Ralhrang Lawngpi An Kai – Sagaing ramthen Myong myone ah fangfai dip 15000 phurtu ralhrang lawngpi cu PDF komkhawm CDSOM pawlin an rak kai ih, fangfai dip 400 an laksak man ih, mipi an zem.
November 6 zing ah Mandalay in suak ralhrang lawngpi cu sun nazi 2 hrawngah CDSOM pawlin Myong myone sungah an rak kai. Ralhrang lawngih fangfai dip pawl cu raltlan pawl an later ih raltlan pawlin fangfai an lak sung cu PDF pawlin an kil thepthep.
CDSOM thuphuangtu cun “Chindwin tiva tluanah ralhrang lawng kan rak kai. Lawng ahcun ralhrang pawl an to ngam lo ih, an sormi pawl lawng an um. Asinan, ralhrang pawl cun thupten Lawngpi cu an kil ih, lamzin tlunah thuhla an than aw vivo phah. Lawng parih fangfai dip pawl cu raltlan pawl kan later ih dip 400 hrawng an la man ding. Cumi hnu ahcun ralhrang pawlin lawng an pan ih raltlan pawl cu an umnak hmun ciarah kan kirter sal.
“Ziangahtile, ralhrang pawl an thleng asile kan kap aw dingih, mipi an tuar ding kan siang lo. Ralhrang lamin thuhla an theih veten ralhrang tamzet lawng panin an ra ih mipi an tuar ding duh lo ah kan zaten dung kan sip. A thok ahcun lawng kan urkang pei maw kan ti nan, kiangkap khua a kangkai ding kan phang ih lawngpi cu kan tlansan. Ralhrang pawlin fangfai dip thawng 10 le hrek tluk an cosal. Mpi zawn kan ruah ruangah fangfai le lawng fehsan in hmunhim pan kan si,” tin a sim.
Russia Ih Night Club Kangah 13 An Thi – Russia ram Kostroma khua ih Night Club pakhat ah zuri pakhat cun meisa kahsuaknak meithal a hmet puak ih Night Club ah kangah mi 13 an thi phah.
Mit hmutu cun “Zu a ri zetin a langih, mipi an lam dutdonak lamah meisa a kapsuak. Meisa cu zu lakih kang a si tikah a kangkai aw cak tukih duh vekin an mit thei lo. Nazi reipi hnu lawngah Night club kang cu an mit thei fang. Cumi ahcun mi 13 an rak thi man ih, hriamhma ngah tampi an um.
“Meisa kapsuaktu mino cu palik pawlin an kai ngah zo ih, Night Club neitu khal palik pawlin an kai. Club sungah mipi ziangzat ciah an um timi cu felfai zetin theih a silo. Palik pawl an thlen hnuah mipi 250 hrawng runsuah man an si. Mi 13 rori an thih tikah a poi ngaingai ih, club khal a kangse nasa,” tin a sim.
2009 kum khalah Russia ram Pin khua ih Night club pakhat a kang zo ih, cumi ahcun mipi 159 rori an rak thi. Cumi ruah cun tuitum cu mitat le palik pawlin in mipi 250 an runsuah man tikah mipi an mal phah in a lang.
Iran An Phuang Aw – Russia in Ukraine an do hnuah ram tamzet cun Ukraine an bom bangin Russia khal bawmtu an rak nei ve ih, Russia bawmtu lakah Iran khal an tel.
Iran in Russia an bawm, Russia ih hman dingni Drone an kuat timi cu American thlingthlatu pawlin thu an suah hmaisabik ih Iran lam an rak pha rero lawk. Asinan, tu ahcun Iran lam an phuangaw ih Russia an bom taktak thu an sim.
Iran cun anmai tuah Drone tamzet cu Russia an kuat ih, Russia cun Uraine khawpi kahnak ah an hmang rero men. Tu khalah Iran cun mawngtu nei lo Drone 1500 in 2400 tiang Russia a kuat bet tum tin anmah Iran lam cun an sim.
Ukraine khalin kan ram sungih innpi le hmunpi pawl kahnak ah Russia in Iran Drone an hmang tin an rak sim ve. Iran in Russia an bom ruangah US le UK cun Iran cu hremnak an pe bet rero zo. Russia in Ukraine an donak ah China, Iran le N.Korea ram pawl cu Russia bawmtu tin tarlangmi pawl an si. Khatlam ah US, UK, Germany, France le NATO sungtel pawl cun Ukraine an bawm rero ve. Curuangah ram pahnih doawknak cu reh lam a pan thei hrih lo ih, an doaw peh vivo hrih dingin a lang.
Leave a Reply