Ralhrang lamtang Pawl Thinglamtah Kengin lamzawhnak An Nei – Mandalay ah Mipi ralkap pawlin dalan tin nupa an kap that sual ih, siattong innsang hnenah ngaithiam an dil zo bangin vuinak khal an nei fel thluh zo.
Asinan, Mandalay ah ralhrang dinpitu pawl cun Khristian pawlih ngai thupi zetmi Thinglamtah an kengih, lamzinpi ah lamzawhnak an nei. Ralhrang dinpitu pawl cun “Dalan tin duhduh mi an that ih, mi tampi nunnak an la zo. Hivek cu dohlengnak siloin suamhmang, damiah mithat pawlkom an si,” tin an auphah vivo ih, catar khal an keng.
Mandalay PDF cun August 24 zingah nupa fate tlawng thlah ih tlung cu CID palik bawiah an ruat ih lamlak ah an kap that. Nupate cun fanu pakhat an nei ih, an fanu cu nulepa nei nawn loin a damsung caan hmang thlang ding. Hivek ruangah mipi ralkap cun an thiamlo a si thu an sim ih, a tul asile an tuahsualmi ah an tuar ding thu khal an tarlang.
Mipi ralkap pawl ih thahmi nupate cu RC kawhhran an rak si ih, cucu ralhrang lamtang pawlin hmang tangkai in thinglamtah an kengih, PDF duhlonak, dalan puh ih nupa an thah ruangah mawhphurhnak la dingin PDF pawl an phur ih, an aupi.
Mandalay ih um pakhat cun “lamzawhnak ah mipi kan tel lo ih,anmah ralhrang lamtang lawng an si. Ralhrang in sualnak nei lo mipi tamtuk an that zo ih, cumi hrangah teh lamzawhnak an nei dah maw? Ralhrang pawlin mipi an thah ruangah ngaithiam an dil dah maw, mawh an phur dah maw? Cucu ralhrang lamtang pawlin rk thei haiseh,” tin a sim.
Ralhrang In Daan Hrampi Rem An Tum – Ralhrang ralkap le ramsung party hotu hrekkhat pawl cu August 27 ah Naypidaw ah an tongaw ih, ralhrang cun 2008 daan hrampi rem an tum tin tonawknak ih tel palai pawl cun BBC an simthei.
Ralhrang le party donawknak ahcun daan hrampi lakih rem tulmi 10 relnak an nei ih, cumi hnuah rem tul ih an theihmi pukmah 19 khal an rel tel. Cumi ahcun hrilawknak a um tikah District le myone uktu pawl cu hrilawknak tuah in hril a theih ding tin an sim. A hlan ahcun District le myone uktu tivek mipi hril siloin a nehtu party pawlin tuanvo an pe sawn theu.
Asinan, tuitum cu ralhrang lamin party hruaitu pawl an relpi menmi a si ih, ralhrang in hlutaw ah an phurlut taktak pei maw? Party hotu pawl an relpi dan vekin an thleng taktak pei maw timi felfai a um hrih lo.
Ralhrang ralakp cun party hruaitu pawl an relpimi daan hrampi thleng ding thuhla cu 2023 rampi hrilawknak an tuah thluh hnuah lawngah hlutdaw ah phurhluh an tum tin an sim ve. Ziangahtile, tu ahcun rampi a buai ih, ralhrang in thuneihnak an lak tikah hlutdawpi thurel a um thei hrih lo.
CRPH le NUG cun 2008 daan hrampi bal zo a si an tinan, tutiang daan hrampi thar an suah thei cuang hrih lo. Tuitum ah ralhrang in party hruiatu pawl an relpimi cu an leemnak le thlemnak men a siko ding titu khal an tam. Ziangahtile , daan hrampi rem dingih an relmi ah Federal ukawknak a tel ih, daan hrampi umlai ahcun Federal ukawknak kham a si.
AA Le Ralhrang An Kap Aw – Rakhine ramkulh Mrauk Oo myone Let-ka khua le Aukta’kan khua karlak ah AA le ralhrang an kap aw tin khuami pawl cun an sim. AA le ralhrang cu August 28, zanlam nazi 4 hrawngin an kap aw thok.
Khuami pakhat cun “Ralhrang pawl an rat tikah kannih cu zinglam ah khua in kan suak. Zanlam ah kan kap aw ngaingai. Khua ah tlansuak ngah lo an um ih, an dinhmun kan thei hrih lo. Doaknak a sosang ngaingai.
“An doawknak lamzin cu Yangon in Sittwe fehnak lamzinpi ah a si ih, Yangon feh tum mawtaw tampi lamzin ah an cawl hrih. Doawknak a um ding ti ih an theih cia lo ruangah rak suak an si ve. Doawknak a um tikah Miuk Oo ih ralhrang hmunpi cun duhtawk in ralthuampi an kap ciamco ih, mi pahnih an thih phah zo.
‘Hriamhma ngah zaten mi 7 an si ih, neta ah nauhak kum 4 mi khal ralhrang kahsuakmi ralthuampi in a ngah ih , a thi ve. Tuitum hi ralhrang mipum 100 hrawngin AA an ra pan ih, doaw an si,” tin Rakhine thuthang a simthei. Tuitum AA le ralhrang doawknak ah boruak a sosang tuk lai ih, AA lam cun doaknak thuhla cipciar mipi an theihter hrih lo. Rakhine thuthang pawl khalin doawknak thi tivek an tarlang hrih ve lo.
Leave a Reply