Ralhrang In Rakhine Party Ralrinnak An Pe – A tufang Rakhine ramkulh sung hmun tinkim ih doawknak ah raltlan an tam deuhdeuh ih, ralhrang lam cun mipi hrang bomnak thilri le eiin phunphun tiang Rakhine ramkulh sungih luh ding an kham.
Hivek a si tikah Rakhine Party ANP cun ralhrang pawl cu raltlan pawl bomnak pek siansak dingin le minung covo daan upat sak thiam dingin an duh thu ca an suah. ANP in ca an suah hnuah ralhrang hrilawknak tuanvo neitu UEC thar cun ANP party an ko ih, nun an sim cih tin ANP lam cun an sim.
ANP party hotu cun “Ralhrang kuthnuai ih UEC cun in ko ih,ralrinnak in pe. Nan thusuahmi cu party daan thawn a kaih aw thluh lo,neta ahcun hivekin thu nan suah nawn lo ding in ti. Tuitum ahcun hremnak in pe tum lo a bang. Buainak ah khatlam lawng tantuk zawngin ca nan suah lo ding in ti.
“Kan casuahmi ahcun khua sungah do aw lo dingin, doawknak ruangah mipi in a tuar phah cu kan mawthluk thu, lamzin on ih, mipi hrang bomnak thilri pawl lutter dingin tivek kan rak dil. Cuvek cu an ngaih lo si ding,” tin a sim.
ANP party in hlutdaw palai hlun Phitan cun “Keikhal pukmah 505 in thubuai in tuahsak. Midang zokhal anmah ralhrang mawhthluktu pohpoh cu thubuai an tuahsak dingih an kai mai ding. Ralhrang cun a takih an tuahmi pawl thup rero an tum. An hamnak hawlin an cangvai rero cu a si,” tin a sim.
Myanmar Politics thiam pakhat cun “Ziangvekin ralhrang naih khal sehla, ralhrang thawn tuanpi tum sehla, ralhrang thawn be aw rero khal sehla anmah ralhrang pawlih tuahsualmi, palhmi relsuak a si cun ralhrang pawl an pom aw duh lo ih, mikaih le hrem rori an tum. An hmu aw fiang thei hrih lo hi mipi in kan tuar phah. Curuangah, ralhrang remnak tuahpi tum cu thuhlo lak men a si,” tin a sim ve.
Kalay Ah Chin Mino An Hrem That – Sagaing ramthen Kalaymyo Varpi khua ih um Cin Biak Sang ( kum 26 ) cu ralhrang ralkap in an kaih hnuah a ruang la dingin a sungte pawl an theihter men.
Cin Biak Sang cu Tahan lamzinpi ah ralhragn pawlin an kai ih, reizet a sungte pawlin a thuhla an thei lo. A sungte pawlin reizet a thuhla an theih lo hnuah ralhrang pawl cun tuitum ah a ruang la dingin a sungte pawl an theihter men.
A Unau pakhat cun “Ruang la dingin in sim tikah zu a ngai tukih amahten phar ah a lu a khong aw ciamco. Cumi ruangah thi a si tin in simthei. Asinan, kannih cun kan zum lo lawlaw ih, an hrem that rori in a lang. Ralhrang pawl cun ziang media thusuhnak khal nan let lo pei tin in hro bet. Ka nau an thahmi cu thuphlo an tummen a si,” tin a sim.
NUG Ruangah Ralhrang In Thu An Suah – NUG cozah in nasaten ralhrang a do ding thu le 2023 rori ah ralhrang do cimit ding thu an suah hnuah ralhrang cun an kuthnuai pawl theih dingmi thu an rak suah ve.
NUG cozah cun kum 1 sungah ralhrang uknak kan cimit dingih 2023 kum cu ralhrang uknak cemral ni a si ding tin thu an rak suah. Cumi ruangah ralhrang pawl cun zokhal nanmah bulpak thu men ah duhduh in khual nan tlawng lo pei, hna thawn a pehparmi lawngah vahsuah sian nan si tin an kuthnuai pawl thu an rak pe ve.
Ralhrang cun October 13 ah an kuhnuai pawl thu an theihtermi a si ih, a hlan bangin casuah in thu an pe ngam nawn lo. Ca an suah asile mipi lakah a darhsal ringring ih, tuitum cu ralhrang hotubik sangtu Soe Win ih thusuak a si tin phone in an sim vivo.
Ralhrang ih thusuak cu hitin a si, “Ralhrang kuthnuai ih hnatuan pohpoh a tul tuk rori ih, khualtlawn a tul tengteng asile kilhimtu ding ralkap lole palik nan theihter hnu lawngah nan vaksuak pei. Bulpak thu ah khual nan tlawng tengteng a tul asile cozah hnatuan nan sinak thup thluh uh. Fawm nan hruh lo pei ih, cozah sinak ca khal nan keng lo ding. Nan phone sung khalah cozah theihttheihnak zianghman nan umter lo pei.
Ralhrang ih thusuak cu Mandalay ih ralhrang bawi Kyaw Kyaw Min in a kuthnuai pawl pakhat khat teih ka sim paih lo ruangah a komkhawm ih a simthei. Cutin, ralhrang thuthup cu mipi lakah a darh lala. Ralhrang cun a tultuk lo ahcun an kuthnaui ih hnatuan pawl khualtlawn an siang nawn lo ih, lo theih lo ih khualtlawn tul cu sinak thup dingin an theihter.
NATO In Ukraine An Bawm Ding – Russia in Ukraine an do reromi ah NATO sungtel ram 4 pawl cun Ukraine hnenah ralthuam cangkang le tha kan lo bawm ding tin thu an tiam ih, a rangthei bikin bawmnak pek an tiam.
Tu ah Russia cun thla 9 sung Ukraine a do zo nan, ram pahnih doawknak remawknak zianghman an nei thei hrih lo ih, a tufang cu an karlak boruak a sosang ciamco sal. Russia in Ukraine khawpi lam an kap ciamco sal ih, Ukraine cun leitlun bomnak an dil.
Cumi ah NATO sungtel ram 4 pawl cun “Tlunzuang in kah nan ton tikah a khamnak ding ralthuam thatha kan lo pe ding, a khamnak lawng siloin tlunzuang raldonak vanzam le Helicopter kahnak tivek khal a tel ding tin an sim. Ukraine bawmtu ding NATO sungtel ram 4 pawl cu UK, Canada, France le Netherlands pawl an si. Tui dihmun ah Germanay cun Ukraine hrang tlunzuang ralthuam khamnak an rak pe zo.
MATo sungtel le ramdang in Ukraine an bom ringring tikah Urkaine khalin theitawkin Russia an do thei ve phah. Tu ah ram pahnih thuhla thawn pehparaw in remawknak zianghman a um thei hrih lo ih, an do aw vivo hrih dingin a lang.
Leave a Reply