Ralhrang In Ramri Kil Ralbawi Hlun 12 An Kosal

Ralhrang In Ralbawi Hlun 12 An Kosal – Ralhrang ralkap cun ramri kil ralkap sinak in rak bawl zo ralbawi hlun 12 pawl cu an hna tuansal dingin an lalut sal ih,ramri kil ralkap thuamthat deuhdeuh an tum tin thu an suah.

Ralhrang thuphuangtu Zaw Min Tun cun “Kan kawhsalmi ralhrang ramri kil bawi hlun pawl hi tathmu dinhmun tiangin hna rak tuan zo pawl an si. A taktak ahcun pension in cawl an silo ih, thildang ruangah rak cawl an si. Tuitum an ra kisal khal anmai thu in rakirsal an si. An sinak kan pek tik khalah ramri kil ralkap pawlih rem tinak in a si,” tin a sim.

Ralhrang ralkap pawl cun Myanmar ram a buai hlan ihsin tlangpar ralthuamkai pawlkom lakin remnak an tuahpi theimi pawl cu ramri kil ralkap sinak an rak pe. Ramri kil ralkap pawl hi ralhrang kuthnuai ih hnatuan an si ih, ralhrang in thlahlawh le an eiin ding pawl an pe thluh nan, Myanmar ralkap cazin ahcun khum an silo.

Karen, Kachin, Rakhine, Tanintaryi le Ayeyarwaddy pawlah ralhrang thawn rem wa ih ramri kil ralkap tuan tlangpar miphun an um ih, ralhrang thawn an tuan tlang hnuhnu cun ralhrang thupek an thlun a tul. Rakhine le Karen ahcun ramri kil ralkap pawlin doawknak ah ralhrang an bawm ringring thlang. Hivek ruangah ralhrang in anmah bawmtu dingah ramri kil ralkap lak bet vivo an tum siko tin thuhla theitu pawl cun an sim.

US In Russia Ralrinnak An Pe – Russia president Putin cun kan ram humhimnak ding a si ahcun a tul asile Nuclear bomb khal kan hmang mai ding tin leitlun an rak theihter zo ih, kan san ah Nuclear ralpi kan tong men ding tin mipi tamzet an thinphang.

Tuitum ah US cun US president Putin ih tongkam an let ve ih, Russia ralrinnak an pe. US cun “Ukraine donak ah Russia in Nuclear bomb an hmang asile kannih US cun Ukraine humhim in Russia kan thungrul hngal ding. Hivek a thlen ahcun Russia in an tuar tuk ding.

“Kannih US cun Ukraine kan bawm vivo dingih, Nuclear doawknak a thlen ahcun a tuartu bik ding cu anmah Russia an si. An ngam Nuclear hmangin Russia cangvai haiseh, kannih US cun kan thungrul ve hngal ding a si,” tin US humhimnak vuanci thuronpetu cun Russia ralrinnak a pe.