Rohingya Thu Ah Ralhrang In Ramleng An Mawhthluk – 2022 ,August 25 cu ralhrang in Rohingya pawl an rak thah ciamco caan kum 5 kim ni a si tin leitlun pawlkom phunphun le ramdang palai zung tampi cun thu an suah. Cumi thuhla ah ralhrang an lungawi lo ih, ramleng pawlkom le ramdang palai zung mawthluknak ca an suah.
Ralhrang ralkap cun “2017, August 25 ih Rakhine ramkulh sung buainak thuhla thawn pehpar aw in UN, ramdang le ramleng palai pawl ih thusuahmi an nei hai. An thusuahmi zoh tikah dik lo tampi a um ih, ram pakhat ramsung buainak an hnaihnok.
“Dik tak tein kan rel asile Rakhine ramkulh sungih buainak kha ARSA misual pawlkom in ralkap Check Gate 30 le tatyin pakhat an rak do ruangah suak a si. ARSA in ralthuam an rak hman ruangah ralkap le mipi thi tampi an um ih, cumi ruangah ralkap pawl khal daan vekin remdaihnak hrang an cangvai.
“Buainak ruangah ARSA pawl cun ramleng suah thei dan an rak tawlrel cia thluh. ARSA ralthuamkai pawlih hronak ruangah ramleng suahsantu cazin a suahmi khal dik lo tampi a um. Khami ttumih ramleng suak pawl cu ram pahnih lungkimnak vekin hminkhen kan ngan dingih cohlang sal dingin timtuahnak kan nei rero.
“Kannih Myanmar cozah cun Rohingya timi miphun kan pom lo, kan cohlang lo. Ziangahtile , Myanmar santhuanthu ah Rohingya timi a um lo ih, daan vekin hman theinak khal a um lo. 1982 kum vekin Myanmar rammi taktak pawl cu hmatpungtin pek an si ih,miphun le biaknak thleidan a um lo. Rohingya ti ih hmang hrim rero pawl cu Politics ih hrolhawk ruangah a si.
“2017 kum ih buainak ah ARSA pawlih cangvaihnak thup tum, Rakhine ramkulh sungih um tlangpar miphun pawl zawn ruat lo, Myanmar cozah ih buaipi rero laimi theithiam duh lo ih, nor rerotu , thudik lo suah rerotu nan zaten ram pakhat ramsung buainak ah hrolh aw tum nan si ih, nan cangvaih dan kan dokalh a si,” tin ralhrang cozah cun thu an suah.
US Palai Taiwan A Feh – China cun US palai hrimhrim Taiwan ih feh an duh lo, an kham rero nan, US lamin China tongkam zianghman ah an ruat lo ih, August 25 ah US tlangsuak upa pakhat Marsha Blackburn khal Taiwan a feh ve.
US House Speaker Nancy in Taiwan a tlawn ruangah nasaten China lam an rak thinheng nan, Nancy hnuah US palai pawl cun ttum thum Taiwan an tlawng zo. Tuitum US tlangsuak upa pakhat Marsha Blackburn khal US vanzam in Taiwan ah a ttum durdo men ih, Taiwan lamin lungawi soparten an rak hmuak.
US tlangsuak upa Marsha Blackburn cun Taiwan president tlunah Taiwan ram hruaitu thenkhat khal a tong dingih, sipuazi , humhimnak le tuantlang dan ding pawl an rel ding. US cun China tongkam ngaihsak loin Taiwan an buaipi vivo ding thu an sim ih, China lam an sosang deuhdeuh.
Tutiang cu China lam ralthuam hmangin an cangvai hrih lo. Asinan, US lam an luarkai deuhdeuh ih, Taiwan an tlawng rero men. Hivek a si tikah China lamin Taiwan an kap taktak duh men ding titu khal an um. Asinan, doawknak a suak tikah ram sipuazi a tla thluh timi China lamin an theifiang ve tukih ,tutiang ralthuam hmangin an cangvai lo phah in a lang.
China in Taiwan kap bangta sehla Taiwan ram sungih doaw ding an si ih, US cun Russia le Ukraine buainak ih Ukraine a bom bangin Taiwan a bawm fang dingin a lang. Cutikah a tuartu ding cu China le Taiwan an si ih, a lakah US an rak hrolh aw men ding. Hivek ruangah doawknak taktak a suak thei hrih loin a lang.
Leave a Reply