Ralhrang In Thawnginn Ihsin Daw Suh Țhawnsuak An Tum Lo

Falam Ah Mino Pahnih In Bomb An Palpuak Ngah – Chin ramkulh Falam peng Valung khuami mino pahnih cu June 30 ah bike in an suak ih, bomb an palpuak ngah.

Salai Van Lian Uk le Salai Peter Dim Lian Sang ( kum 22 ) cu an khua in Zawnglei lamah an feh ih, lamlak ah lamzin ih kammi bomb an palpuak ngah. A hmunah Salai Peter Dim Lian Sang sawn a thi ih, Salai Van Liak Uk khal hriamhma a ngah.

Khuami pakhat cun “Kalay lamin ralhrang mawtaw 26 hrawng Chinram lam an rat tikah khuami pawl cu kan tih ih hmunhim kan rak pan cia. Annih pahnih cu rualpi hnenah kan leng ding tin kiangkap khua ah feh an tum. An feh hnu reilo ah bomb puak awn kan thei cih.

“Cuveten kan khuami an siko ding tin thinlung ah a um cih ih, kan va pan tikah kan khua mino pahnih an rak si ngaingai. Pakhat sawn a hmunah a nunnak a cem cih ih, a dang pakhat sawn khal hriamhma a ngah. Ralhrang pawl khal kan khua kiangkap an thleng thlang dingih, um a nuam lo ngaingai,” tin a sim.

Kalaymyo in Chin ramkulh saklam pan ralhrang pawl cu Valung thlen hlan Zawngkong khua ah an cawl ih, hrekkhat cu ke in hramlak zin an zawh tin khuami pawl cun an sim.

Ralhrang ralkap pawl Kalaymyo in Chin ramkulh an pan tikah mipi ralkap CNDF cun zokhal Kalay le Falam karlak lamzin zawh hrih lo dingin thu an rak than rero zo.

Falam Ah Ralhrang In NLD Kor Hruh An Vel – Chin ramkulh Falam khawpi ah ralhrang ralkap cun mibanglo pakhat cu NLD kor a hruh ruangah an vel ih,nun an sim tin Falam ih umpawl cun an sim.

July 1 zinglam ah Falam ih ralhrang le palik pawl cu Falam luhnak purang kiangah lamzin sukso vak pawl an cek ih, cumi ah mibanglo pakhat Aa Ek timi khal NLD kor hruh in a rak vah ve. Cucu ralhrang pawlin an hmuh tikah “Ziangah NLD kor na hruh” tin an vel ih,an vuak ih, nun an sim.

Mit hmutu pakhat cun “Ralhrang pawl rapthlakzia cu mibanglo rori khal an zuah lo. Ralhrang in NLD an hua tukih, NLD thuamhaw hrimhrim an duh lo timi khal mipi cun kan thei ko. Asinan, mibanglo cun cuvek a thei lo ih, san khal um loin NLD kor a rak hruh menmi a si,” tin a sim.

Ralhrang ralkap in rampi thuneihnak an laknak san ah NLD vote dik lo an puh ih, rampi thuneihnak an lak hnuah NLD party sungtel le tantu pawl an kai ih, an thahmi khal a tam zo.

Tahan Ah Wifi Box An Urkang – Sagaing ramthen Kalaymyo Tahan veng ,YCW bulpak tlawng kiangkap ah meisa banih an retmi mytel Wifi Box pawl urkang a si.

July 1, zinglam nazi 3 hrawngah mibur hrekkhat cun YCW kiangkap ih meisa banih an retmi Wifi box 5 hrawng an urkang vivo. Cucu, kiangkap venghnen pawlin an theih tikah zamrangten an mit ih, a tlunlam meisa hri pawl cu a kangkai loin an rel.

Asinan, July 1 sun ah Tahan veng hrekkhat in meisa an ngah lo tikah meisa ban ih wifi box pawl urkang a simi ah meisa hri hrekkhat a rak kang man sipei maw titu an um.

Tahan ih um pakhat cun “Meisa hri an urkang tummi cu a si hmel lo. Meisa ban ih wifi box pawl an urkang in a lang. Ziangahtile, Mytel Wifi a si tikah ralhrang sumpai lakluhnak cikhat a si ve. Himi ruangah Tahan veng hmun hrekkhat ah wifi hmang thei lo an tam,” tin a sim.

Tamu Ah Chinmi Ruang An Sar – Sagaing ramthen Tamu myone Jalenphai khua ah ruang pakhat sar a si ih, Chinmi Thang Gin Hao a si.

Thang Gin Hao cu June 30 zan ah leng a suak ih, inn tin ti a nei nawn lo. July 1 zingah khuami pawl cun lamzin ah ruang an hmu ih, a lu le taksa dangah hriamhma a um. An zohfel tikah an khuami Thang Gin Hao a rak si.

Tutiang cu zoin an that, ziangruangah timi felfai in theih a si hrih lo nan, Jalenphai khua dunglam ah ralhrang ralhrang ralkap le Pyu Saw Htee pawl umhmun khuarnak a um.

Khuami pakhat cun “Tuvek dinhmun ah thim hnu hrimhrim cun vahsuah lo a him bik. Ziangahtile, lamlak ah ralhrang pawl tong pang sehla mi an kai ih, PDF siter rori mi an puh hnuah olsamten mi nunnak an la men.

“Ruang ka sarmi thuhla khalah mipi ralkap lam cu an si thei lo. Kan khua kiangih ralhrang pawl an um tikah anmah ralhrang pawl an si rori ding tin kan zum. Ziangahtile, anmah lo cu puh ding an um lo a si,” tin a sim.

