Ralthuam Famkim Thawn Ralhrang Pahnih An Pe Aw

Makui ramthen Saw khawpi myomah palik sakhan ih hnatuan ralhrang palik pahnih cu Min Aung Hlaing kuthnuai ah hnatuan paih nawn loin May 17 ah ralthuam famkim thawn an tlanih mipi kutah an pe aw.

Palik tlan pahnih cun Zuri meithal zunkhat, MA3 zunkhat, kutden bomb 2, cerek 200 tlun pawl an tlansuahpi. Ralhrang palik pahnih cu Saw mipi uktu kutah pe aw an si ih, annih cun hmunhim ah an kuat zo.

Saw mipi uktu cun “Saw myone sungah palik 20 hrawng peaw an um zo ih, pawlkom dangdang kutah an pe aw. Ralthuam famkim thawn pe aw cu laksawng kan pe ding kan ti bangin, tuitum ih palik pahnih khal laksawng ah ting 50 veve pek kan tum. Ziangahtile, an ralthuam man khal tampi a si ih, nunnak thapin tlansuak an si tikah sunloih an phu tuk ve.

“Kannih Saw ramsung ahcun ralhrang uknak a fehtluang thei nawn lo ih,midang khal mipi hnenah pe aw vivo dingin kan sawm duh. Mipi lamtang cu a himbik a si,” tin a sim.