Rohingya Ruang 17 An Sar

Ayeyarwaddy ramthen Pathein myone Shwetaungyan tipi ah Rohingya ruang 17 an sar. Ruang an sarmi lakah nauhak an tam. Neta ah thuhla an zingzoi vivo ih, Rohingya lawng let ruangah thi an rak si. May 21 ah Bengal tipi in thlisia a hrang thokih, lawngpar ih um Rohingya pawlin nasa ten an tuar.

Lawng let ahcun mipum 17 an thi ih, nungdam in runsuahmi Rohingya mipum 20 tlun khal palik sakhan ah an khum thluh. Rohingya miphun hi leitlun in kan rammi an silo tin hnon tuar an si ih, rammi sinak nei lo tampi an um. Tuih ralhrang palik pawl kaihmi Rohingya 20 tlun khal Myanmar rammi sinak nei lo an si.

Buaipitu pakhat cun “Mipum 90 hrawng an si ding tiah kan ruat. Nungdam in luat mipum 23 cu Myanmar rammi sinak an neih lo ruangah an kai ih, ruang 17 kan hmu zo. Ruang 17 kan hmuhmi ah nauhak an tam zetih, ruang dang hmu bet vivo thei kan si. Tu ahcun anmah biaknak lamih hotu pawlin an vuiliam thluh zo.

“Anmai sim dan vek a si ahcun Rakhine lamin kan ra tin an rel. An lakah nauhak an tel nan, mipa tamsawn an si. Ruang hmuh hrih lomi tampi an umlai dingah kan ruat. Kaihmi pawl ziangtin an tuah ding, khawiah an ret ding tivek cu kan thei ban ve lo a si,” tin a sim.

Ralhrang thuphuangtu Zaw Min Tun cun “May 21, sun nazi 2 hrawngah Shwetaungyan palik pawlin tipi kapah rinhlelh mi 5 an hmu. An zohfel tikah Myanmar rammi sinak nei lo, thupten Myanmar ih lut an si. Rohingya mipum tamzet Malaysia ah kuat dingin puaisa an um. Cupawl ih tuahmi a siko. Thupten Malaysia feh tum an si ih, thlisia ruangah an lawng a let. Lawng let ruangah mi 14 an thi ih, kaihmi pawl cu an umnak khua le ram ah kuat an si ding,” tin a sim.

Rakhine ramkulh Sittwe khawpi ih Rohingya raltlan pakhat cun “Raltlan umnak hmunah harsatnak tampi kan tongih, cumi ruangah beiseinak nei in Malaysia lamah tlansuak tum an si. Zatek ah 90 cu harsat mangbang tuk ruangah tlan an si. Ramleng thleng pawlin an seherh tikah an ko aw, hinah tuan ding a um lo tikah ramdang thlen thei dan an hawl.

“Thupten ramdang feh dingin tlansuak zatek lakah mipum 35 hrawng cu tluangten an thleng theu. Culo cu lamzin tluanah kaih an tong lole cangsualnak ruangah an nunnak a cem. An fehnak ding ziangkim puaisa hnenah sumpai pe an si ih, cuvek dinhmun ah thih phah tampi an um. Miphun dang cu kan sinak in theihthiampi ve lo a si,” tin a sim.

Rohingya pawlkom hotu pakhat cun “Ramdang thleng dingin ting 30 le ting 50 pek a tul. Cucu, ziangruangah ti asile hnatuan in siang lo ih, sukso vah in siang ve lo. Curuangah, malaysia kan thleng asile kan hmailam a eng deuh pei maw tin an ruat. Cukhal puaisa pawlin a bumih an bum ruangah a si. Curuangah puaisa pawl kan kham thei asile hivek siattonnak a dem rori ding a si,” tin a sim.

KIA Le Ralhrang An Kap Aw – Kachin ramkulh phakan myone Kayinchuang khua ah KIA in ralhrang mawtaw fehkhawm bomb an rak puah ih, khat le khat an do aw cih. KIA le ralhrang khat le khat an doawknak ah mipi pakhat a thih phah ih, mipi lakin hiram ngah 2 an um.

Kayinchuang khua ih um pakhat cun “Nauhak thi cu kum 15 fang lawng a si. Ralhrang pawlin thei cingin an kap ih, a thi. Mipi hriam ngah pahnih an um ih, pakhat sawn cu China lungmankhung hawl a si. Biakinn ah rawl-ul thlacam an um ih,biakinn khal ralthuampi in a ngah. Tu ahcun ralhrang pawl an um nawn lo, an suak thluh zo,” tin a sim.

KIA le ralhrang doawknak ahcun ralhrang 5 an thi tin KIA thuthang lam cun an tarlang. Ralhrang pawl cu Sagaing in Kachin ramkulh sung lut an si.

KIA thuthang cun “may 23 zingah ralhrang pawl cu Sagaing ramthen sungin Phakan ah an lut. Cumi ruangah do aw kan si. Ralthuampi le ralthuamte hmangin khat le khat kan kap aw , kan do aw. Doawknak ah ralhrang 5 an thi. Phakan lamah ralhrang pawl ral an tho tumih, kannih in kan rak kham siko,” tin an tarlang.