Ralhrang Tomi Mawtaw bomb An Puah Siat – Sagaing ramthen Mungzua le Ayadaw karlak lamzin ah ralhrang pawl cun anmai mawtaw siloin mipi mawtaw an to ih, mipi ralkap pawlin lamlak ah bomb in an rak puah siat.
Danger Force LPDF cun “August 25, zinglam nazi 8:40 hrawngah Ayadaw lamin ralhrang ralkap pawl tonak mawtaw pahnih cu paditar bomb 5 in kan rak puah ih, mawtaw pakhat a siat thluh. Mawtaw siat ahcun ralhrang thi an um thei. Mawtaw ih to ralhrang pawl cun duhtawk in kiangkap an kap ciamco nan, kannih cu himdamten dung kan sip thei.
“Ralhrang pawl tomi mawtaw cu mipi mawtaw siang lo cingih an hmansakmi tin kan thei. Mipi mawtaw a si ruangah poi ka ti ngaingai. Curuangah a tultuk lo ahcun mipi lam khualtlawng sukso vak lo dingin kan lo sawm duh. Tuitum ralhrang tomi mawtaw bomb kan puahnak ah Danger Force LPDF, AMT, Ayadaw PDF, Ayadaw Falcon Force pawl an tel ve a si,” tin thu an suah.
Hakha Ih Doawknak Ah CDF Pakhat A Thi – Chin ramkulh Hakha le Thantlang karlak ih doawknak ah CDF Hkha sungtel pakhat a thi tin’ doawknak ih tel mipi ralkap pawl cun mipi simtheihnak an nei.
CDF Hakha sungtel Salai Than Hei Lian cu August 25 ih doawknak ah ram le miphun a nunnak a hlan. Doawknak ralhrang kahsuakmi ralthuampi in a tlak ngah ih, a nunnak a cem. Salai Than Hei Lian cu Hakha le Thantlang karlak ih ralhrang donak ah theitawk suah in tel rerotu pakhat a si.
Ralhrang ralkap cun Hakha le Thantlang karlak ih Timit Lilawn luah an tum ih,mipi ralkap lamin rem an tilo ruangah Thantlang le Hakha karlak ahcun thla 1 zik an do aw thlang. July thlacem zikin Hakha le Thantlang karlak ah ralhrang ralkap le mipi ralkap komkhawm pawl an do aw thok zo.
Hakha le Thantlang karlak ih timit lilawn cu Thantlang ih um ralhrang pawlin eiin le ralthuam an phurh theilonak dingah tin 2021,October 21, sun nazi 2 hrawngah mipi ralkap pawlin bomb in an rak puah siat. Cumi hnu cun Thantlang ih um ralhrang pawl hrang eiin le ralthuam cu ralhrang dangin Helicopter in an pe theu.
Lilawn siatnak kum 1 a kim zik thlang tiah ralhrang pawl cun tuah thatsal an tum ih, mipi ralkap lamin rem an tilo ruangah thla 1 zik doaw thlang an si. Thla 1 zik an doawknak ah ralhrang thi an tam tin’ mipi ralkap lam cun an sim.
Palewa Ah Raltlan An Pung – Ralhrang in rampi thuneihnak an lak hlan ihsin Chin ramkulh Paletwa peng sung ahcun AA le ralhrang an doawk ringring ruangah raltlan an rak umcia ih, 2020 rampi hrilawk hlante ihsin AA le ralhrang do aw nawn loin an um lawk.
Ralhrang in rampi thuneihnak an lak hnu khalah AA le ralhrang do aw loin reizet an um ih, Paletwa peng sungin Chin raltlan thenkhat ah an khua ih tlung thei an um phah. Asinan, 2022 hnu cun AA le ralhrang lam remawknak felfai an neih thei lo tikah an hro aw phahphah ih, an kap aw phah.
2022 ,July 4 ah ralhrang cun Karen ramkulh ih AA sakhan pakhat cu bomb a thlak ih, AA 6 an thih phah tlunah an sakhan inn tampi a siat. Cutikah AA lam an lungawi thei nawnlo . July 18 ah Rakhine ramkulh Maungtaw myone ih thilri phur ralhrang mawtaw cu AA lamin an kap ve ih, ralhrang 14 nungdam in an kaih tlunah ralthuam tampi an laksak ih, ralhrang 11 hrawng an thi.
Hitin AA le ralhrang doawknak a sosang vivo ih, tuini tiang Rakhine ramkulh sung le Rakhine ramri Chin ramkulh Paletwa peng sung khalah AA le ralhrang an do aw deuh ringring. Hivek ruangah Paletwa peng sungin khua thenkhat pawl cu an khua ah an um ngam nawn lo ih, Paletwa lamah an tlan. August 25 tiangah Paletwa lamih tlan innsang 200 tlun an um zo tin buaipitu pawl cun an sim.
A hlanih AA le ralhrang buainak ruangah Paletwa ah raltlan sakhan 5 a rak um zo ih, raltlan mipum thawng 5 hrawng an umlai. Tuih raltlan thar pawl cu biakinn le phungki tlawng tivek ah an ret hrih ih, an umnak ding an tawlrel sak rero lai. Palewa peng sungih AA le ralhrang doawknak ruangah ralhrang cun tipar lamzin in eiin le thilri phurh an kham ih, Paletwa ah thilri man a kai, lei ding a um lo tluk tin Paletwa ih um pawl cun an sim.
Leave a Reply