Super Man Khalin Myanmar A Remtha Thei Lo Ding Titu ASEAN Palai

Kalay Raltlan Hrang Ting 60 Kyat Tlun An Ngah – Sagaing ramthen kalay peng sungih raltlan pawl hrang Mizoram Aizawl khawpi ah pawlkom 5 cun sumpai hawlnak an nei ih, ni 2 sung kalay raltlan hrang sumpai an hawlmi ah Myanmar in ting 60kyat tlun an ngah zo.

MZP, MZI, MDM, PUMP le NUFDM pawl cun July 30 ah kalay peng sungih raltlan hrang Aizawl khawpi ah sumpai an rak khong hmaisa ih, India tangka in thawng 91 lenglo an ngah ih, Myanmar cun ting 23 kyats lenglo a si.

Pawlkom 5 cun August 6 ah avei hnihnak hrang Aizawl ah kalay peng sungih raltlan pawl hrang sumpai an hawlsal ih, India in ting 1 le thawng 50 tlun an ngah ih, Myanmar in ting 38 kyats tlun a si.

Lamzinpi zirah hlasakthiam pawlin hla an sak ih, an hmaiah raltlan hrang sumpai peknak ding bawmte an ret. Thenkhat in lamzin sukso vak pawl cu raltlan hrang sumpai an khong vivo phah. Cutin, pawlkom 5 pawl cun Aizawl khawpi ah ni 2 sung Kalay peng sung raltlan hrang sumpai an hawl zo ih, avei thumnak hrang August 15 ah Kalay peng sung raltlan hrang sumpai hawl peh an tum.

Kan Myanmar Myanmar a buai hnuah Mizoram cozah cun India cozahpi ih sian lo cingin Myanmar raltlan an cohlang ih, Mizoram sungih lut Myanmar raltlan pawl cu theitawk in an tuamhlawm. Tu ahcun Mizoram sungih raltlan lawng siloin Kalay peng sungih raltlan hrang sumpai hawlsak an si.

Tamu Mi Pahnih An Kap That – Sagaing ramthen Tamu khua myomah vengih Pahe lilawn ah ralhrang ralkap cun mi pahnih an kap that ih, anmah cun PDF pawl an puh.

Ralhrang ralkap cun “Pahe Lilawn ih duty pawl cun bike pakhat an rak dingter nan, an din duh lo ruangah an rak kap. PDF pahnih cu kutden bomb le kut tuah bomb thawn kan kai ngah a si,” tin thu an suah.

Tamu ih um pakhat cun Pahe Lilawn cu ralhrang ralkap le Pyu Saw Htee pawl umhmun khuarnak a si ih, sukso feh mipi hnenin sumpai an dil theu. Curuangah tuitum ih mi pahnih kap thattu cu PDF an si thei lo ih, anmah ralhrang ralkap an si. Tuitum lawng a silo ih, a hlan khalah Pahe Lilawn ih umhmun khuar ralhrang ralkap le Pyu Saw Htee pawl cun mi pakhat an rak kap that zo. Tuitum thawn Lilawn ah mi pathum an kah thatnak a si,” tin an sim.

KIA le PDF In Ralhrang Sakhan An la -Kachin ramkulh Phakan myone Haungpa uksuh Sezin khua kiangih ralhrang ralkap le Shanni SNA sakhan pakhat cu Kachin ralkap KIA le PDF tangtlang in August 8 , zinglam nazi 1 hrawngah an kap ih, an la thei tin kiangkap ih um pawl cun BBC an simthei.

Khuami pakhat cun “Doawknak ruangah khuami lakin mi pakhat a thi ih, midang pawl cu phungki tlawngah an relh thluh. Mithi cu kum 35 hrawngaih umpa Sezin khuami a si. Tuhrih ahcun KIA le PDF lamin ralhrang ralkap le Shanni tangtlang an neh zo nan, ralhrang raldonak vanzam a ra ding tin thuhla a suak.

“Zinglam nazi 1 in nazi 7 tiang puak awn phunphun kan thei. Cumi hnu puak awn a reh tikah KIA le PDF tangtlang in ralhrang sakhan an la thei tin thuhla kan thei cih. Sezin khua kiang ahcun KIA le PDF tangtlang in July 16 in ralhrang ralkap pawl cu ni 4 peh in an rak do zo. Cumi August 8 zingah a veihnihnak an dosalmi a si,” tin BBC a simthei.

Ralhrang In Khuami 15 Le PDF 10 An That – Sagaing ramthen Depayin myone Kaikan khua cu August 5 le 6 ah ralhrang ralkap pawlin an luhcilh ih, khua mipi 7 an that. Ralhrang pawl cun Sagaing ramthen Myinmu myone Letpanci khua khalin khuami 8 le PDF 10 an that tin PDF cun thu an suah.

Kaikan Khuami pakhat cun “Ralhrang pawl kan khua ih an luh tikah kannih khua mipi pawl cu kan himnak hrang ka tlan thluh. Ralhrang pawl cu ni 2 sung kan khua ah an um ih, ralhrang pawl khua ih an umsung cu zohman khua sungah kan lut ngam lo.

