Ralhrang In Thailand le China Hnenin $800 Million An Ngah

Ralhrang In Thailand le China Hnenin $800 Million An Ngah – Ralhrang ralkap cun Thailand le China ram sungih yinan le Gas an zuarmi hmangin $800million an ngah thu mipi theihternak an nei.

Ralhrang ralkap cun “April thla in July thla tiang Thailand le China hnenih yinan le Gas kan zuarmi hmangin $800million kan ngah. Tuitum ih kan ngahmi cu kan dung kum ih kan ngahmi hnakin a tamsawn a si,” tin an cahnah thuthang ah an suah.

Ralhrang ralkap cun Myanmar ram sungin yinan, gas le lung mankhung phunphun cu Thailand le China hnenah an zuar peh ringring. Gas le yinan tla cu Myanmar in Thailand le China ah pipe in an fehter ih, lung mankhung thilri dang cu anmah ralhrang compay in an thuammawi hnuah an zuar sawng theu.

Ralhrang ralkap ih sumpai lakluhnak thabik ih an relmi khal yinan, gas le lung mankhung pawl an si. Hivek cu Myanmar mipi rinpi ringringtu US khalin zoh har an ti tukih, Thailand le China cu ralhrang tuanpi lo dingin theitawk an sawm rero zo nan, Thailand le China cun ralhrang pawl an tuanpi peh ringring lai.

China in Myanmar ram a buai veten thil tampi ah ralhrang an tuanpi ih, hlawknak tampi rak tel an tum. Cucu, Myanmar ramri India in a rak hmuh tikah China kutsung ih Myanmar a tlak thluh ding an duh lo ih, China elnak ah ralhrang an tuanpi ve. India cozah le ralhrang khal tuantlangnak hngetzet nei an si.

Tu ahcun Mizoram lamih rittheihsi lut tam tuk ruangah himi hmangin India cozah cun Mizoram sungih Myanmar raltlan pawl dawitlung thluh dingin a nor rero phah. Tuhrih tiang ahcun Mizoram cozah in India cozahpi ih nornak an rak el rero ve hrih. Asinan, Myanmar lamin Mizoram ah rittheihsi a lut tam deuhdeuh asile Mizoram cozah khalin India cozahpi nornak an tuar ringring thei lo men ding tin’ thenkhat cun an sim.

New Delhi ih um Myanmar raltlan pawl khal India cozah in ralhrang cozah an tuanpi ruangah ram thumnak an feh thei nawn lo ih, India cozah cun Myanmar raltlan pawl ramdang feh theinak le India ram suahsan theinak Exit permit a pe duh nawn lo. Cumi tlunah New Delhi ih thleng Myanmar raltlan pawl khal card takta pek an silo ih, temporary card lawng pek an si. Temporary card in ramdang a feh theih lo.

Ralhrang in ralthuam rinsan in rampi thuneihnak an lak tikah ziangkim ah Myanmar ram a tlase sia ih, mipi an harsa. Hivek dinhmun ah China, Russia, India le Thailand ram pawl cun ralhrang hnenin hlawknak rak tel an tum ciamco ve ih, ralhrang tuanpi pawl an si.

Yangon Ah Siti lei An Cuh Aw – Kan ram Myanmar buainak ruangah mi tampi hna nei lo, ei ding harsa tampi an um zo ih, cuvek caan ah ramsung thilri man khal nasaten an kai.

Yangon farah vengah nikhat veikhat rawl ei um zo ih, rawl zemmi bawh khal tampi an um. Phungki tlawngih rawl zemmi bawh le pawlkom ih rawl zemmi bawh tivek an tam. Tu ahcun siti lakih siti man olbik sa-ungsi lei cuh aw in an tlan hnenhnen.

Hmundang ahcun sa-ungsi cuaikhat ah thawng 12 a man zo ih, Yangon ah pawlom pawlin cuaikhat thawng 5 in an zuar. Thang 5 ih sa-ungsi an zuarmi cu lei dingin an cuh aw ciamco ih, cumi ah lei ngah lo tampi an rak um vivo.

Siti lei dingih ngahtu pakhat cun “Zinglam nazi 6 hrawngah siti zuar ding pawl an ra thlengih, a hmun kan va thlen ve tikah lei dingin a rak tlar aw thluh zo. Tlarnak ding hmun cuhawk ciamco a ttul ih, sa-ungsi siti lei ding cun kan el aw ciamco. Lei dingih tlar lakah colo tampi kan um bet. Siti lakah sa-ungsi hi tha lo bik an timi a si ih, cukhal hitluk in lei kan cuh aw zo a si,” tin a sim.

Russia in Ralkap An La Bet Tum – Russia cun kum khat sungah vei 2 ralkap an lak luh theumi cu zamrang thei bikin tuah hngal dingah Russia president Putin cun thu a suah ih, ralkap thar rampi lakluh an tum.

Russia in ralkap thar tampi lakluh an tumnak san cu Ukraine lamih kuat an duh ruangah siko ding tin thenkhat cun an sim. Russia cun April thla le October thla karlak ah ralkap thar an lalut theu.

Russia cun an ram daan ah kum 18 in kum 27 karlak cu kum khat tal ralkap tuan tengteng ding timi daan an nei ve nan, damlonak le tlangkai buainak ruangah kum 1 sung ralkap lut ding timi cu mino tampi in an hrial thei. Tuitum cu kum 1 hrang ralkap tuan dingih thupek siloin ralkap hnget dingin ralkap tampi lak bet an tum.

Russia cun ting 20 hrawng ralkap neih an tum ih, cumi lakah ting 11 hrawng cu raldotu ah hman an tum. 2018 kumah Russia cun ralkap ting 19 an rak nei ih, cumi lakin ralkap ting 10 pawl cu leihnuai raldotu dingah an rak hmang tin hminsin a um. Curuangah, Russia in ralkap ting 1 hrawng lakbet an tumin a lang. Russia in Ukraine an do hlanah Contract ih an lakmi ralkap ting 4 an rak nei cia ih, cumi lakah ting 1 le thawng 40 cu leihnuai ralkap an si. Asinan, thenkhat cun ram pakhat ih ralkap neihzat cekci tarlang a si dah lo ih, cuhnakin a tam thei , amal thei tin an sim ve.

Be the first to comment

Leave a Reply

Your email address will not be published.


*