Ralhrang ralkap cun anmah mawhthluk rerotu ASEAN pawlkompi cu casuah in an kawk ih, ram pakhat ramsung buainak ah ramdang hrolh aw tum rero hlah uh, ramsung buainak cu ramsung ih daan hrampi kan neihmi vekin cangvai kan si tin an theihter.
ASEAN ramdang vuanci pawl meeting an theh hnuah casuah in ralhrang an mawhthluk ih, “Remnak kan tuahpimi 5 an pitlin thei hrih lo ruangah ralhrang pawl parah kan beidong tuk. Dothlengnak ruangih kaihmi 4 an thlaithat khal riahsiatza ngaingai a si,” tin ASEAN cun ralhrang mawhthluknak ca an suah.
ASEAN in ralhrang mawhthluknak ca an suah thu ah ralhrang lam daiten an rak ummen duh lo ih, ASEAN casuahmi an rak let cih hngal.
Ralhrang cun “ASEAN cu remnak 5 kan tuahpi ko,Asinan remnak 5 kan tuahpi caan khalah ramsung dinhmun ih zir in le ASEAN daan vek rori’n pitlin kan tum ding tin kan rak simthei cia. Curuangah ASEAN kan simtheih duhmi cu ram pakhat ramsung buainak ah hrolh aw ciamco hlah uh.
“Ziangahtile, ASEAN daan ah ram pakhat ramsung buainak ah ramdang duhduh in a hrolh aw ding a silo timi a tel. Cumi ASEAN daan cu ASEAN sungtel zaten an thlun ih, an upat a ttul. Kan ramsung buainak cu rampi in 2008 kum ih daan hrampi kan neihmi bangin lairel kan si. Myanmar in daan hrampi kan neihmi thawn kaih aw cekci in ziangkim kan tuah ih,cumi cu ASEAN pawlkom in an upat thiam a ttul.
“Tu ah ASEAN palai khal zalen zetin kan kawm ih, Myanmar ah duhtawk in kan tlawngter rero zo. Kanmah ramsung khalah remnak um dingin tlangpar ralthuamkai hruaitu pawl kan bia ih,party hruaitu pawl khal biak vivo kan tum. Rampi remnak hrang zalen zetih thurel theinak caan kan ong.
“kannih cun theitawk in ramsung buainak ah remnak um dingin kan zuam rero nan, NUG le PDF pawl dankalh ih an cangvaih rero tlunah duhtawk in mipi an that timi khal thu kan suah rero zo. Curuangah Myanmar ram remdaihnak nan duh taktak asile NUG le PDF tivek cu biak dingah ruat duh hlah uh,” tin ralhrang cun ASEAN an simthei.
ASEAN Palai In Ralhrang Nun A Sim Ve – ASEAN Myanmar palai Prak Sokhonn cun ASEAN le Myanmar ralkap in remnak kan tuahmi 5 pawl pitlin a si hlansung cu ralhrang pawl ASEAN meeting ah an tel thei lo ding tin August 6 ah ralhrng pawl a simthei ve.
Avei 55-nak ASEAN ramdang meeting an theh hnuah ASEAN ramdang palai Prak Sokhonn in Myanmar ram buainak thuhla thawn an relmi pawl mipi simtheihnak a nei ih, ralhrang pawl an lungruh vivo ahcun ASEAN meeting ah an tel thei dah lo ding tiah a ti.
ASEAN le ralhrang cun 2021 ah remnak 5 an rak tuah ih, remnak 5 an tuahmi bangin Myanmar ram buainak tifel an tum. Asinan, kum 1 a liam hnu khalah ASEAN le ralhrang ih remnak tuahmi 5 cu ralhrang lamin pakhat hman an pitlin duh lo. Cumi ruangah ASEAN cun ralhrang hnenah remnak kan tuahmi 5 nan pitlin hlansung cu ASEAN meeting ah nan tel thei lo ding tin an sim.
