Ralhrang Mawtaw Le Palik Mawtaw An Pah Aw – Mandalay in Lashio fehnak lamzinpi ah ralhrang ralkap mawtaw le ralhrang palik mawtaw an pah aw ih, palik nunau pakhat le palik dang pakhat an thi.
Shan ramkulh Kyaukme in Mandalay lamih feh ralhrang palik Hnin Wat Yi Win le Aung Cho Lin tei pahnih ih tomi mawtaw cu Naungcho myone ah ralhrang mawtaw thawn an pah aw ngah.
Naung Cho ih um pakhat cun “PDF pawl an tih ruangah palik pahnih lamin palik mawtaw an mawng ngam lo ih,mipi mawtaw an lonmi an mawng. An manhlap tuk ruangah ralhrang mawtaw thawn an pah aw ngah ih, a hmunah palik pahnih an thi. An mawtaw khal a siat darh thluh a si,” tin a sim.
An rualpi pakhat cun “Thil umdan hi kan theithiam nawn lo. Traing neih a tul asile an hlankhan in an simthei cia theu nan, tuitum ahcun a simthei cia lo. Traing kai dingin a feh ih, hivekin cangsualnak an tong. Thei cia hai sehla hivek cangsual a thleng lo ding. Tu ahcun manhlap tukin an feh ih, an cangsual phah a si,” tin a sim.
Min Aung Hlaing A Suak Ngam Lo – Ralhrang ralkap hotu Min Aung Hlaing cu Russia in Myanmar a tlunsal hnuah ralhrang hmunpi pakhat Pin Oo Lwin a feh tul tengteng nan, a suakvak ngam hrih lo tin an sim.
Ralhrang in Pin Oo Lwin ah ralkap tlawngpi an nei ih, ralkap pawl camibuai an tuah tikah hrilnak an nei theu. Hivek cu amah Min Aung Hlaing rori atel theu ih, amah Min Aung Hlaing in a lawm hai. Tuitum ah September 26 ah Pin Oo Lwin ralhrang hmunpi ah hrilawknak nei an sinan, lamzin a him tuk lo timi phuahhlam in Min Aung Hlaing a feh ngam lo.
Min Aung Hlaing fapa AUng Pih Sung khalin Pin Oo Lwin khal innkhun 500 umnak a sak rero lai ih, cumi khal Min Aung Hlaing zoh phah a duh tuk nan, lamzin a him lo tin khual a tlawn ngam hrih lo tin ralhrang sunglam thu a suak.
Pin Oo Lwin le Mandalay karlak ahcun Mandalay PDF le TNLA pawlin nasaten ralhrang an do ih, boruak a sosang. Doawknak a um tikah khatlam khatlam in lamzin ah bomb an kam theu ih, Min Aung HLaing khal lamzin a him lo tin a khualtlawn a thulh hrih ve.
Leave a Reply