Muslim Lakin Rammi Sinak Dil Pawl Ting 80 An Cem – Rakhine ramkulh Maungtaw myone sungih um Muslim pawlin rammi sinak ID an dil tikah mi pakhat hrang ting 80 a cem thu a diltu pawl cun an sim.
Rakhine ramkulh ahhin Muslim tlunah Rohingya pawl khal an um ve ih kum reipi sung Myanmar ih um zo nan, Myanmar rammi sinak nei lo tampi an um. A hleice in Rohingya pawl tla cu Myanmar rammi sinak an neih lo tlunah Myanmar ram sung hmanah an duhnak hmun pohpoh an vak thei lo ih, bikhiah an tuahsak.
Rohingya le Muslim lakin Myanmar rammi sinak dil an um asile ralhrang pawlin ting 80 kyats an dil ih Myanmar hmatpungtin an pek hnu khalah feh thei cin tuahsakmi an um thotho.
Diltu pakhat cun “Rammi sinak card kan dil asile ting 80 kyats in dil ih, rammi si theinak card kan dil asile ting 20 in dil. Anmah cun ramkulh le Central pek a tul tiah an sim. Cumi khal duhduh in dil a theih lo, NVC timi rammi sinak dil theinak card nei pawl lawngin rammi sinak taktak an dil thei. Dil sung khal kum 1 lole kum 2 sung a rei theu.
Rakhine ramkulh sungih rammi sinak card nei pawl cu Rakhine ramkulh asikhalle myone dang khal duhduh in an tlawng thei lo ih, ramsung myone dangah an feh ding asile lah-wah-kah hnenah theihpinak ca an dil hmaisa. Lah-wah-kah hnen khalah sumpai tampi cemin theihpinak ca an dil. Rohingya le Muslim biaknak ih um lakin rammi sinak an pekmi pawl khal Bengali miphun tin an ret sak ih ralhrang cun Rohingya timi retsak an tum lo.
Ralhrang In $600 Million Man China An Kuat zo – Kachin ramkulh sungah ralhrang cun nasaten leihnuai thil mankhung an lai ciamco ih 2022 kum sung lawngah ralhrang cun leihnuai thil mankhung $600 Million man China an kuat ti’n hminsin tuahtu ISP Myanmar cun an tarlang.
ISP Myanmar cun China siah peknak hmunpi GACC ih casuahmi hmangin ralhrang pawl thilthup tuahmi an rak theisuak. Kachin ramkulh Mansiမန်စီ myone sungih leihnuai thil mankung laihnak ahcun anmah China mi khal tampi an um ih, kiangkap khua mipi thawn khalin buainak nei an um.
Ziangahtile , leihnuai thil mankhung an laih tikah hmunram tampi an siatter ih kiangkap mipi hrang boruak tha a mal deuhdeuh, sipuazi tuahnak ding a mal deuhdeuh tin an sim. Leihnuai thil mankhung laihnak ahcun ralhrang ralkap, ramri kil ralkap tlunah tlangpar ralthuamkai thenkhat khal thupte tel an um tin an sim.
2016 kum lam ihsin Kachin ramkulh sungah leihnuai lung mankhung rak lai an um thok ih ralhrang in rampi thuneihnak an lak hnuah a luarkai deuhdeuh. Hnatuantu China pawl cun Myanmar nunau pawl cu an hnenum dingah an la ih, nunau tamzet sualpi tong khal tampi an um tin Myanmar Resource Watch cun thu an rak suah ve.
Myanmar Resource Watch cun “China hnatuan pawl cun an hnenih it dingin Myanmar nunau an rualih naupai theilonak sii an pekmi cu that lo ruangah sul siat tivek khal an um. Thenkhat damlonak in thi khal an um,” tin an tarlang.
Thihcilh Bomb Puak Ah Ralkap 9 Thi – Pakistan ram Balochistan ramthen sungih thihcilh bomb puak ah Pakistan ralkap 9 an thi ih hriamhma ngah 13 an um ti’n Pakistan cun thu an suah.
March 6 ah thihcilh bomb paitu mi pakhat cun a bike mawnmi in ralkap mawtaw a pahhrim ih thihcilh bomb a paimi a puakter cih tikah a hmunah ralkap 9 an thi ih, hriamhma ngah 13 an um. Hriamhma ngah ralkap pawl cu zamrang zetin sizung panpi an si.
Thilthleng thawn pehparaw in TJP tapung cun anmai tuahmi a si thu an rak sim cih. TJP hi Islamic System vekin feh duh tapung ding thar an si ih, tuitum hi an cangvaihnak hmaisabik a si thu khal an sim. Pakistan ahhin tampung pawlkom tampi an um ve ih, a phunphun in an cozah an hnaihnok rero ve.
Leave a Reply