Ralhrang ralkap cun Shan ralkap SSPP fawm thawn zuk aw Thinzar Wint Kyaw cu Shan ramkulh Waihaing in Lasio a pannak lamzin ah an kai ih, a sungte pawlin an be thei hrih lo.
Thinzar Wint Kyaw cu Shan ralkap pakhat SSPP cangvaihnak zuknung ah a tel ih, SSPP fawm thawn lem a cang. Lem an can ni July 4 ah SSPP ralbawi ih fanu pasal neih puai ah SSPP fawm thawn a tel cih. Cucu, ralhrang tantu pawlin an rak hmu thei lo ih, ralhrang pawl cu Thinzar Wint kai dingin an forh ciamco.
Ralhrang pawl khal anmah tantu pawl ih forhnak an lung huaiho ih, Thinzar Wint Kyaw cu a tlunnak lamzin ah an rak kai. Ralhrang in Thinzar Wint Kyaw an kai timi cu a dik rori ko, a suah theinak dingah theitawk kan zuam rero lai a si tin SSPP cun mipi an simthei.
Thinzar Wint Kyaw in SSPP hrang lem a canmi ah Politics thu zianghman a tel lo ti’n amah siseh SSPP khalin mipi simfiangnak an rak nei rero nan, SSPP cu tlangpar ralthuamkai pakhat an si ruangah dankalh thotho a si tin ralhrang tantu pawl cun Thinzar Wint Kyaw sual an puh.
Tu ah ralhrang in khawitawk ah Thinzar Wint Kyaw an ret tikhal theih a silo ih, a sungte pawl khalin an be thei lo. SSPP lam cun ralhrang ralkap pawl an be rero ih, Thinzar Wint Kyaw thlah dingin an dil rero ve.
SSPP thuphuangtu cun “Lemcang pakhat a si vekin kan ram thatsohnak ding hrang zuknung kan tuah ih ,cumi ah lem in cansak dingin kan bia. Ziang Politic khal a tel lo. Lemcan theh veten mopuai kan sawmnak ah a feh cih ih, thuamhawn thleng mannak can a nei lo. Hivek men ruangah ralhrang pawlin an kai timi cu a san khal kan thei lo. Lemcangthiam an si ih, lemcang dingin sawm theih ringring an siko. A luat theinak hrang theitawk kan zuam rero a si,” tin a sim.
Australia In Tilian An Tuar Ve – A tufang Asia hmun hrekkhat ah ram tamzet cun tilian an tuar ih, mipi tampi cu tilian ruangah umnak hmun nei lo an tam.
Australia khawpi pakhat Sydney khalah tuikum sung lawngah tilian vei 3 an tuar thlangih mipi thawng 50 tlun cu an umnak hmun tthawnsak an si. Ruahcen ruangah tilik thotho a si ih, tilik ruangah inn tampi a pil meisa a vang thei nawn lo.
Australia rampi huapin tui kum sungih tilian ruangah mi 20 tlun an thi zo ih, mi tampi umnak hmun nei loin an inn suahsan an tam. Greater Sydney ahcun an umnak hmun suahsan dingin thu an suah zo ih, tilian ruangah lo tampi khal a siat zo.
Central China khalin ruahcen ruangah tilian an tuar ve ih, mi tampi hmunhim ah an tthawn ve. China khal kum tinten fur caan ah buai ve ringring an si. China hi buainak tlangpi cu tiva ih cet an bun tam tuk ruangah ruah a cen cun tiva a khat cih ih, khawpi sungah olsamten tidai a lut khat cih hngal theu.
India ram khalah ruahcen ruangah tilian le leimin in an buai peh hrih ih, mithi tampi an um zo. India ahcun Assam le Manipur in tilian le leimin an tuar. Tilian le leimin ruangah mi tampi cun an inn le lo an suahsan ih, an himnak ding hmuah an beu cio hrih. India cozah cun Assam tilian ruangih harsa pawl theitawk an buaipi thu mipi an theihter ve.
Leave a Reply