Ralhrang In Facebook An Phit Tum

Ralhrang In Facebook An Phit Tum – Ralhrang ralkap thuphuangtu Zaw Min Tun cun Myanmar mipi ih hman tambikmi Facebook kan phit dingih Social App dang kan tuah ding tin August 17 ah mipi simtheihnak a nei.

Zaw Min Tun cun “Facebook fehtlang in ram buainak luarkaitertu a tam tuk. Curuangah Facebook phihfel kan tumih, Facebook thelarnak pawl khal khar thluh kan tum. Facebook in ttanlam a nei ih, kannih lam thuthlahmi cu an hlon rero men.

“Facebook phitfel dingin kan zuam rero ih, VPN hmangin Facebook an hmang thotho. Tu ahcun VPN thawn hman theih lo ding tiangih phih fel kan tum. Theitawk kan suah rero ih, kan theh felfai hrih thei lo. Facebook aiawhtu ding Social App dang khal kan buaipi cih ih, tuanvo neitu pawlin theitawk an suah rero zo. Kan mithiam pawl tangtlang in hna an tuan rero zo a si,” tin a sim.

Mithiam pakhat cun “Ralhrang ih thusuahmi cu ruah rero tikah a san a um lo tin’ rel a theih. Facebook an phit thei taktak asikhalle Social App dang an tuahsuak ding timi cu zum a har. Rak tuahsuak taktak hai khalle mipi in an hmang duh cuang lo ding.

“Culo khalah ralhrang in Facebook an phit fel thei pang asile mino hrangah a dang social hman ding a tam tuk. Ralhrang in hivek in thu an suahnak san ih lang cu Facebook lamin an thilthlahmi an hlonsak ringring ruangah Facebook hrinhronak hrang hivek thu an suah hrim siko ding,” tin a sim.

Ralhrang ralkap cun rampi thuneihnak an lak hnuah a phunphun in Internet an rak phit ih, mipi in facebook hmang thei lo dingin an tuah rero. Asinan, mipi cun VPN hmangin facebook an hmang thei thotho. Curuangah ralhrang ralkap cun VPN hmang kan kaihmi cu kum 3 sung thawng kan thla ding titiangin thu an suah phah.

Thailand Ram ih Mawtaw Letah Chinmi Thi – Myanmar in Thailand ih thupte lut Myanmar mipawl ih tomi mawtaw letah ah mi 3 an thi ih, Chinmi pakhat a tel.

Mawtaw ahcun Myanmar mi 33 an to ih, an mawtaw tomi in thingkung a pah ngah. Thingkung a pah ngah hnuah an mawtaw tomi a letih, a hmunah mi 3 an thi cih. Mi 3 thi lakah Chinmi pakhat a telih, Kalay peng Hmuntha khuami Pa Hu Lian a si. Pa Hu Lian cun a fanu kum 1 mi le a nupi a fehsan. A ruang cu Thailand in an khua Hmuntha tlun thei dingin an tawlrel rero lai.

Myanmar rammi 33 pawl cu Kawhtaung in lawng an to ih, thupten Thailand ram sungah an lut. Thailand ramsung an luh hnuah mawtaw an to ih, an hnatuannak ding hmun pan an si. Mawtaw a let hnuah mawtaw mawngtu a tlan cih ih, hriamhma ngah lo thenkhat pawl khal an tlan. Tu ah tlansuak mawtaw mawngtu siseh Myanmar mipawl khal Thailand palik pawlin an hawl rero. Myanmar mipawl cu Passport nei lo thupten Thailand ramsung lut an si tikah kaih theih hlir an si.

KNU Le NLD An Be Aw – Ralhrang ralkap in rampi thuneihnak an lak hnuah NLD hotu bik Daw Aung San Suh Kyi le NLD sungtel tampi an rak kai nan, NLD sungtel kaih lomi pawl cun NLD cu an rak fehpi vivo thotho ih,tu khalah Karen ralkap KNU le NLD an be aw.

KNU le NLD cu August 16 ah online fehtlangin be aw an si ih, tufang ram buainak ah ziangtin kan tuantlang ding, ziangtin ramleng kan tuanpi thei ding tivek pawl an rel. Ralhrang ralkap in rampi thuneihnak an lak hnuah KNU le NLD cu vei 3 an rak tongaw zo ih, tuitum thawn vei 4 an tongaw thlang.

Tuitum an toawknak ahcun KNU lamin hotu sangtu Pado Saw Kwe HtooWin, GS Pado Saw Tta Do Moe le Central sungtel pawl an tel ih, NLD lamin Aung Kyi Nyut, Dr.May Win Myint, Dr.Khin Saung, Htun Myat le Myo Naingpawl an tel.