Ralhrang ralkap in rampi thuneihnak an lak veten an kaihmi rampi thuron Daw Aung San Suh Kyi thawn pehpar aw in a sungte pawl cun ralhrang pawl cangvaih dan cu UN hnenah an hek tin may 25 ah thu an suah.
Daw Suh Kyi sungte pawl cun UN sungin dik lo zetih kaih tuar zingzoitu pawlkom hnenah ralhrang cangvaih dan an hekmi a si ih, ralhrang in Daw Suh Kyi an kaih dan thuhla cipciar zingzoi dingin an dil. Pawlkom cun leitlun hmun tinkim in dik lo zetih kaih tuar pawl an luat theinak dingah nasa ten hna an tuan.
Ralhrang ralkap cun rampi thuneihnak an lak rualin Daw Aung San Suh kyi an rak kai cih ih,thubuai 12 an orhter hngal. Thubuai an orhtermi sungin thubuai 6 hrang hremnak an pe zo ih, thubuai dang 6 khal Court ah an rel rero lai.
Ralhrang In Mindat Mino An Kap That – Chin ramkulh Mindat peng Pi khua ah ralhrang ralkap cun Salai Ha Sing Awm an kai ih, an that cih tin Mindat CDF cun mipi an theihter.
Mindat CDF cun “May 25, sun nazi 12 hrawngah ralhrang ralkap in Mindat peng Pi khua in Salai Ha Sing Awm an kai ih, an that cih. Culo midang nunau pakhat khal ralhrang ralkap ih an kai ih, an hruai. Nunau an kaihmi cu ziangtin an tuah, khawiah an ret timi kan thei hrih lo. Ralhrang in an thatmi Salai Ha Sing Awm cu Chin ramkulh aiawh in boxing rak lek zo a si,” tin mipi an theihter.
A tufang Chin ramkulh Mindat peng sungah ralhrang ralkap le mipi ralkap doawknak zianghman a um lo nan, ralhrang ralkap cun pi khua in mi pakhat an kap that ih, nunau pakhat cu san um loin an kai thotho cu a si.
Tek In Pyu Saw Htee Hotu A Tlak That – Sagaing ramthen Sagaing myone Thantaw khua ah Pyu Saw Htee hotu pakhat cu may 24, zanlam nazi 5 hrawngah tek in a tlak that tin an khuami pawl cun an sim.
Thantaw khuami cun “May 24, zanlam nazi 5 hrawngah ruah a sur tak tukih tek a tla kan thei. Neta ah tek in mi pakhat a tlak that tin thuhla kan thei ih, zohfel a si tikah Pyu Saw Htee hotu Ung Kyi a rak si. Ung Kyi cu Thantaw khua le a kiangkap ah Pyu Saw Htee hotu a si ih, kuthnuai tampi a nei. Thiltha lo tuahtu a si tikah khuanu in a thihnak ding lai a rel si ding tin kan ruat.
“Ung Kyi cu khua mipi torhmawh misual a si. Pyu Saw Htee hotu a si timi khal mizapi theih a si. Tuvek in tekin a tlak that tikah Pyu Saw Htee sungtel pawl cu a buai zet ding,” tin a sim.
A tufang Myanmar ram sung hmun tinkim ah ruah a sur, thli a hrangih, tek ih tlak thatmi an tam. Tek ih tlak thatmi pawl cu lo ih feh, ruah lakih rak um tivek deuh an si.
A Bur Ih Thahmi 170 An Um Zo – Ralhrang ralkap in rampi thuneihnak an lak hnuah a bur ih thahmi 170 an um zo tin NUG cozah cun may 25 ah thu an suah.
NUG ih thu an suah dan vek asile ralhrang in rampi thuneihnak an lak hnuah Sagaing ramthen, Makui ramthen , Chin ramkulh le Chin ramkulh sungin a bur ih thahmi an nei.
