Ralhrang In Suh Kyi Kum 23 An Hrem Kim Thlang – Ralhrang ralkap cun September 29 zingah Daw Aung San Suh Kyi hremnak an pe betih, hitin ralhrang cun Daw Aung San Suh Kyi hi kum 23 sung thawngtla dingin hremnak an pe kim thlang.
Tuitum ih Daw Suh Kyi hremnak an pekmi cu amai thuron pakhat Australia rammi Sean Turnell thawn thubuai an neih tlangmi a si ih, Ralhrang ralkap cun Sean Turnell, Daw Suh le NLD vuanci pathum pawl cu kum 3 ciar thawngtla dingin hremnak an pe thar. Rampi thuthup daan vekin ralhrang ralkap pawl cun Sean Turnell, Daw suh Kyi, NLD vuanci Soe Win, Vuanci Set Aung le vuanci Kyaw Win pawl thubuai an rak tuahsak ih, tu ah hremnak bangranten an pe thluh hai.
Ralhrang ralkap cun thubuai 11 hrang kum 20 sung thawngtla dingin Daw Aung San Suh Kyi hremnak an rak pe zo ih, tuitum ah kum 3 dang thawgtla bet dingin Suh Kyi an hrem bet ruangah ralhrang in Daw suh Kyi an hremnak zaten kum 23 a kim.
Danthiam Kyi’ Myint cun “Rampi president hnuah thuneitu pakhat Daw Suh Kyi in rampi hrang hnatuannak ah tin ramdangmi thuron petu ah a sawm ih, rampi hlawh an pe. Ram aiawh ih hnatuan an si tikah thuthup a silo thei lo. Ramdang hnatuan an si ih, daan an pahbal lo. Mah bulpak hlawhnak ah an rak hmang asile thubuai tuahsak an theih ko. Tu cu ramdang hnatuan an si tikah hrem theinak daan an nei lo , an duhduh in daan an fehpi men a si,” tin a sim.
Australia ramdang vuanci cun ralhrang hotu Min Aung Hlaing hnenah Sean Turnell thlah dingin a dil rero zo ih, Min Aung Hlaing cun thlah dingin a rak tiam nan, tuitum ah ralhrang Court cun Sean Turnell hremnak an pe sawn. Sean Turnell cun 2017 kum ihsin Daw Suh Kyi ih sipuazi thuron rak a rak tuan cih ih, ralhrang in rampi thuneihnak an lak veten an kaih hngalmi a rak si ve.
Min Aung Hlaing In A Rak Bum Hai – Tlangpar ralthuamkai pawlkom 10 cun Federal Democracy uknak beisei in avei hnihnak Min Aung Hlaing an tong ih , an be rero nan, Min Aung in a rak bum hai tin amah Min Aung Hlaing cun ralhrang meeting ah a kuthnuai pawl a simthei.
Tlangpar ralthuamkai pawlkom 10 hnen ahcun ralhrang hotu Min Aung Hlaing cun Federal Democracy tiang a pek thei thu a rak tiam hai ih, veikhat ah a fel thluh lo ding nan, kan be aw vivo ding, kan rel vivo dingih a fel mai ding tin a rak tiam hai.
Asina, ralhrang meeting ahcun Min Aung Hlaing cun “Federal Democracy kan titikah anmah tlangpar ralthuamkai pawlih in dilmi rori pek kan tum lo. Federal cu a si ding nan a awm-ang tawk le kanmai siancin lawng pek an si ding. Ziangahtile, NCA hminkhen ih kan nganmi kan theihhngilh men thei lo ih, 2008 daan hrampi khal kan hlon men thei lo.
“Curuangah tlangpar ralthuamkai pawlih in dilmi cu an hnenah rampi hrilawknak tuah pitlin thei dingin in bawm uhla hlutdaw palai kan neih felfai thei tikah hlutdaw ah kan rel peh ding tin ka sim hai zo. Anmah tlangpar ralthuamkai pawl khal an lungrual lo tukih anmah khat le khat buainak an nei tampi a si,” tin Min Aung HLaing cun a kuthnuai pawl a simthei.
U Than Naing cun “Ralhrang in 2008 daan hrampi bal ding cu a duh dah lo ding. Cun, khatlam ah tlangpar ralthuamkai pawlin NUG le CRPH an biak ding phangah an rak leem ih, an be kual rero men in a lang. Culo dangih thil um thei cu ralhrang in hrilawknak tuah pitlin an duhmi ah tlangpar ralthuamkai pawl an tlon men khal a si thei. A rak sim hai bangin a tuahsak cuang lo ding timi cu theih cia a si,” tin a hmuhdan a rel ve.
Ralhrang ralkap hotu Min Aung Hlaing in tlangpar ralthuamkai hotu pawl ka tong duh a ti tikah NCA hminkhen ngan tlangpar ralthuamkai pawlkom 7 le CNA hminkhen ngan lo tlangpar ralthuamkai pawlkom 3 , an zaten tlangpar ralthuamkai pawlkom 10 cun Min Aung Hlaing an bia ih, an duhmi an relpi.
KIA, KNU, KNPP, CNF, AA, MNDAA le TNLA pawl cun ralhrang hotu Min Aung HLaing an be duh lo ih, an umnak hmun ciar ah Min Aung Hlaing ih kuthnuai pawl thawn an do aw rero men.
Russia in a tlun hnuah Min Aung Hlaing khal reizet a khum aw lawk nan, September 29 cun a vaksuak ngam thlangih, Mandalay khawpi ah a feh. Asinan, Min Aung Hlaing a tihtan tuk ruangah September 28 ihsin Mandalay hmun tinkim ah ralhrang pawl an khat thluh zo tin mipi lam cun an sim.
Mandalay ih sumdawng pakhat cun “Zinglamah Min Aung HLaing le a kuthnuai pawl an thlengih, cetzung pawl zohfelnak an nei. Cumi hnuah sumdawng milian pawl an bia. Zinglam nazi 8 hrawngah phurang an hal. Min Aung Hlaing ih fehnak ding hmun cu a hlankhan in ralhrang pawlin bomb thianfainak an nei hmaisa. Hivek hmuh tikah Min Aung Hlaing thih a tih tuk lai in a lang. Min Aung Hlaing in Mandalay a suahsan hlansung cu ralhrang pawl Mandalay ah an khat hrih ding,” tin a sim.
Leave a Reply