Ralhrang tisung lut lawng ih ralhrang 7 pawl cu cawlh khal dil loin rei tuk an hlo zo ih, tu ahcun ralhrang pawlin ralkap tlan hmin cazin an khum.
Ralhrang tisung lut lawngih tlan ralhrang 7 pawl cu bohnih Aung Ko Myo, senthum Yan Ngein KHan, Senthum Aung Kyaw Kyaw Oo, Wiyan Lin, Win Htaih Aung, senhnih Min Maung Maung le senkhat Wana Kyaw pawl an si.
Tizung lut lawngih ralhrang 7 pawl cu 2021, ralhrang in rampi thuneihnak an lak hnuah hlo an si ih, a thuhla le umnak an theihthei lo ruangah, tu ahcun ralkap tlan in an hmin an khum. Ralhrang 7 pawl umnak hawl rero a silai ah an thlahlawh pawl cu ralbawi Thet Naung in a rak suah rero tin an sim.
Ralkap pakhat cun “Ralhrang 7 an tlan hnuah ralbawi cun midang a bumih, an thlahlawl pawl a rak suah ringring. Cutin, nuam a cen ringring ih, amah thawn nuamtlang pawl cu zianghman tik a fial dah lo. Amah ngaih lotu cu nasa ten a sor. Lawng thuhla khal thei lo a si,” tin mipi media a simthei.
Tuitum ralhrang 7 tlan pawl cu Min Ye Thein Kha Thu timi tisung lut ah ralkap tuan an si. Min Ye Thein Kha Thu lawng cu India ralkap in 2020, December 24 ah an hman bang Myanmar ralkap an rakpekmi a si.
Makui Ih Doawknak Ah Ralhrang Thi An Tam – Makui ramthen Kyaw khua ih ralhrang pawl cu tank mawtaw telin ralhrang mawtaw 60 thawn Gangaw lamah an feh ih, June 2 ah Yaw PDF in vei 2 do in an rak do. Cumi ah ralhrang thi an tam ding tin thu an suah.
Yaw PDF cun “June 2 ah Kyaw Myo ih ralhrang hmun in ralhrang mawtaw 60 le tank mawtaw hrekkhat cun Gangaw lam an pan ih, kannih Yaw PDF cun lamzin ah vei 2 kan rak do.
“Hmaisa sawn doawknak cu zinglam nazi 8 hrawng a si ih, Kyaw myo in suak ralhrang mawtaw 8 cu Pagia taung ttum zawngah YDF tatyin 13-nak pawlin bomb le ralthuampi in an kap ih, ralhrang mawtaw 2 a siat tlunah ralhrang 10 an thi ih, hriam ngah an tam.
“Neta sawn doawknak cu ralhrang mawtaw 4 in hmaisa sawn ih ralhrang mawtaw bomb kan puahmi bawm dingin in ra pan ih, lamzin ah kan rak do bet. Ralhrang mawtaw bomb kan puah hnuah ralhrang pawl mawtaw in ttum thluh an tum ih, cumi laifang ah ralthuampi in kan kap bet. Neta sawn doawknak ah ralhrang 20 hrawng an thi ih, hriam ngah an tam.
“A hnu reilo ah ralhrang Helicopter cun ralhrang thi ruang pawl a phur ih, ralhrang thi lakah ralbawi a tel si ding tin kan ruat. Helicopter ih phurh lomi ralhrang thi ruang dang pawl cu ralhrang nundam pawlin Yi MyatNi khua ah an vuiliam.
“June 2 ih kan doawknak ah ralhrang 30 an thi ih,kannih Yaw PDF lam cu thi um loin himdam ten dung kan sip thei. Tu ah ralhrang pawl cu Ngiole ah umhmun an khuar. Kannih Yaw PDF cun mipi thilri siatsuah ih mipi nunnak tiang laksak rerotu ralhrang ralkap pawl an cimit hlan sung kan do vivo ding a si,” tin thu an suah.