Ralhrang ralkap cun 2021, July 11 ah Sagaing ramthen kani myone sungin Yin khua le Kungtar khua in khuami 15 an that. 2021, july 26 in July 31 tiang Yin khua, Kyat Chuang khua le Taung Puak khua in a bur ih thahmi 40 an nei.
2021, December 7 ah Sagaing ramthen Salinkyi myone Dungtaw khua in ralhrang ralkap cun mipi 10 an rak that ih, an thahmi lakah nauhak kum 14 le kum 17 karlak mi 4 an tel. 2021, Demcember 24 ah kaya ramkulh Pruso myone Moe;so khua in ralhrang cun khuami 49 an urkang ih an that.
2022, January 6 ah Chin ramkulh matupi peng sungin ralhrang ralkap cun khuami 11 an kai ih, an that thluh. 2022, February thla sungah sagaing ramthen Myinmu myone in khuami 8, Kalay pengin khuami 3, Makui ramthen Gangaw myone in khuami 5 tin ralhrang ralkap cun an that. 2022, March thla sungah ralhrang ralkap cun Sagaing ramthen Shwebo myone Ukphu khua in mi 4 an that. 2022, April thla ah ralhrang ralkap cun Shan ramkulh Zua ngan khua in mipi 9 an rak that. 2022, May thla sungah Sagaing ramthen Yi Oo myone Mungdai khua in mipi 28 cu ralhrang in an urkang that thluh tin NUG cun an hminsin mipi an theihter.
Ralhrang Lawng 3 An Kap – Sagaing ramthen katar myone ah ralhrang ralkap hrang thilri phur lawng 3 cu May 25 ah PDF komkhawm in an kap ih, lawng pakhat a siat tin thu an suah.
Ralhrang ralkap lawng 3 cu May 25, zanlam ah katar tipi in an suak ih, sun nazi 2:30 hrawngah Wai Kyi khua kiangah PDF komkhawm in bomb zam thei 2 in an kap ih, kut tuah bomb kahsuak thei 7 in an kap bet.
Ralhrang lawng 3 lakin lawng pakhat an kap siat ngah ih,amah ten a feh thei nawn lo ruangah lawng 2 in an dir ih, Moeta’ tipi kap ah an cawl. Ralhrang lawng humhim dingin ralhrang dang mipum 100 hrawng an thleng cih ih, PDF thawn an kap aw. An Doawknak ah ralhrang thi an um nan, a zat an fiah thei lo thu PDF cun an thusuah ah an tarlang.
KNLA PC Naypidaw An Thleng – Ralhrang ralkap hotu Min Aung Hlaing be dingin Karen remdaihnak pawlkom KNLA PC hotu pawl cu May 25 ah Naypidaw an thlengih, May 26 , tuini ah ralhrang ralkap thawn kawm aw ding an si.
Ralhrang ralkap hotu Min Aung Hlaing cun tlangpar ralthuamkai hotu pawl ton a duh thu a rak sim zo ih, pawlkom 10 cun Min Aung Hlaing tong dingin hmin an pe. Hminpe pawlkom 10 lakin pawlkom 2, RCSS le NMSP cun ralhrang hotu Min Aung Hlaong an be zo.
Tuitum ah pawlkom pathumnak KNLA PC cun Min Aung Hlaing an kawm ve ding. Pawlkom 2 le Min Aung Hlaing tonawknak ahcun thuhla thar ciamco zianghman a um lo ih, Min Aung Hlaing in , Federal Democracy a pek thei thu, hrilakawknak an tuah ding thu pawl a rak sim men.
Tlangpar ralthuamkai pawlkom lakin KNU, KIA, CNA, KNPP le ABSDF pawl cun ralhrang hotu Min Aung Hlaing an ton lo ding thu an sim ih, AA, TNLA le MNDAA pawl cun Min Aung Hlaing ih sawmnak an let lo hrimhrim.
Leave a Reply