Tlangpar Ralthuamkai 7 An HLawhsam – Ralhrang in ralthuam rinsan in rampi thuneihnak an lak ruangah tlangpar ralthuamkai tamsawn le dothlengnak ralkap pawl cun theitawkin ralhrang an do rero laiah tlangpar ralthuamkai 7 pawl cun thupten ralhrang pawl ton an rak tum nan, an hlawhsam lellel.
Thupten ralhrang be tumtu tlangpar ralthuamkai 7 pawl cu KNLA PC, DKBA, ALP, LDU, NMSP, PNLO le RCSS pawl an si. Himi pawlkom 7 pawl cu ralhrang thawn kap aw lo dingin NCA hminkhen ngan khal an si ih,ralhrang in rampi thuneihnak an lak hnuah ralhrang hotu Min Aung HLaing rak tong rero zotu khal an si.
Naypidaw khawpi ah Min Aung Hlaing an tong rero nan, Min Aung Hlaing cun tongkam menin thu a rak tiam ih tuahsakmi taktak a rak nei lo. Cutikah pawlkom 7 pawl cun tui thla sungah ralhrang palai ton an tumsal nan, ralhrang lamin lo ton duhnak kan nei lemlo tin an rak let.
Tlangpar ralthuamkai pawlkom 7 aiawh in ralhrang betu Saw Kyaw Ngut cun “Kannih tlangpar ralthuamlkai pawlkom 7 cun ralkap pawl biak kan duh thu kan simthei ih, ca kan kuat. Ralkap lam khalin ca in let cih hngal ih,tuhrih ahcun tonawk tulnak kan nei hrih lo in timen. Biakremawk an duh hrih lo siko,” tin a sim.
CDF Mindat In Ralhrang 3 Kap That – Chin ramkulh Mindat khawpi kiangih vakkual ralhrang ralkap pawl cu CDF Mindat in December 13, sun nazi 2 hrawngah an kap ih, ralhrang 3 an thi tin mipi theihternak an nei.
CDF Mindat cun “Mindat khawpi kiangih vakkual ralhrang ralkap pawl cu kannih CDF Mindat in December 13, zanlam nazi 2:30 hrawngah naiten kan va kap ih, a hmunah ralhrang pathum an thih tlunah ralhrang pahnih hriamhma ngah an um. Cumi ruangah ralhrang pawl cun khuate lamah duhtawkin ralthuampi an kap ciamco. Kannih CDF Mindat pawl cu himdamten dung kan sip thei a si,” tin mipi theihternak an nei.
CDF Mindat thuphuangtu Salai Ha Awm cun “Theitawkin hmunram cu kan kauh rero ve. Ralhrang in duhduh in mipi an hnaihnok ih vak sukso ngam lo dingin an tuah ruangah kannih cun ralhrang vakkual hrimhrim zuah men kan tum nawnlo ih,kan kap ringring thlang ding. Tuitum ah ralhrang hmunram hal pawl kan rak kap ih,3 an thih thlunah ralhrang pahnih in hriamhma an ngah. Kannih lam cu kan him a si,” tin a sim.
CDF Pakhat A Thi – Chin ramkulh Paletwa CDF sungtel pakhat cu ralhrang ralkap donak ah a nunnak a hlan tin’ CDF Paletwa cun mipi theihternak an nei.
CDF Paletwa cun “CDF Paletwa sungtel Salai Khet Pio ( kum 25 ) cu thutiam a tuah bangin ram le miphun hrang December 12 ah ralhrang a do ih, a nunnak a hlan. Dothlengnak ih a nunnak a hlanmi cu upatnak kan pe ih, a sungte pawl kan tuarpi tuk a si,” tin CDF Paletwa cun thu an suah.
PDF 4 An Thlahliam – Makui ramthen Laungshe myone ih doawknak ah miraltha PDF pahnih cun ram le miphun hrang an nunnak an hlanih an sungte pawl le PDF pawlin an thlahliam. Sagaing ramthen Salinkyi myone ih doawknak khalah ralhrang pawlin PDF 3 an kai ih,pahnih an that zo tin Salinkyi PDF cun mipi an theihter.
