Ralhrang ralkap hotu Min Aung Hlaing in tlangpar ralthuamkai hotu pawl ton ka duh a ti hnuah Min Aung Hlaing tong dingin hminpe tlangpar ralthuamkai pawlkom 10 lakin RCSS cun May 20 ah ralhrang hotu Min Aung Hlaing an tongih thureltlangnak an nei.
Ralhrang hotu Min Aung Hlaing cun amah tong dingih hminpe tlangpar ralthuamkai le pawlkom 10 pawl cu a bur in ton a tum lo ih, pawlkom pakhat tetein thu a relpi zik. Tu ah hmaisabiknak hrang Min Aung Hlaing cun RCSS hotu a tong zo ih, pawlkom dang hotu tong peh vivo ding a si.
An tonawk thu ah RCSS lam cun “Remawknak hrekkaht kan nei. Kan rel bikmi cu daihnak um dingin le Federal Democracy uknak din thei rori ding timi an si. Asinan, hivek cu a tu rel, a tu ih tuah hngal theihmi thil a si ve lo. Remdaihnak cu theitawk in kan rak zuam rero zomi a si ih, tutiang a tawp kan thleng thei hrih lo timi khal mizapi theih a si.
“Cuvek ruangah biakawknak timi hi hrekkhat cun an zum thei nawn lo. Curuangah, remdaihnak le zalennak timi khal biakawknak a um bangin a takih langter ding khal kan si. Biakawknak ah tel uh, biakawk lo cun remnak tuah a theih lo. Kan zate duhmi cu remdaihnak a si,” tin mipi an simthei.
Ralhrang thuphuangtu Zaw Min Tun cun “Tuini ih an rel bikmi cu party tinkim telnak rampi hrilawk ding thu, Federal Democracy thu le Democracy ukawknak tivek pawl an si. Thuhla pahnih an relmi ah hotu veve remnak an nei thei ih, cipcar zetin relnak an nei.
“RCSS lamin tlangpar ralthuamkai pawlkom zaten telin remdaihnak thurel dingah caan felfai tuah dingin sawmnak an nei ih, kan hotu in a cohlan sak hnuah tlangpar ralthuamkai zaten telnak remdaihnak thurel ding cu a rangthei bikin a tikcu caan tuah kan tum. Tonawknak cu tlangpar miphun humhimnak, kilhimnak le hlawknak hrang a si. Kannih cun remdaihnak hrang thurelpi vivo kan tum a si,” tin mipi a simthei ve.
Ralhrang ralkap hotu Min Aung Hlaing tong dingin hminpe tlangpar ralthuamkai pawlkom 10 an um ih, cumi lakin pawlkom 7 pawl cu ralhrang thawn kapaw lo dingin NCA hminkhen ngan an si. Pawlkom 3 cu NCA hminkhen nganlo an si ve. Min Aung Hlaing tong dingin hminpe NCA hminkhen ngan tlangpar ralthuamkai pawlkom 7 pawl cu KNLA PC, PNLO, ALP, RCSS, DKBA, NMSP le LDU pawl an si. NCA hminkhen ngan lo tlangpar ralthuamkai le pawlkom lakin Min Aung Hlaing tong dingih hminpe pawlkom 3 pawl cu UWSA ,NDAA le SSPP pawl an si.
Tlangpar ralthuamkai pawlkom lakin thazang cak ti ih an relmi Kachin ralkap KIA, Karen ralkap KNU, Chin ralkap CNA, Kaya ralkap KNPP ,Burmese Army ABSDF pawl cun ralhrang hotu Min Aung Hlaing an ton lo ding thu mipi an theihter zo ih, AA, TNLA le MNDAA pawl cun ralhrang hotu Min Aung Hlaing ih sawmnak an let lo hrimhrim.
Leave a Reply