufang hi an karlak boruak sosang deuh sal ruangah US lam cun S.Korea an vehvai ringring. US in S.Korea an vehvai ringring ruangah N.Korea lam cun bomb zamthei le Nuclear tiang zohsinnak an nei rero zo.