Ralhrang In UN Ca An Kuat – UN Security Council cun lungrualten ralhrang pawl nornak ca an suah ih, ralhrang pawl khalin UN Security Council casuahmi pholangnak an langter ve ih UN an theihter.
UN Security Council palai 15 lakin palai 12 cun ralhrang pawl cu ram buainak ruangih kaihmi pawl thlah zalen thluh dingin, mipi parah ralthuam hmang lo dingin le Myanmar ram Democracy lamzin ah hruai dingin ralhrang an rak theihter. Hivek cu kum 74 sungah avei khatnak UN Security Council palai pawlin lungrualten thu an suah theimi a si ruangah rel a hlawh. UN Security Council in lungrual in thu an suah thei ruangah ralhrang lamin an thusuahmi an pitlin sak lo asile kekar dan dang an nei thei ding tin thenkhat cun an sim.
UN Security Council in ralhrang nornak thu an suah hnuah ralhrang khalin UN tihrimnak ca an a suah ve ih, UN an theihter.
Ralhrang ralkap cun “UN Security Council in thu an relcatnak ah lungrual zetin thu an suah thei tin kan rak thei ve. UN ahcun ramdang buainak thawn pehparaw in tuanvo latu ding a hranten an um cia. Kannih Myanmar ram ih buainak hi ramdang thawn buainak a silo ih, ramsung um kanmahte buainak men a si. Curuangah, UN in thu an suahmi cu UN Security Council daan thawn a mil aw lo.
“UK ih thu burnak vengin rel an si ih, Myanmar ram buainak ah daan lengin hrolhawk an tum. Thusuahmi ahcun minungpi duhtawk zangfah lainak lam khal a tel tikah UN Security Council ih buaipi ding siloin UN Human Right in thu an rak suah rero zo ih kan thei tuk zo. Daankalh cangvaihnak tawp dingin thu an suah, Cumi ding cun UN in daankalh pawlkom NUG le PDF pawl an cangvaih dan khamsawn ding an si.
“2020 Myanmar rampi hrilawknak ah dik lo a umih,cumi ruangah thuneihnak la sung kan si. 2008 daan hrampi vekin party tinkim telnak hrilakwnak kan tuah digih,cumi ahcun a nehtu party in rampi an kaihruai sal ding. Curuangah ramleng pawlkom le ramdang pawlin Myanmar ram Democracy lamzin ih fehpi kan tum reromi hi in bawm sawn uh.
“ASEAN thawn remaknak kan tuahmi 5 khal ramsung buainak ramdang hrolh aw lo dingin timi le ramsung uknak zahsak ding timi a tel. Ramleng ihsin bomnak lutmi pawl cu thleidannak um riai loin kan kan pek theinak digah ziangkim kan tawlrel. UN palai thawn kan rak tonawk ttum khalah ramsung buainak ah hrolh aw lo dingin le raltlan pawl an tlun theinak ding kan buaipi reo thu pawl kan rak simthei zo.
“Kannih Myanmar cu miphun tinkim le biaknak tinkim umkhawm kan si. Curuangah, Myanmar ram buainak kan rel ding cun thuanthu pawl kan zohsal ringring a tul. Kanmai ramsung buainak cu kanmah in kan tifel thei. Rampi thansohnak hrang, rampi remdaihnak hrang le rampi lungrualnak hrang kan zuam rero lai. Hivekin kan zuam laiah ramleng dinpinak siloin hrolh aw tum nan tum asile ziangtik hmanah kan pom dah lo ding.
“UN Security Council ih nan thusuahmi khal Myanmar ram buainak ah thathnemnak zianghman a um lo ih duhsakmi pawl nan buaipi tin kan hmu men. Myanmar ram buainak hi kanmah Myanmar rampi in kan neihmi 2008 daan hrampi thawn mil aw in kan remtha vivo ding a si,” tin ralhrang cun UN ca letnak an suah ih, UN an theihter.
Pyu Saw Htee Pawlin Zohmun Khua An Hnaihnok – Sagaing ramthen Tamu le Kalay karlak ih um Zohmun khua cu hahdamten um thei lo dingin Pyu Saw Htee pawlin an khua sungah meithal an va puah ciamco tin lairawn CNO cun an sim.