Ralhrang mipum 70 hrawngin mipi ralkap umnak lam an pan tikah Laungshi PDF komkhawm cun lamlak ah ralhrang pawl an rak kap. Hmaisabik ahcun ralhrang pawl bomb an puah ih, cumi hnuah ralthuampi le ralthuam tein an kap bet. Doaknak ah ralhrang 5 an thi ih,ralhrang 13 natukin hriamhma an ngah tin Laungshe PDF cun thu an suah.
Laungshe PDF cun “Bomb kan puah hnuah ralhrang pawl kan kap. Naitein ralhrang pawl kan kap ih, rlahrang 5 an thi. Ralhrang 13 naatukin hriamhma an ngah ih, an thibet ko ding. Ralhrang ralkap cun duhtawkin ralthuampi an kap ciamco ve ih doawkak miraltha pahnih kan can.
“Ralhrang pawl an tuarnat tikah mipi inn an nawkkang phah ih mipi an kaih hnuah ralphaw ah an hmang. Tu ahcun kaihmi mipi tamsawn an thlahsal zo ih, mi pakhat cu an thlah hrih lo ruangah kan seherh ngaingai a si,” tin mipi an theihter.
Sagaing ramthen Salinkyi myone ih doawknak khalah ralhrang pawl cun PDF 3 an kai ngah ih, a lakin pahnih an that zo. Tu ah PDF pakhat ih umnak le a thuhla khal kan theih hrih lo tin Salinkyi PDF cun mipi theihternak an nei.
Salinkyi PDF cun “Ralhrang pawlin PDF 3 an kai ih pakhat cu a lu an tan ih, pahnih an that zo. A dang pakhat cu a umnak kan thei hrih lo. PDF thi pahnih lakin pakhat Aung Pai SOe cu a nui fa neihsun a si ih, a nu in a tuar tuk lawaw. A pa a thi zo ih , tu ahcun a nu lawng a dam. A nu cu kannih PDF pawlin nu vekin kan rawn zoh kumkhua ding a si,” tin mipi an theihter.
Ralhrang In Tlawngta An Hrem That – Naypidaw Lewe khua ih bomb puak thuhla thawn pehparaw in ralhrang cun tlawngta pakhat Phoeng Myat timi an kai ih, an hrem that men. Ralhrang in an hrem that hnuah a sungte pawl an simthei ih, lungphu cawl in a thi tin an rel men.
An sungte pakhat cun “Phoeng Myat hi kum 19 fang lawng a si lai ih, phunsang tlawngta a si. Ralhrang in rampi thuneihnak an lak ruangah tlawngkai peh duh lo pakhat a si ve. Lewe’ ih bomb puak ruangah ralhrang in rinhlelh hmangin an kai ih, an hrem that men.
“A thih hnuah ralhrang pawl cun a sungte pawl an ko ih lungphucawl in a thi an timen. A sungtel pawl cu a hmai lawng an zohter ih a taksa dang zoh an siang lo. Ralhrang pawlin an hrem thatmi a si ih, lungphucawl ih thi vekin suah an tum. Cucu , a sungte pawlin an lunglo lawlaw nan, ralhrang pawl cu ralthuam thawn an si tikah zianghman tithei kan nei lo a si,” tin a sim.
Ralhrang 47 An That Ih Nungdam In Ralhrang 24 An Kai – Shan ramkulh Nansan myone ih ni 5 sung doawknak ah ralhrang 47 an thi ih nungdam in ralhrang 24 kan kai tin TNLA ralkap pawl cun Shan News an simthei.
Nansan myone kungtar khua ahcun December 7 in December 11 tiang ralhrang ralkap le TNLA pawl an rak do aw. December 12 le 13 khalah ralhrang pawl cun tlunzuang in Kungtar khua bomb an thlak bet. Kungtar khua sung ahcun TNLA in hmunpi an nei ih, ralhrang pawl an va luh ve ruangah do aw an si.
Ni 5 sung ralhrang ralkap thawn an doawknak ah ralhrang lam siseh kanmah lam khal thi kan um tin TNLA ralbawi thuphuangtu cun a zat felfai a rel duh hrih lo. Asinan, ralhrang pawl do taktaktu TNLA ralkap pawl cun ralhrang an thahmi ruang pawl pholang in ralhrang thizat le nungdam ih an kaihzat pawl Shan News an simthei.