ASEAN le ralhrang ih remnak tuahmi 5 pawl cu ram buainak ah ralhrang duhdan lawng siloin mipi duhdan in rampi hrilawknak tuah lohli ding, ralthuam hmangin mipi thekdarh lo ding, ASEAN Myanmar palai in a duhmi hruaitu a tong thei ding, ram buainak ruangih kaihmi pawl thlah zalen ding,zalen zetin bomnak pek sian ding tivek pawl an si.
Khawlal Le Pyu Saw Htee Ruangah Mi 21 An Kai – Khawlal le Pyu Saw Htee pakhat thah an si ruangah Mandalay ramthen Min Gyan myone Letit khua le Kyauk Piuh khua in mipi 21 pawl cu ralhrang ralkap in an kai.
Ralhrang ralkap cun Letit khua in mi 9 le Kyauk Piuh khua in mi 12 an kai. Kaihmi lakah Kyauk Piuh khawlal tei inn kiangih sungkua 3 khal an tel. Ralhrang ralkap cun rinhlelh thumen in khua mipi pawl an kai.
Kyauk Piuh khawlal Maung Myint le Letit khua ih Pyu Saw Htee hotu Maung Naing tei pahnih cu ralhrang tanpitu an si ruangah August 3, zan nazi 7 hrawngah Min Gyan PDF in an rak kap that. Kah thatmi Khawlal le Pyu Saw Htee cu ralhrang hnenin ralthuam ngah cin an si ih, PDF pawlin an kah that ttum khalah bomb , nam , khuahhli an rak keng.
Ralhrang Lawng An Kap Siat – Sagaing ramthen Mungzua myone Chindwin tiva ih feh ralhrang ralkap lawng cu August 5 ah mipi ralkap komkhawm in an kap ih, lawng pakhat fuh zetin kan kap siat ngah tin mipi an simthei.
Daung Ni Army cun “A tufang hi ralhrang ralkap in Sagaing tlunlamih an milai pawl ralthuam le eiin phurhnak hrang Chindwin tivapi an hmang tangkai zet. Cumi ruangah kannih mipi ralkap lam khalin Chindwin tiva tluanah ralhrang lawng pawl hahdam tukin an feh ding cu kan duh ve lo.
“Kan kap puak thei maw, thei lo tilam pang siloin ralhrang lamin harsatnak an neih ding hrimhrim khal kan duh. Kannih mipi ralkap pawl Chindwin tiva tluanah kan cangvai timi khal ralhrang lamin an theih tikah humhimawknak hrang ziangkim an ralring cia ve.
“Tuitum khalah ralhrang pawl humhimawknak an nei ih, duh vekin kan kap thei lo. Asinan, hlaral kahnak in kan kap ih, lawng pakhat kan kap fuh tuk. Lawng cu hlaral hmanin a khu luihlo kan hmu thei ih, a feh tha thei nawn lo. Ralhrang thi an um maw timi cu kan fiah thei lo ruangah kan rel thei lo. Ka tlintawk le theitawk in ralhrang uknak do vivo ding kan si,” tin a sim.
Ralhrang le Pyu Saw Htee 16 An Thi – Sagaing ramthen Tanze dothlengnak pawlkom cun ni 2 sung ralhrang ralkap le Pyu Saw Htee an donak thuhla cu August 5 zan ah mipi theihternak an nei ih, ralhrang le Pyu Saw Htee 16 an thi tin an tarlang.
Taze dothlengnak pawlkom cun “August 4, zinglam nazi 12:20 hrawngah kannih mipi ralkap komkhawm cun ralhrang ralkap le Pyu Saw Htee umkhawmnak hmun cu bomb puah in kan kap ih, ralhrang ralkap le Pyu Saw Htee 10 an thi. Kannih mipi ralkap komkhawm lamah Guerrilla Warfare, TSR, Taze Tiger, PLA le PRLF pawl kan tangtlang.
