Ralhrang Pawlin Mipa An Sualpi

Ralhrang Pawlin Mipa An Sualpi – Frontier Myanmar Magezine ih thuthanglatu U Ye Mon cu ralhrang pawlin an kaih hnuah a burin a sualpi tin hmunhim a thlen hnuah amah in a relsuak.

Ralhrang in rampi thuneihnak an lak hnuah an thuhla sia ngantu thuthanglatu pawl cu kai dingin thu an rak suah ih, kaihmi khal tampi an nei. Ralhrang in kai dingin thu an suahmi lakah Frontier Myanmar thuhanglatu Ye Mon khal a rak tel ve.

Curuangah Ye Mon cu a himnak hrang 2021, October thla ah Myanmar suahsan in Thailand ah a rak tlan. Thailand a um hnuah an innsang pakhat damlo besia in a um ih, 2021, December 12 ah Thailand in Yangon ah a kirsal. Yangon airport ahcun a thup aw rero nan,ralhrang pawlin an rak kai ngah ih, mihremnak hmunah an fehpi hngal.

Ralhrang mihremnak hmun ahcun thu an sut ciamco ih an thusuhmi a let duh lo ruangah an thong, an sit, an vel ciamco ih, nazi 1 sung a bur’n an sualpi. Cumi hnuah na parih kan tuahmi pawl hi na relsuak lo ding timi tiam aw tin hminkhen an nganter. Hminkhen na ngan lo asile thubuai kan lo tuahsak dingih na luat lo ding tin an hro.

Ye Mon khal ralhrang pawl hnen ahcun zianghman relsuak lo dingin thu a tiam ih, hminkhen a ngan. Hminkhen a ngan theh hnuin ralhrang pawl cun an thlahsal. Cuveten Ye Mon cu a sungte pawl thawn zamrangten Thailand ahcun an tlansal ih, tu ahcun an sungkua in Thailand ah an um fel zo.

Thailand an thlenfel sal hnu lawngah Ye Mon cun Myanmar ralhrang pawlin a bur in an sualpi thu a relsuak ih, tutiang ka thinlung le taksa khal a damfel tha thei hrih lo tin a sim. Ralhrang in rampi thuneihnak an lak hnuah thuthanglatu mipum 140 an kai ih, cumi lakin thuthanglatu 55 pawl cu thawnginn sungah an umlai.

UN Ah Myanmar Ram Hruaitu Danglam Hrih lo – Ralhrang ralkap in rampi thuneihnak an lakmi khal thla 19 a kim zo nan, UN ahcun Myanmar hruaitu hmin cazin pawl an danglam hrih lo tin U Kyaw Moe Tun cun a rel.

Tu ah ralhrang ralkap le NUG cun UN ah Myanmar ram hruaitu si an cuh aw veve ih, UN cun ralhrang le NUG ah zohman a pom hrih lo veve. September thlacem rualin UN ah Myanmar cozah le Myanmar palai an hrilfel dingih, nikum bangin a thar hril loin a hlun an ring bet vivo khal a si thei.

Min Aung Hlaing cun rampi thuneihnak an lak hnuah rampi Prime Minister sinak a pe aw nan, tutiang ramleng le UN cun Min Aung Hlaing ih prime minister sinak an pom sak hrih lo. NUG khalin lailak president le Prime Minister an nei ve nan, UN ah pom an si hrih ve lo. UN ahcun Myanmar president ah U Win Myint le thuronpetu ah Daw Aung San Suh Kyi tei pahnih ngankhum an silai tin U Kyaw Moe Tun cun a rel.

U Kyaw Moe Tun cun “UN ah bluebook timi UN sungtel ram hruaitu pawl hminkhumnak a um. Cumi ahcun leitlun ram hruaitu pawl le cozah hmin ciar ngankhum a si. Tui dinhmun Myanmar ram hruaitu an nganmi cu President U Win Myint le ramdang vuanci ah Daw Aung San Kyi tei pahnih an si. Zianghman a danglam hrih lo.

“Ralhrang lam cun UN ah an hmin lang dingin nasaten an zuam rero nan, UN sungtuan cun thuneihnak latu tivek an dinpi dah lo ding thu a sim ih, UN ahcun ralhrang pawl hmun co ding cu a har tuk ding. Zuam rero hai khal sehla UN ahcun ralhrang in hmunram an lak thei kan zum lo,” tin a sim.

Putin Tomi Mawtaw Bomb An Puah – Russia president Putin khal a cangvaih dan le Ukraine a do ruangah a ramsung rori ah duh lotu a nei tam deuhdeuh ih, tu khalah Putin ih tomi mawtaw bomb an puah tin leitlun thuthang cun an tarlang.

Russia president Putin tomi mawtaw cu inn lam a tlunnak lamzin ah bomb an rak puah nan, an puah ngah lo ih Putin cu zianghman poi loin a him tin leitlun thuthang tampi cun an tarlang. Asinan, puak awn cu a ring tukih kiangkap a khu thluh. A thok ahcun Putin ih tomi mawtaw bomb an puah ngah rori ah an ruat nan, Putin ih tomi mawtaw cu a feh lan cih tin an sim.

Putin hi vei 5 rori an that tum zo nan, avei 5 in a him thluh thei lai. Hivek cu leitlun mithiam pawlin mak an tizet ih Putin kilhimtu pawl rak porhtu khal an um.

Putin in Ukraine do dingin thu a suah ruangah amah an that tum lawng siloin amah duhlonak cakuat khal a dong rero ih, hivek ruangah amah bang dingih cakuattu pawl khal an kai. Tuitum a mawtaw tomi bomb an puahnak kiang khalah Russia ralkap pawlin mi tampi an kai phah zo tin leitlun thuthang pawl cun an tarlang.