Leihnuai ih ralhrang dotu TNLA ralkap pakhat cun “Ni 5 sung ralhrang thawn kan doawknak ah ralhrang 47 an thi fel ih, ralhrang 24 nungdam in kan kai ngah. Ralhrang pawl cun kan umnak hmunah ralhrang mipum 100 tlun an thlah ih an zaten an thi thluh lam sawn men ding. Tu ahcun ralhrang thizat kan fiah theimi lawng kan rel hrih. Leihnuai ih ralhrang an um nawnlo ruangah ralhrang pawl cun December 12 le 13 ah tlunzuang an hmangih vanzam in bomb in thlak ciamco. Leihnuai ahcun ralhrang cangvai thei an um nawnlo a si,” tin Shan News a sim.
NUG In An Dinhmun Mipi An Theihter – NUG lailak president Duwa Lashila cun a tha thei bikin ralhrang an do ding thu December 13 ih NUG meeting ah a relsuak ih, a tufang an dinhmun relnak khal a nei.
NUG lailak president Duwa Lashila cun “Khatlam ahcun mipi lam tuar tuk lo dingin theitawk kan zuam hmaisa ding. Cumi tlunah kan ralkap mipi ralkap siseh tlangpar ralthuamkai pawl khal tuar tuk lo dingin thi mal thei bik dingin kan zuam ding. Ralhrang donak ahcun caksawn le thasawn in ralhrang pawl kan do vivo ding. Ramsung ah theitawkin kan cangvai dingih ramleng khalah rualpi tha nei tam sinsin dingin kan zuam ding.
“Ramsung khalah dothlengnak pawlkom pawl thazetin ke ka kar tlang khawm ih kan tuantlangnak a hnget. Ralhrang kan do tikah a phunphun in lamzin kan hawl. Ralhrang in tlunzuang raldonak an hman ciamcomi hi leihnuai lamah raldotu ralhrang an daih aw nawn lo timi langtertu khal a si. Khatlam ahcun ralhrang in tlunzuang raldonak an hman tikah mipi raltlan cu an tam deuhdeuh.
“Kannih dothlengnak pawlkom pawl hi leitlun ralkap daan thluntu kan si ruangah duh vekih cangvaih thei lo caan kan nei. Ralhrang ralkap uknak a hramin phong ko kan cimit tummi ah thlun dingmi daan a rak um ve. Cutikah a caan ahcun kan duh vekin kan cangvai thei lo a si,” tin a sim.
Argentina In World Cup Final An Lut – 2022 FIFA World Cup semi final puai hmaisa sawn hrang December 14 zingah Argetina le Croatia an lek ih Argentina cun 3-0 in Croatia an neh thei ruangah World Cup final an lut.
Caan hrek hmaisa sawn an thok hnu minute 30 tiang cu khat le khat nawr aw tonin sit goal theinak caan remcang taktak an nei lo. Minute 34 ah Croatia kawlkil cun Argentina hmaitlan Alvarez a pah tlu ih Argentina in penalty an neh. Captain Leonal Messi cun Argentina hrang a sit goal. Croatia lamin sit goal tum tukin an nor ciamco nan, Argentina khawl hmailamah an buai theu. Minute 39 ah Argentina in an nor thutthi ih Alvarez cun Argentina hrang mawizetin a sit goal. Goal dang a lut nawn loih cawlh an hmang.
Caan hrek neta sawn an thokih, Croatia sawn in sit goal tumin an nor ciamco lala. Asinan, Croatia lamin an nawr menmen ih Argentina khawl hmaiah tih an nung ciamco lo. Minute 69 ahcun Argentina captain Leonal Messi in mawi zetin bawhlung a kor zurzo ih, Alvarez hrang bawhlung a tuahsak hnuah Alvarez cun Argentina hrang a sit goal bet. Croatia in sit goal ve tumin theitawk an suah nan,goal dang a lut nawn lo ih, Argentina cun 3-0 in Croatia an neh hnuah 2022 FIFA World Cup final an lut.
Tuizan December 14, Myanmar caan zan nazi 1:30 ah World Cup Semi final puai neta sawn hrang France le Morocco an lek dingih a nehtu le Argentina in December 18, Myanmar caan nazi 9:30pm ah 2022 FIFA World Cup final an lek ding.
Leave a Reply