Ralhrang ralkap cun ram buai hnuih an kaihmi mi 4 pawl cu mithat thubuai an orhter hnuah thihdan an pek zo bangin a takih an thlaithat zo thu casuah in mipi theihternak an nei.
Ralhrang ih thlaithatmi mi 4 pawl cu NLD palai Phyo Zeya Thaw , 88 tlawngta hotu hlun Jimmy , Hla Myo Aung le Aung Thura Zaw pawl an si. Ralhrang ralkap cun mi 4 pawl cu mithat thubuai ruangah June 3,2022 ah thihan an rak pe zo ih, July 23, 2022 ah a takin an thlaithat thu ramsung cahnah thuthang an neihmi hmangin July 25 zingah mipi theihternak an nei.
Ralhrang ralkap cun “March thla ihsin ramsung buainak ah Pyo Zeya Thawn, Jimmy , Hla Myo Aung le Aung Thura Zaw pawl cun duhduh in mi an that ih, dankalh pawlkom an zom hnuah ralthuam hmangin an cangvai ciamco. Hivek pawl cu anmah khalin Court sungah an phuang aw zo. Curuangah sual an tuahmi pawl cu thaten zohfel le cek a si ih, sual an tuah ngaingai timi a fiang ruangah an pali in thihdan pek an si ih, tu ahcun an pali in hremnak kan pek bangin thlaithat fel zo an si,” tin thu an suah.
Ralhrang ralkap cun July 23, 2022 ah thihdan an pekmi mi 4 pawl cu an sungte pawl thawn online in biakawknak caan an rak pe. Cucu, an caan netabik a si ding tin zohman in an rak ruat ban lo. Cumi hnuah ralhrang ralkap cun thih dan an pekmi mi 4 pawl a takih an thlai that thu Cimung thuthang ah an suah.
NLD palai Phyo Zeya Thaw le 88 tlawngta hotu hlun Jimmy tei pahnih cu Yangon ih an umnak inn ah ralhrang ralkap pawlin ralthuam thawn 2021, November thla ah an rak kai ngah ih, an kaih hnuah mithat thubuai, ralthuam thawn cangvai, dankalh pawlkom zom tivek in thubuai tampi an orhter. Midang pahnih cu Yangon Hlaing taya vengih ralhrang le dalan pawl thattu ah puh ih kaihmi an si.
Ralhrang thuphuangtu Zaw Min Tun cun “Thuthang ah mipi theihternak ca kan suah zo ih, relfiang ciamco a tul in ka thei lo. Curuangah, media pawl kokhawm ih thuhla relfiangnak kan neih theumi khalah kan relfiang cuang lo ding. Daan vekin hremnak kan pekmi an si ih, hremnak kan pek bangin daan vekin kan tuahmi a si,” tin a sim.
Insein thawnginn kiangih um pakhat cun “Ni 2 sung a si zo, thawnginn ih hnatuan pawl khal leng an suak lo ih, lenglammi pawl khal thawnginn sungah zohman luh an siang lo. Thawnginn sungah thihdan an pek bangin thlaithatmi an um rori tin thuhla kan thei. Kan dungah thihdan pekmi le an innsang pawl an rak beawter ih,cucu an caan netabik hrang a si tin thuhla a suak. Thawnginn sung ihsin cun ziang thu hman an suakter lo ih, ralhrang thuthang hmangin mipi an theihtermi a si,” tin a sim.
Jimmy sungte pakhat cun “Ziangtik ni ciah ah an thlaithat, khawitawk hmunah an thlaithat timi cu Insein thawnginn kiltu in a rel duh lo. Asinan, an thlaithat zo tin in sim. An thlaithat ding thu khal sungte pawl simtheih cianak a um lo. Thlaithatmi pawl ih ruak khal lak an siang lo ih, thlaithatmi hrimhrim cu ziangvek daan khalin ruak lak a siang lo tin Insein thawnginn kiltu cun in sim. Curuangah, a ruak ngah lo cun ruak vuinak khal tuah kan tum hrih lo a si,” tin mipi a simthi.
