Ralhrang In Thuneihnak Thla 6 An La Bet

Ralhrang In Thuneihnak Thla 6 An La Bet – Ralhrang ralkap cun rampi thuneihnak an lakmi thla 6 an tthansal thu mipi theihternak an nei ih, thla 6 a kim tikah rampi hrilawknak kan tuah ding tin thu an suah.

Ralhrang ralkap pawl cu July 31 ah meeting an nei ih, cumi ahcun thuneihnak an lakmi thla 6 tthansal dingin thu an relcat. Thu an relcatmi cu mipi theihternak an nei cih.

Daan hrampi umdan vek asile rampi a buai a si ahcun president in kum 2 sung thuneihnak ralkap kutah a pa thei ih, kum 1 hnuah thla 6 vei hnih thuneihnak an tthan bet asile kum 2 a kim fel ding. Ralhrang ralkap cun 2021 February 1 ah rampi thuneihnak an la ih, 2022 February 1 ah rampi thuneihnak lakmi kum 1 a kim fel.

Cumi ruangah ralhrang ralkap cun thla 6 sung rampi thuneihnak an lakmi an rak tthan zo ih, 2022 August thlacem cun rampi thuneihnak an lakmi thla 6 an tthanbet salmi a cem ding ruangah ralhrang ralkap cun August thlacem hlanah rampi thuneihnak an lakmi thla 6 an thanbet sal lala ih, thuneihnak an lakmi cu 2023 February 1 ah a cem ding.

Ralhrang ralkap cun thuneihnak kan lakmi a cemfel asile rampi hrilawknak timtuah caan le rampi hrilawknak hrang thla 6 dang caan a duh dingih, 2023 August thla ahcun rampi hrilawknak kan tuahfel thei ko ding. Cumi ahcun nehnak cotu hnenah thuneihnak hlanfel ding a si tin an sim.

Asinan, ralhrang ih thusuahmi cu CRPH, NUG, NLD le ram mipi pawl cun an zum lo ih, ralhrang tuahmi hrilawknak khal diknak a um lo ding, anmai party nehnak an co theinak ding le Min Aung Hlaing president a si theinak hrang an tawlrel cia ko ding tin an sim.

Ralhrang ralkap in rampi thuneihnak an lak dingah president U Win Myint an rak kai ih, president bawmtu Myint Shwe cu president sinak an pe. Cumi hnuah President sinak an pekmi Myint Shwe cun rampi thuneihnak cu ralhrang hnenah a rak hlan. Cutin, ralhrang cun rampi thuneihnak rak la an si.

Tamu Pyu Saw Htee In Mi Pakhat An Kap That – Sagaing ramthen Tamu khua ih um Pyu Saw Htee pawl cun July 31 ah lettama hnatuan Myint Maung ( kum 40 ) an kai ih, hmundang ih an hruai hnuah an kap that.

Tamu Pyu Saw Htee pawl cun Myint Maung an kaih hnuah Pahe lilawn lamah an hruai ih, thusut phah in an hrem ciamco hnuah an kap that. Pyu Saw Htee pawlih kah thatmi U Myint Maung ih ruang cu an kah thatnak hmun Pahe Lilawn ah an tanta men.

Tamu ih um pakhat cun “Ziangruangah Pyu Saw Htee pawlin U Myint Maung an that timi a san kan thei lo. Cangthei ih lang cu PDF pawl na bawm, na pehtlaih tin an puh siko ding. Culo cu ziangruangah an that timi a ruah ngaihsak kan thei lo.

“Tamu ah Pyu Saw Htee pawl an sual ngaingai ih, ralhrang pawl thawn nasaten an tuantlang. Kan dung khalah Tamu Pyu Saw Htee pawl cun India rammi pahnih an rak kap that zo nan, tutiang India rammi pahnih thih thu ah Tamu Pyu Saw Htee pawl cu kaih an silo ih, hremnak pekmi khal an um lo. Ralhrang ralkap le India cozah in thupten remawknak an tuah aw men in a lang. Hivek a si tikah Pyu Saw Htee pawl hro an suang deuhdeuh, an pawr deuhdeuh a si,” tin a sim.