Ralhrang Mawtaw 2 An Laksak – Kaya ramkulh, Hpa-Saung, Bawlakha peng sungah ralhrang hmainor pawl sakhan hrang eiin phur motor cu an tlun lamah Karenni mipi ralkap tangual pawl in June 1-2 ah an rak rak kap ih,ralhrang thi an tam bangin ralthuam tampi kan laksak thei tin KNDF cun mipi an theihter.
Ralhrang mawtaw tlunglam cu Kareni Army KA le Kereni miphun humhimtu KNDF komkhawm in an domi a si ih, doawknak ah ralhrang thi an tam bangin ralhrang thilri tampi khal Kareni ralkap komkhawm in an laksak thei. Ralhrang thilri an laksak theimi ah ralhrang mawtaw 2, Drone kah thlaknak,ralthuampi , Solar ,meithal zun 4 ,cerek le fawm pawl an si.
KNDF ralbawi cun “Ralhrang mawtaw 40 cu an tlunlam ah kan rak bawh ih, kan kap ciamco. Nikhatnak ah duh vekin kan kap remcang lo ih, dung kan sip. Cumi ruangah ni 2 peh in va dosal kan si. Ni 2-nak kan doawk tumah ralhrang thi an tam ih, ralhrang cun vanzam in bomb in ra thlak.
“Asinan, cuvek cing khalin kannih cun ralhrang mawtaw 36-nak le 38-nak kan mawnsuah sak ih, ralthuam le thildang deuhdeuh khal kan laksak thei a si,” tin a sim
Myanmar Mi 19 Mithat Thubuai Ruangah Kaih An Si – Thailand le Myanmar ramri in Thailand lamih thupte lut Myanmar mi 19 pawl cu mithat thubuai hmangin Thailand palik pawlin an kai tin June 2 ah thu an suah.
Myanmar mipawl cu Thailand an luh fel hnuah Thailand le Malaysia ramri ah Thailand palik pawlin an kai ngah ih, anmah thawn hla tuk lo hmun pakhat ah mithi ruang a um. Mithi cu a kut le ke ttawn a si ih , an zohfel tikah Thailand mi a si. Cumi ruangah Myanmar mi 19 pawl cu June 1 ah Thailand palik pawlin an kai.
Mithi ruang an hmuhmi cu kum 40 hrawng a si ih, thingthei rah phunphun le hramlak thilri khawlkhawmtu a si tin an thuhla an thei. Hivek ruangah Myanmar mi 19 pawl cu mithat thubuai in kaih an si ih, DNA cek thluh ding an si.
Thailand ih Myanmar mi buaipitu pakhat cun “JUne 1 ih thilthleng a si ih, Thailand putar cu nga sio dingin hramlak feh a si hmel ih,thi cia in a ruang hmuh a si. Thai putar thi thubuai thawn pehpar aw in Thailand palik pawl cun a kiangkap cekfelnak an nei ih, thupten Malaysia lut tum Myanmar mipawl an kai ngah.
“Umdan ahcun Myanmar mipawl cu thupten Malaysia lut tum an si ruangah, Thai putar in a hmuh ngah fawn palik hnenah a hek ding an phangih, an that khal a si thei timi cu Thailand palik pawl ih ruah dan a si. Cumi ruangah Myanmar mipawl cu an kai. Neta ahcun Myanmar mipawl kan fimkhur deuhdeuh a tul ih, thilthleng cu rapthlak tuk a si.
“Tu ah rinhlelh in Myanmar mi 19 pawl kaih an si ih, rinhlelh ding umsun khal an si. Curuangah, Thailand ih um Myanmar mipawl cu kan fimkhur ngaingai a tul ding. Thupten Malaysia lut tum pawl khal tih a nung deuhdeuh thlang ding a si,” tin a sim.
Thailand ih um Myanmar mi pakhat cun “Thupten Malaysia feh ding cun puaisa pawl in Malaysia ramri hramlak ah an thup theu. Cucu, kiangkap um Thailand mipawl in an theih le an va suam theu ih, tangka le an thilri tivek an laksak theu. Cuvek a si tikah hramlak ih relh Myanmar mipawl khalin an rak kham aw ve a si thei. Cuvek cu thilthleng theu a si ih, tuitum thilthleng diktak cu ka thei ve lo,” tin a sim.
Leave a Reply