Lairawn CNO cun “Tamu peng, Tamu-Kalay lamzinpi tluanih um Zohmun khua cu Christmas zan ah Pyu Saw Htee pawlin an khua sungah meithal an va kap ciamco ih khuami pawl cu thlaphang in an um theh.
December 25 zan nazi 12 hrawngah Pyu Saw Htee mi 5 cu Zohmun khuasung ah an ra lut ih tlawnginn kiangah cerek bawm 2 cem ko meithal an kap. Cumi theh hnuah meithal veikhat puak pawl an kap vivo ih khua pawnih an retmi motor var te thawn an tlansal. Meithal an kah ruangah mipi siatsuah aw an um lo. Asinan, Zohmun khuami pawl cu do aw a um hmang tiah zanvar itthat thei lo,thlaphang in an um. Zohmun khua kiangkap ah Kawl khua lawnglawng an um ih, an khua kiangah mipi ralkap lam zohman an um lo. Cuti cingin Pyu Saw Htee pawlin an va hnaihnok hrim,” tin Lairawn CNO cun an tarlang.
Ralhrang In Mithar An Hawl – Bago ramthen Min Hla myone le Sagaing ramthen Kanbalu myone ah ralhrang cun ralkap le Pyu Saw Htee tuan dingin mithar an hawl ih, khawlal pawl an dil. Khawlal hnenih kan dilmi kan ngah lo asile lamzin ih kan hmuhmi pohpoh kan hruai ding tin an theihter.
Bago ramthen Min Hla khua ih um pakhat cun “Min Hla myone sungih um khua pawl hnenah mipa pathum ciar an dil. Khawlal le khua upa pawl an kawh hnuah ralkap tuan dingin mi pathum an dil. Khawlal le khua upa pawlin pek ding an theih lo tikah ralhrang pawl cun zan nazi 9 hnu lamih lamzin vak pohpoh an kai dingih ralhrang ah an hmang ding ding tin khawlal an theihter. Curuangah kan um a nuam thei lo. Duh lo cingin ralkap lakluh a thleng tum bang,” tin a sim.
Sagaing ramthen Kanbalu khalah Phungki hohanak in ralhrang pawl cun khua tinah ralkap that ding le pyu Saw Htee ding an hawl vivo ih, nan duh lo asile nan khua kan lo urkang sak ding tin an hro vivo. Kanbalu ahcun ralhrang pawlin Ocotober thla lamin mithar an rak hawl zo ih, kum 18 le kum 60 karlak an hawl vivo.
Khuami pakhat cun “Kannih Sagaing ahcun ralhrang pawlin Phungki pawl an hmang tangkai ciamco. Pyu Saw Htee an dinter ih, cumi hrang sumpai an khong. Khatlam ahcun Pyu Saw Htee ih rak lut huaiho khal an um ve. Pyu Saw htee pawl an lem da cu khua kilhim a tul an ti ih, khua kilhim dingin tuanvo an pe. Pyu Saw htee lut thar pawl cu ralthuam an pe cih ih, khua tinah PDF pawl an relse vivo phah a si,” tin a sim.
Pyu Saw Htee Khua An Kap – Mandalay ramthen Pin Oo Lwin myone Pukna Kyi khua ih um Pyu Saw Htee pawl cu BoLinzung kaihhruaimi PDF pawlin an kap ih, Pyu Saw Htee 3 an thi tin mipi an theihter.
Bolinzung cun “Pyu Saw Htee mipum 20 hrawng an si ih, rinloparal ah kan va kap. Anmah Pyu Saw Htee pawl khalin in rak kap ve. Pyu Saw Htee pathum kan kap that ngah ih,an ralthuam hmanmi meithal zunthum khal kan laksak. Zinglam nazi 8:45 hrawngah va kap kan si ih, minute 30 hrawng kan kap aw.
“Pyu Saw Htee zaten thianfai thluh tum kan sinan, an dinhmun a that lo tikah an tlan thluh. Kannih lamin PDF pahnih hriamhma ngah an um ve. Ralhrang pawlin PYu Saw Htee pawl ralthuam an pe ih, anmah cu mido ngam taktak loin PYu Saw Htee pawl hman tangkai an tum vivo. Curuangah, kannih khalin Pyu Saw Htee pawl kan zuam men thei lo ih, kan thianfai vivo a tul ve a si,” tin a sim.