“Zanlam nazi 6:35 hrawng khalah Tazece khua luhnak ih duty Pyu Saw Htee pawl kan kap ih, Pyu Saw Htee 5 an thih tlunah hriamhma ngah an tam. August 5, zanlam nazi 4:50 hrawng khalah Chaungsung khua ih Pyu Saw Htee umkhawm kan kap ih, Pyu Saw Htee pakhat a thi. Ni 2 sungah ralhrang ralkap le Pyu Saw Htee 16 kan thianfai thei ih, kannih lam cu kan him a si,” tin thu an suah.
U Kyaw Moe Tun In UN Ah Dilnak A Neisal – UN ih Myanmar palai U Kyaw Moe Tun cun August 4 ih UN meeting ah ramdang pawl cu Myanmar ralkap hnenah ralthuam zuar lo dingin dilnak a nei bet.
U Kyaw Moe Tun cun a hlan UN meeting khalah ramdang pawl cu Myanmar ralkap hnenah ralthuam zuar lo dingin a rak dil rero zo ih, Myanmar ralkap cun ralthuam an leimi pawl cu sualnak nei lo mipi thahnak ah an hmang men tin ramdang palai pawl a rak simthei.
U Kyaw Moe Tun cun theitawk in UN sungtel pawl cu Myanmar ralkap hnenah ralthuam zuar lo dingin a dil rero nan, ralhrang ralkap in rampi thuneihnak an lak hnuah Russia, China , India le N.Korea pawl cun Myanmar ralkap hnenah ralthuam an zuar peh thotho tin zingzoitu pawl cun an sim.
Ahleice in Russia le China in Myanmar ralkap hnenah ralthuam an zuar tam hleice ih, India khal China a zuam tuknak ah ralhrang an ttuanpi phah ih, ralhrang hnenih ralthuam zuartu ah an tel ve.
Tu ah Myanmar UN palai U Kyaw Moe Tun cun ramdang pawl Myanmar ralkap hnenah ralthuam zuar lo dingin zangfah a dilsal nan, Russia, China , India le N.Korea pawl cun Myanmar UN palai U Kyaw Moe Tun ih dilnak an thlunsak hmel cuang loin a lang. Ziangahtile, Russia , China , India le N.Korea pawl cu ralhrang ralkap thawn pehtlaihawknak thazet nei an si.
US Parah N.Korea An Thinheng – A tufang cu US house Speaker Nancy in Taiwan le S.Korea tlunah Asia ram dangdang a tlawng kual ih, China le N.Korea an thinheng tuk thlang.
N.Korea cun “Nancy Pelosi hi leitlun remdaihnak siatsuahtu misual lalnu rapthlak a si. China lamin rem an tilo cingin Taiwan ah a fehhrim ih, China le Taiwan karlak dinhmun a that lo phah. S.Korea a tlawn ttum khalah kan ramri a fehhrim. Olsamten, Korea ramri ah ka ttum thei ti ih a ruahawknak cu a tisualmi a si ding. A khualtlawnnak ruangih harsatnak thleng ruangah US cun an tuar leh hrimhrim ding a si,” tin thu an suah.
China khal US parah an thinheng tuk ih, meisa ih lek cu meikang an tuar leh ding tin US an rak simthei ve zo. Nancy in ASIA a tlawng kual cu boruak a nei sosang tuk ih, China le N.Korea an buai vohvoh. China sawn cu Taiwan ramri ah sosang zetin raldo zirnak an nei ih, Taiwan lam an um a rem nawn lo ruangah ralrin thupnak an nei ve thlang.
Khatlam ah Taiwan Defence Ministry’s Missile research and development ih Deputy head Ou Yang Li-hsing cu Taiwan Island Region Hotel ah thi cia in a ruang sar a si ih, a thihnak san felfai in theih a si hrih lo tin Taiwan cun thu an suah. China le Taiwan karlak boruak sosang ah hivek a thleng vivo cu Taiwan lam an ngaih a tha lo zet.
Leave a Reply