Ralhrang Palik Pawl Thailand An Thleng

Ralhrang Palik Pawl Thailand An Thleng – Thailand palik pawlin Myanmar Model Hanlay an kaihmi thuhla thawn pehparaw in Myanmar palik pawl cu zamrangten Thailand an thleng cih ih, an kutah Hanlay pe dingin Thailand palik pawl an sawm.

Asinan, Hanlay cun Myanmar palik pawl ton le biak a duh lo thu Thailand palik pawl a simthei ih, UN lam an hrolawk lohli ruangah Myanmar Model Hanlay cu Myanmar palik kutah hlan a silo. Tu ah Model Hanlay cu Thailand Airport sung Hotel ah a um hrih ih, UN lamin an buaipi thok zo.

Model Han Lay cun “September 22 zan ah Thailand lah-wah-kah lamin in phone ih, Myanmar palik pawl an ra thleng, na be duh maw,na tong duh maw? Na tong duh asile kannmah Thailand palik pawl khalin kan lo umpi dingih, nangmah kiltu ding pawl kan ret thluh ding in ti. Cutikah kei cun Myanmar palik pawl ka be duh lo ih, ton khal ka tong duh lo tin Thailand lah-wah-kah pawl ka rak simthei. UN khalin Thailand palik hnenah keimah le Myanmar palik tongawter lo dingin thu an rak sim man zo. September 23 zing tiang Thailand Airport sung Hotel ah ka um hrih ih, UN palai le Thailand palik ka hnenih an rat ding ruangah ka rak hngak rero lai a si,” tin BBC a simthei.

Hanlay hi 2021 April thla ih tuahmi Miss Grand ah Myanmar aiawh in rak fehsuak a si ih, Myanmar aiawh in a pholangawk caan ah ralhrang uknak a dokalh ih, leitlun theih ah Myanmar ram buainak a ausuahpi. Cuveten ralhrang cun Model Han Lay cu rampi dokalhtu a si tin thubuai an tuahsak cih ih, kai dingin thu an suah. Cumi ruangah Hanlay cu Myanmar ah tlung ngam nawn loin Thailand ah beu ringring a si.

Hanlay cun “September 21, sun nazi 2 hrawngah Vietnam ram in Thailand ah a kirsal ih, Thailand Airport ka thlen veten in rak kai. Myanmar ah daan ka pahbal ih Myanmar palik duhmi ka si tin Myanmar palik cun Vietnam an rak theihter. Cumi ruangah Vietnam cun leitlun palik duhmi a si tin Thailand palik pawl an rak theihter ih, cumi ruangah in kai. In kaih veten Thailand palik pawl cun Vietnam ah kuat kirsal in tumih, Vietnam ka thlen cun Myanmar ah kuat kir cih dingmi ka si.

“Cutikah Thailand palik pawlin Vietnam fehnak vanzam ah kai dingin in nor rero nan, ka duh lo ,vanzam ahcun ka lut duh lo. Keimah in buaipitu pawl khalin vanzam ah lutsal hrimhrim hlah tin in cah ve. Hivekih ka buai veten UNHCR ka phone cih ih, UN lam an cangvaih hngal tikah Vietnam vanzam ahcun in toter lo ih, Airport ih mikhumnak hmunah in khum.

“Tu cun Myanmar ih in kuat tumnak cu an hlawhsam zoin a lang. In kaih pekte ahcun kuat hngal rori in tum nan, kan duh lo lawlaw. Thailand ah kum 2 tlun ka um zo ih, kum 2 veikhat visa caan ka sauter theu. Tu ah visa ka poksau thei nawn lo ih, ramdang pakhat khat ah feh in Thailand luhsal hnuah visa potsau tum ka si. Cumi ruangah Vietnam ram ka fehsuak ih, Thailand ah ka kirsal.

“Hivekin harsatnak ka ton ruangah ka tuahmi le Myanmar mipi ka rak dinpinak hi ka sir aw hrimhrim lo. Myanmar mipi pakhat ka si vekin kan ram uknak tha lo duh theitu ka si ve tin ka ruat aw. Curuangah ka tonmi parah ka riahse lo ih, ziangvek harsatnak khal pahtlang vivo ka tum. Ram pakhat kan nei ve ih, ramdang ah harsatnak phunphun kan tong rero timi ruah tik ahcun riah ase ve zet.

“Ralhrang in kai dingin thubuai in tuahsak veten, Canada palai biakmi ka nei. Myanmar ih ka tlun thei lo veten raltlan dinhmun in Canada feh ka rak tumih, UN ah ka rak thehlut zo. Tu ah hivek buainak ka tong vivo ih, UN lamin zamrangten ram thumnak ah in kuat cih pei maw timi cu ka thei lo. UN humhimnak hnuaiah ka um zo a si,” tin a sim.