Ralhrang 20 An Thi – December 25, Myanmar rampi huap doawknak thu an suahmi ah ralhrang 20 an thi tin hminsin tuahtu pawl cun an tarlang.
Mandalay ramthen Aungmi tarsan ih doawknak ah ralhrang 2 an thi. Sagaing ramthen Minmoe ih doawknak ah ralhrang 2 an thi ih, PDF pakhat a thi ve. Mon ramkulh Yi myone ih doawknak ah ralhrang 8 an thi ih, Mungzua ih doawknak ah ralhrang 7 an thi. Sagaing ramthen Chuang Oo ih doawknak ah ralhrang pakhat a thi ih, Tanintharyi Myeik le Dawei karlak ah ralhrang palik pakhat kan kai tin PDF cun thu an suah.
Kachin ramkulh Moekuang myone khalah Moekuang PDF pawlin ralhrang bawi hlun thawnginn kiltu bawi pakhat Kaiza Lian timi an kai tin mipi theihternak an nei ve.
Sagaing ramthen Mungzua khawpi khalah kuva lei dingin feh ralhrang pawl cu Mungzua PDF in an rak kap ih, ralhrang palik 3 an thi tin an sim.
Mungzua PDF cun “December 26, zinglam nazi 7:15 hrawngah a si ih, kuva lei dingih feh ralhrang palik 7 pawl kan rak kap. Ralhrang palik 3 felfai zetin an thi timi cu kan mithmuh a si. Ralhrang dang pahnih khal hriamhma an ngah. Ralhrang dang an ra thlen cih tikah kan himnak hrang zamrangten dung kan sip. Kanmah PDF lamin pakhat hriamhma ngah a um a si,” tin mipi an theihter.
Blethlehem Ah Christmas An Hmang – Covid 19 natnak ruangah Jesuh suahnak hmun, Israel ram Bethlehem khawpi khalah kum 2 sung Chritsmas an rak hmang thei lo ih, tuikum ahcun Bethlehem khawpi sung sungawi le ropi zetin Christmas puaipi an hmang thei ve.
Bethlehem ih Christmas puaipi hmang dingin leitlun kilhip ih Christian pawl an fehkhawm ih, mi tamzet an pungkhawm. Covid 19 daan le dun an fehpi nawn lo ruangah ramdang khualtlawng sukso khal an ong ih, ramdang ihsin Christmas hmangih Behthlemhem thleng an tam hleice.
An tidan kelte bangin Christmas zanmen zan ah Jerusalem in Bethlehem tiang lamzawhnak an nei ih, Church Of The Nativity ahcun Christmas hmuah zan le Christmas puaipi an hmang.
Bethlehem ih Christmas puaipi ahcun thusimtu Pizaaballa cun “Israel le Palestine karlak ah buainak a um ringring ih, Russia le Ukraine khal an buai rero lai. Leitlun hmun tinkim ah buainak a um. Asinan, remnak Jesuh in Christmas ni ah remnak thlen hramseh,” tin thusimnak a nei.
US Parah China An Thinheng – US cun 2023 in 2027 tiang ramdang an bawm dan ding thuhla relfelnak an nei zo ih,cumi ahcun Myanmar ram zalennak hrang dothlengnak tuahtu pawl an bom ding thu khal a tel. US cun Taiwan khal an bawm ding thu an sim ih, cumi ruangah China thinheng an si.
China ramdang palai cun “US in ramdang thuhla thawn pehparaw in bomnak thu an nemhngetmi ah Taiwan an bawm ding thu khal a tel. Taiwan in bomnak an tul asile $10 billion tiang kan bawm dingih ralthuam khal kan pe ding timi an telh. Hivek cu US in Taiwan remdaihnak an buaiter sawn.
“Cumen a silo, Taiwan hi China ramsung ih um a si ih, Chin ramsung buainak ah US hrolhawk an tum. Ziangram khalin mai ramsung buainak ah ramdang tel an duh lo. Cuvekin kannih China khalin kan ramsung buainak ah ramdang an hrolhawk rem kan tidah lo ding a si,” tin a sim.
Leave a Reply