Ralhrang In Helicopter In Mipi An Kap – Ralhrang ralkap cun Sagaing ramthen Ayada myone le Minmoe myone karlak ih khua pawl cu August 1, zinglam nazi 11:40 hrawngah Helicopter in a kap ih, mipi hrekkhat khua sungih hrantang khal an umlai tin an sim.

Ayadaw PDF cun “Mungzua in ralhrang Helicopter 2 a zamsuak ih,Ta-Hti-Kung ah ralhrang hrekkhat an ttum hmaisa. Cumi hnuah Letpancin’ khua le Ta-Hti-kung khua cu Helicopter in an kap. Khua sungah mipi hrekkhat hrantang an umlai.

“Ralhrang Helicopter in hnuailam ih ralhrang a tthummi pawl cu mipum 80 hrawng an si ih, Letpancin khua le Ta-Hti-kung khua an luhcilh thok tin kiangkap um pawl cun an sim. Doawknak zianghman a um lo nan, hivek in ralhrang pawl an cangvaih tikah dalan hektu um sipei maw tin kan ruat. Culo cu a ngaihnak kan thei lo,” tin a sim.

Ralhrang ralkap in rampi thuneihnak an lak hnuah ramsung hmun tinkim in ralhrang uknak do a si ih, Sagaing ramthen sungah doawknak a sosang bik. Curuangah ralhrang khalin Sagaing ramthen sung mipi ralkap donak ah raldonak vanzam le Helicopter tiang an hman phah.

Min Aung Hlaing A Phuang Aw – Ralhrang ralkap hotu Min Aung Hlaing cun ASEAN thawn remnak kan tuahmi 5 kan pitlin lo ngai tin a phuangaw ih, pitlin sal dingin theitawk kan suah ding tin mipi a simthei.

Ralhrang ralkap in rampi thuneihnak an lak hnuah ASEAN hruaitu pawl cun Min Aung Hlaing an rak ko ih, remnak 5 an tuahpi. Remnak 5 an tuahpimi ahcun ralhrang in mipi lakah ralthuam an hmang lo ding, Rampi hrilawknak tuah ding, Myanmar ah zalen zetin ASEAN palai a feh thei ding, ASEAN palai in a duhmi hruaitu a tong thei ding, ramsung harsa bomnak ah harsatnak nan pe lo ding tivek pawl a tel.

ASEAN le ralhrang in remnak an tuah hnuah ralhrang cun remnak an tuahmi pakhat hman an pitlin thei hrih lo ih, an pitlin thei lo thu cu anmah ralhrang in an pom bangin, ram buainak nasa tuk ruangah le covid 19 natnak ruangah remnak 5 pitlin thei lo kan si tin Min Aung Hlaing cun a sim.

Min Aung Hlaing cun “Tuikum sungah ASEAN thawn remnak kan tuahmi 5 pitlin dingin theitawk kan zuam ding. Asinan, cumi ah ramsung buainak, ramsung thuhla, ramsung daan fehpi dan, ramsung ukawknak tivek pawl cu tibuai phah lo dingin remnak 5 pitlin kan tum.

“Tu ah ramsung buainak reh dingin tlangpar ralthuamkai hotu thenkhat pawl thawn kan tongaw zo ih, kan tonawk sal ding tlunah kan biak hrih lomi tlangpar ralthuamkai dang pawl khal biak thei kan tum. A relten rel lawngah ramsung buainak a fel thei ih, remdaihnak taktak a um thei sawn.

“Thuneihnak kan lak hnu thla 18 sungah mipi 6236 kan kai zo. Ramsung ah bomb puak 7246 a um ih, doawknak 6567 a um. Ralthuam phunphun 6311, puak thei 335184 le bomb 11715 kan kai ngah. Phungki, uktu lamih tuanvo nei, cozah hnatuan le nauhak komkhawm in mithi 3483 an um zo ih, mipi hriamhma ngah 3065 an um. Sagaing sungah vei 4026 doawknak a um ih, Yangon ah vei 2442 , Mandalay ah vei 2194 le Makui ah 1359 tipawl cu doawk tamnak hmun an si,” tin a sim.