Ralhrang In Vanzam In Anmah Lam Bomb An Thlak That – Karen ramkulh Myawaddy myone wawlay hmunram ih ralhrang sakhan cuhawknak cu ni 6 hnu khalah a fel thei hrih lo ih, sakhan cuh aw in nasaten an do aw lai.

Doawknak ah khatlam khatlam in thi an um rero zo ih, KNU lam pholang dan vek asile ralhrang thi an tam tuk zo. KNU cun lamzin tluanih ralhrang thi teptep pawl an pholang zo ih, tuitum ah ralhrang in vanzam in bomb an thlakmi ah anmah ralhrang pawl an thlak ngah ih,cumi ruangah ralhrang thi pawl cu KNU lamin mipi hmuhah an pholang hrih.

KNU ralkap KNDO pawl ih video thlahmi cu mithi an tam tuk tlunah thihnai a khat thluh ih, Facebook le youtube lamin an hlonsak thung. Asinan, mipi tampi in an rak zoh man ih, ralhrang thi lakah KNLA le KNDO pawl tanhmun khuarin ralhrang dang pawl an do bet ciamco.

Sakhan an cuhawkmi cu zoin a co tikhal a fel thei hrih lo ih, ralhrang lam cun an sakhan ngahsal rori tumin raldonak vanzam tiang an hmang. Ralhrang in vanzam an hman caan ah KNU ralkap pawl an relh theu ih, an him phah ringring. Leihnuai doawknak ahcun ralhrang pawl an dinhmun a setuk zo nan, tlunlam ralhrang hotu pawl cun an sakhan hunhim duh ah ralhrang dang an kuat bet rero. Cumi ruangah ni 6 sung doaw thlang an si.

KNDO ralkap VENOM Commando cun “Upatmi nulepa unaulenau pawl kanlam in ram le miphun hrang nunnak hlantu an um nan, miraltha tampi dam le hrisel zetin kan um ko timi kan lo theihter duh. Nungdam lai ralhrang pawl khal ruahnak felfai nei uhla fim phah ko uh. Ralhrang thi pawl hrang khal kan riahse ve ko. Asinan, kannih cu nannih ralhrang pawl vekin tummi nei lo ih,mithat kan silo,ram le mipi hrang kan ral pawl that kan si,” tin thu an suah.

July 1 tiangah sakhan cuh aw in an do aw hrih ih, ralhrang thuphuangtu Zaw Min Tun khalin Karen ramkulh ih kan sakhan cuhawkmi cu kan tlansan fel hrih lamlam lo, kan sakhan a si ih, kan humhim vivo ding a si tin Media pawl a simthei ve.

Ralhrang In Thawnginn Ihsin Daw Suh Țhawnsuak An Tum Lo – Ralhrang ralkap in Daw Aung San Suh Kyi thawnginn ih an khum hnuah ASEAN palai cun ralhrang hnenah Daw Suh Kyi cu amai inn ah kiltu nei in retsal dingin an dil nan, ralhrang cun thawnginn sungin hmundang ah Daw Suh thawnsal an tum lo thu an sim.

July 1 ah ralhrang cun media pawl kokhawm in thusuhnak caan an tuah ih, cumi ahcun media pawlin ASEAN palai ih dilnak vekin Daw Suh Kyi ih umnak tthawn nan tum maw tin an sut. Cucu, ralhrang thuphuangtu Zaw Min Tun in a let.

Zaw Min Tun cun “Rampi thuron hlun Daw Aung San Suh Kyi thawn pehpar aw in thu kan rel theumi cu a hnget a si ih, a hmun ringring ding. Daan tlunah zohman an um lo. Daw Aung San Suh Kyi thawnginn ih kan khum caan khalah a harhdamnak le eiin ding cu thaten kan rawlrel sak ko.

“Thawnginn sungih kan khum tikah a hrang Court feh khal a ol phah ih, thawnginn sungih Court ah a thuhla rel peh a si ding. Thubuai nei a si ruangah ramdang palai zohman kan beter thei lo ih, a umnak hmun khal kan thawnsal lo ding a si,” tin a sim.

Ralhang ralkap cun Daw Suh Kyi cu an rak kai rero zo nan, thawnginn sungah caan reipi an khum dah lo ih , a innpi ah kiltu nei in an ret tlangpi. Asinan, tuitum ahcun Min Aung Hlaing thupek vekin Daw Suh Kyi cu Naypidaw thawnginn sungah khum zo a si ih, ralhrang lam cun thlah zalen maimai an tum nawn lo.

N.Korea In Covid 19 Thu Ah S.Korea An Mawhthluk – Ramdang in covid 19 natnak an do neh rero hnuah N.Korea cun 2022 kum sungah nasaten covid 19 natnak an tuar ih, cucu S.Korea ruangah a si tin an mawhthluk bet.

N.Korea cun “Kan ram sungih covid 19 natnak a luh dan cu S.Korea lamin kan ram sungah thilri a lutih, ramri ih umpawl in fimkhur lo zetin an rak tham. Cumi ihsin kan ram sungah covid 19 natnak a darh ciamco. April thla ah ramri ih kan ralkap cun S.Korea lamih thilri luat a thamih ,a fa 5 mi cu covid 19 natnak in a buai cih. Cutin, kan ram sungah covid 19 natnak a darh. Curuangah, S.Korea lamin kan ram sungih thilri lut hrimhrim cu humhimnak um lo cun tham lo ding kan si,” tin an ram mipi pawl an theihter.

S.Korea mino hrekkhat pawl cun ram pahnih remawknak um dingin kum tinten N.Korea lamah bomnak thilri an kuat ringring. Cucu, minungpi duhdawt zangfah lainatnak ruangah tuah an si ih, N.Korea lamin covid 19 natnak phurtu tin an puh tikah an ningna tuk. S.Korea lam cun N.Korea ih puhnak cu atthlakza,thilcang thei lo a si tin an let ve.