Daanthiam pakhat cun “Daan vekin mipi hriltlin an silo tikah hivek in thihdan pekmi a takih thlaithat theinak an nei lo. Ziangahtile, thihdan pekmi hrimhrim cu rampi president hnenah dilnak neih bet ding a si ih, kannih Myanmar cun mipi hrilmi president khal kan nei lo. Cun, ramsung Court ih thuthentu pawl khal anmai duhdan in zianghman thu an then ngam nawn lo ih, ralhrang thuthu in an um zo. Tu ahcun thihdan an pe ih, an thlaithat cih hngal men ih, daan mumal khal an nei lo a si,” tin a sim.
Dothlengnak hotu pakhat cun “Thil umdan zoh rero tikah ralhrang pawl cun zohman kan tih lo timi an pholang sibik ko. Mi 4 thihdan an pek caan ah ramleng siseh ramsung khalin nasaten ralhrang thusuahmi an rak dokalh ih ,ralhrang cu a takin thihdan pekmi pawl that lo dingin an rak dil. Asinan, tu ahcun ralhrang in ramsung mipi siseh ramleng dilnak khal ziangah an siar lo ih, an duhduh in an cangvai men.
“Hivek pawl zoh tikah kan ram boruak cu a se deuhdeuh tinak a si ih, mipi in nehnak kan co lo asile kan ram dinhmun cu ruah ngam ding ci khal a silo. Kan ram boruak cu a se vivo dingih, letlun ah umnak tha lo ram tihnung bik khal kan si leh ding. Curuangah, theitawk suah in dothlengnak tuah rero kan si,” tin a sim.
NUG humhimnak vuanci Yemon cun “Min Aung Hlaing hremnak kan pek thei hlansung cu dothlengnak a tawp hrih lo tinak a si. Zianghman rel ding nei lo khopin leitlun san a cem hlan sung cu kan do vivo ding a si,” tin a sim.
KIA hotu pakhat Gun Maw cun “Ralhrang in thu an suah bangin mi 4 pawl an thlaithat taktak a si ahcun an sualralzia pholangnak a si ih, anmah ralhrang ngaithiam tumtu pawl khal dung an sip thluh phah ding. Thilsual kan tuah tikah thungrulnak a um ringring a si,” tin a sim ve.
Remdaihnak pawlkom PPST cun “Thungai a sipei maw tin zingzoinak nasaten kan nei rero lai. Ralhrang pawlin Tuah taktak sehla ramleng le ramsung mipi in ziangtin an tuar ding timi zohsinnak an nei khal a si thei. Thungai a si ahcun anmah ralhrang pawl khal an tuar rori dingih, dokalh ding hrimhrim a si. Ralhrang in mipi hrinhronak ah thu an suah hrim men sipei maw tikhal fimkhur tul zet a si ve,” tin an sim.
Mi tamzet khalin ralhrang thusuahmi cu hngah hrih deuh a tul ding, mipi in bum sipei maw titu khal an um ve. Asinan, hrekkhat cun thuthang cahnah ih an suah zomi a si ih, Zaw Min Tun tongkam zoh tikah ralhrang pawlin an that taktak zo siko. Zokhal tih kan nei lo timi an langter sawn si ding tin simtu khal an um ve.
Ralhrang ralkap cun 1976 kum ah tlawngta hotu Salai Tin Maung Oo cu anmah dokalh tin hridai in an rak thlaithat zo ih, 1948 kum khalah Bochuk Aung San rak thattu pawl an thlaithat bet. Cumi hnuah ralhrang in anmah dokalhtu ih an puhmi mi 4 pawl thihdan an pek hnuah a takin 2022, July 23 ah an that ih, midang thihdan an pekmi khal tampi an um.
Ralhrang ralkap in rampi thuneihnak an lak hnuah anmah dokalhtu ti ih an kaihmi lakin thihdan an pekmi 60 tlun an um zo ih, damsung thawngtla dingin hremnak an pekmi khal an tam. Thihdan an pekmi mi 60 tlunah mi 4 pawl cu a takin an thlaithat zo thu mipi an simtheihmi a si.
Leave a Reply