ASEAN le ralhrang remawknak ah ASEAN palai in Myanmar a feh tikah a duhmi hruaitu pawl a tong thei ding timi a tel nan, ralhrang cun ASEAN palai cu Daw Suh tonter an siang lo ih, thawnginn sungih um, hremnak pekmi cu zohman kan tongter thei lo tin an sim. Cumi ruangah ASEAN thawn remnak kan tuahmi 5 pitlin kan tum nan, daan leng cun a si cuang lo ding an ti ih, ASEAn thawn remnak an neihmi 5 cu ziangtik hmanah an pitlin thei lo dingin a lang.

Mipi In An Sui Thilri PDF Hrang An Pe – Makui ramthen Myaing myone khua pakhat ah mipi pawl cun an neihmi sui thilri pawl mipi ralkap PDF le mipi tlawng hrang an hlan.

Khua pakhat in mipi cun sui hnakhaih kop 32,sui zunghruk kop 4 le sumfai ting 4 le thawng 30 pawl cu mipi ralkap PDF hnenah le mipi uktu ih dinmi tlawng hrang an pe.

PDF hotu cun “A makih a sunglawi tuk lawlaw. Ziangahtile, ralhrang cun doawknak a um tinten mipi tuar ding zawngin an cangvai ih, mipi inn tampi an urkang sak zo. An tumbikmi cu mipi lamin in tih haiseh, PDF pawl bawm ngam nawn hlahseh timi tumtah an nei.

“Asinan, mipi thinlung cu cuvek menah a dai lo ih, ralhrang uknak an duh lo lawlaw ruangah an neihsiah lakin an neihsun tiang mipi ralkap hrang le mipi uknak hrang an pe. Petu mipi pawl upatnak kan pe. Dothlegnak ah kan tangrual ding, kan lungrual ding kan timi cu hivek a si,” tin a sim.

Ralhrang ih Gas Pipeline A Puak – Tanintharyi ramthen Kanpauh myone in Thailand ram sungih lut ralhrang Gas Pipeline cu Augsut 1, zinglam nazi 3 hrawngah a puak ih, bomb ih puahmi a siko ding tin kiangkap umpawl cun an sim.

Kiangkap ih um pakhat cun “Kanpuah Gas Pipeline hmunpi in Thailand lamih feh a si ih,zinglam khuavan hlanah a puak. Khuavan hnu khalah kannih mipi cun kan zoh ngam lo,ziangahtile ralhrang pawlin in kai ding kan phang. Puak awn kan theih dan vek asile amahte puak siloin bomb ih puah siatmi a bang. Ziangtluk a siat tikhal felfai in kan thei lo nan, Gas Pipeline cu a puak rori a si,” tin a sim.

Myanmar ramsung ih suak Gas le Yinan pawl cu ralhrang in ramdang ah sumpai tampi in an zuar ih, company pawl thawn an dawr aw. Thailand ih lut Gas pipeline cu PTTEP company in ralhrang thawn tuantlang in an leimi a si ih, Myanmar mipi in ralhrang an tuanpinak bansan dingin an nor rero nan, tuini tiang Myanmar suahsan duh lo an si.

India Tipi Ah China Rocket A Tla – NASA cun kan dung zarhte ni July 30 zan ah Chinese ih kahuakmi Rocket cu India tipi ah a tla tin thu an suah ih, China cun thu felfai an suah duh lo.

NASA cun India caan zan nazi 10:15 hrawngah China Rocket cu india ramsung tipi ah a tla ih rocket thamte pawl cu hmundang ramdang ih tla thei a si ruangah fimkhur dingin thu an suah cih.

China cun July 24 ah Rocket an tuah netabikmi a that le that zohfiahnak ah an rak kap suak ngai. Cumi cu india tipi ah a tla tin NASA cun an sim.

NASA “India tipi ah China rocket a tla rori in kan hmu nan, a cipciar theih a silo. Curuangah nan ramsung lole nan kiangkap naivai ah China Rocket a tlak pang asile in simthei hram uh. Ziangtluk thil a siatsuah timi theih kan duh a si,” tin an sim.