Ralhrang In US le UN An Kawk

Ralhrang ralkap cun anmah soisel ih mawhhtluktu UN le US cu dankalh pawlkom thape zawngin cangvai hlah uh tin an kawk. Ralhrang cun rampi thuneihnak an lak hnuah mipum 209 thihdan le damsung thawngtla dingin hremnak an pe zo ih, cumi lakah 88 tlawngta hruaitu le NLD palai khal an tel.

Hivek a si tikah UN, US le France ram pawl cun ralhrang cangvaih dan, thih dan an pekmi cu dankalh rori a si. Dankalh in thuneihnak latu in, dankalh in duhduh thih daan an pe men timi cu kan dokalh tuk lawlaw. Minung covo daan pahbaltu an si ih,diknak zianghman an nei lo. Curuangah kannih cun ralhrang cu kan mawhhtluk tuk lawlaw. Hivek dinhmun khalah Democracy hrang theitawk in ralhrang do rerotu Myanmar mipi pawl cu kan upat tukih, kan dinpi vivo ding a si tin thu an rak suah.

Hivekin US, France le UN pawlin thu an suah hnuah ralhrang cun “UN, France , US le ramdang pawl cu dankalh pawlkom thazang petu an si. Kannih Myanmar ahcun dik zetin ziangkim lairel a si ih,rammi sinak neitu zaten bangrangten an tlunah daan fehpi a si,” tin thu an suah.

Ralhrang ralkap In Mi 209 Thihdan le Damsung Hremnak An Pe Zo – Ralhrang ralkap in rampi thuneihnak an lak hnuah anmah dokalhtu ti ih an kaihmi lakin mi 209 pawl cu thihdan le damsung thawngtla dingin hremnak an pe fel zo tin zingzoitu ISP Myanmar cun thu an suah.

Ralhrang ralkap cun 2021, February 1 ah rampi thuneihnak an rak la ih, mipi cun duh loin lamzawhduhporhnak an nei. Cutikah ralhrang cun mipi cu ralthuam hmangin an thekdarh ih, mipi khalin ralthuam an kai ve. Cutin, Myanmar ramsung a buai ih, an doaw.

Rampi a buai hnuah ralhrang cun anmah dokalhtu ti ih an ruahmi cu an kai vivo ih an kaihmi sungin mi 1200 pawl hremnak an pe. Mi 209 pawl cu naa tukin hremnak an pe ih, thihdan le damsung thawngtla dingin timi a si.

Ralhrang in thihdan le damsung thawngtla dingin hremnak an pekmi 209 lakin 202 cu Yangon ramthen sungih um an si ih, midang pawl cu Ayeyarwaddy ramthen in an si. Ralhrang cun ram buai hnuah Yangon N.Okalapah ih an kaihmi mi 52 pawl cu thihdan an pe ih, mi 12 pawl cu damsung thawngtla dingin hremnak an pe.Cucu, ramsung dinhmun ah ralhrang in hremnak an pek tambikmi myone a si.

Pahnihnak khalah Yangon Hlaingtaya a um ih, Hlaingtaya veng sungin ralhrang cun an kaihmi 17 pawl cu thihdan an pe ih, mi 30 pawl cu damsung thawngtla dingin hremnak an pe. Damsung thawngtla dingin hremnak an pekmi 30 lakah mi 3 pawl cu thihdan thawn hremnak an pek rualmi a si.

Ralhrang in thihdan le damsung thawngtla dingin hremnak an pekmi lakah an kaih hnuih thihdan le damsung thawngtla dingin hremnak an pekmi 6 an um ih, kaih hnuah thihdan an pekmi le kai dingin an hawl reromi lakah thihdan an pekmi 117 an um. Kaih hnuah damsung thawngtla dingin hremnak an pekmi 86 an um ih, thihdan an pekmi lakah kum 18 kim hrih lo mipa pahnih an tel tin ISP Myanmar cun thu an suah.

Myanmar Hrang US Palai Khual A Tlawng – Myanmar thuhla relpi dingin US ramdang vuanci zungih thuron Derek cu June 7 ah ASEAN sungtel sungin ram hrekkhat pawl tong dingin khual a tlawng thok.

Myanmar thuhla ah US palai Derek cun Thailand, Singapore le Brunei ram pawl a tlawng dingih zarhkhat sung khualtlawnnak a nei ding tin US ramdang vuanci zung cun thu an suah. Kan dungah US cozah le ASEAN sungtel pawl an rak tongaw zo ih, cumi ih an thurelmi pawl khal tuitum ah an rel peh sunzom ding tin an sim.

US palai cun Thailand cozah pawl cu Myanmar hrang bomnak pek dan ding, Thailand in bomnak a luh thei dan ding tivek pawl a relpi dingih, Thailand ih ramleng pawlkom bomnak petu pawl khal a tong ding.

Singapore ahcun ram kilhimnak thurelnak an nei dingih, cumi ahcun US palai in Myanmar thuhla a relpi hai ding. Brunei ahcun US Palai in ASEAN Myanmar palai rak tuan zo Brunei ramdang vuanci Yusuf a tong dingih thu a relpi ding.

US palai cun khual a tlawnnak ram pawl cu Myanmar ram buainak ah Myanmar mipi dinpi dingin sawmnak a nei vivo dingih, ralhrang tuanpi lo dingin a sawm vivo ding. A hlawhtling asile ASEAN in Myanmar thuhla an relnak ah hmuar a nei sinsin ding tin an ruat.

Be the first to comment

Leave a Reply

Your email address will not be published.


*