“Ralhrang pawlin khua an suahsan fel hnu lawngah khua ahcun kan lut. Ralhrang pawl cun khua sungin inn 145 an urkang ih, bike , mawtaw le mipi tampi tampi khal an urkang tel. Mithi ruang 7 kan sar. Kan sarmi mithi ruang pawl cu ralhrang pawl an rat caan ah tlan lo pawl an siko ding.

‘Ruang kan hmuhmi pawl khal ralhrang pawlin inn an urkang rual in an rak urkang telih a hmuihmel zianghman a theihtheih nawn lo. Khuami hrekkhat an kaihmi pawl an thlah hrih lo. An kaihmi pawl cu lamzin tluan an fehnak an hruai vivo ih, ralphaw ah an hmang. Tu ahcun umnak ding nei lo kan tam ih, ralhrang pawl an rasal pei maw tiah thinphang zetin khua thianfainak kan nei phah rero lai a si,” tin a sim.

Sagaing ramthen Myinmu myone Letpancin khua khal Aungust 1 in ralhrang ralkap pawlin an luhcilh ih, raldonak vanzam an hman ciamco ruangah khuami 8 le PDF 10 an thi tin Myinmu Civil Revolution Force cun thu an suah.

Myinmu Civil Revolution Force cun “Mipi lamin nan theih zo bangin ralhrang ralkap cun August 1 in Myinmu peng sung an rak luhcilh ih ,raldonak vanzam tiang an hmang. Cumi ah ralhrang pawl cun khuami 8 an that. Ralhrang ih thahmi khuami 8 pawl cu Letpancin khuami 7 le Kanyin khuami 1 an si. Doawknak ah PDF 10 an thi ih, meithal zun 9 le thildang neuhneuh ralhrang pawlin in laksak. Curuangah mipi nan bomnak kan ttul tuk a si,” tin thu an suah.

Letpancin Khuami pakhat cun “Doawknak khal a um lo,Asinan ralhrang hnenah thuthup simtu an um ih, ralhrang pawl cun kan khua an luhcilh. Khuami tamzet an kai ih, an hruai vivo. Kaihmi pawl ziangtin an tuah tikhal kan thei hrih lo. Inn 15 an urkang ih, bike le mipi thilri tampi an urkang sak. Tu ahcun pangai thei kan um thei hrih lo a si,” tin a sim.

Doawknak Ah Ralhrang 38 An Thi – Sagaing ramthen Ayadaw myone Minzua khua ah ralhrang ralkap le mipi ralap pawl ni 3 sung an do aw zo ih, ni 3 sung doawknak ah ralhrang 38 an thi tin Burmese Revolutionary Technical Front hotu cun mipi a simthei.

Burmese Revolutionary Technical Front hotu cun “August 4 in August 6 tiang ralhrang ralkap le kannih mipi ralkp pawl kan do aw. Ni 3 sung doawknak ah ralhrang 38 an thi tin kan fiah thei ih, mipi ralkap lamin hriamhma ngah 6 an um. Ralhrang thi ruang pawl cu ralhrang in vanzam in an phur.

“Ralhrang pawl cun Minzua khua in inn 350 an urkang ih, khuami pahnih an that. Ralhrang thi hrekkhat pawl cu cawkuang ah retih anmah ralhrang pawlin an urkang. Vanzam ih mithi ruang an phurhmi pawl cu ralbawi lampang an si ding. Innkang 3 ah ralhrang ruang 3 khal kan hmu. Ralhrang ralkap pawlin raldonak vanzam le ralthuampi tiang an hmang nan, thi an tam tikah an rakir sal ko ding. Curuangah doawknak a sosang thei a si,” tin a sim.

Super Man Khalin Myanmar A Remtha Thei Lo Ding Titu ASEAN Palai – Ralhrang ralkap in rampi thuneihnak an lak hnuah ASEAN cun theitawk in Myanmar ram buainak remfel an tumih, ralhrang pawl remnak 5 an tuahpi tlunah Myanmar ram buainak relpi dingin ASEAN palai tiang an ret.

ASEAN palai Prak Sokhonn khal Myanmar ah vei 2 a feh zo nan, ziangpipa hman a pitlin thei lo ih, Myanmar ram buainak cu a keel a si ringring lai. Hivek ruangah ASEAN cu a phunphun in mawthluk an si ih, Myanmar ram buainak tifel thei lo tiangah puh an tuar.

Cumi thuhla ah ASEAN palai Prak Sokhonn cun “Kei cu remnak tuahtu dingah hrilmi palai pakhat lawng ka si. Super Man ka silo. Keimai hmuhdan ahcun Super Man khalin Myanmar ram buainak a rem that thei ka zuam cuang lo a si,” tin CNA thuthang a simthei.

ASEAN in ralhrang pawl remnak 5 an tuahpi nan, ralhrang pawl cun pakhat hman an pitlin sak duh lo ih, ASEAN palai khal a duhmi pohpoh an tongter lo. ASEAN cun remnak kan lo tuahpimi 5 nan pitlin hlansung cu ASEAN meeting ah nan tel thei dah lo ding tin ralhrang an simthei nan, ralhrang pawl cun Ramsung buainak ah ramdang pawl hrolh aw ciamco hlah uh. Cumi cu ASEAN daan khalah a um a si tin ASEAN an let men.

China Lam Lungawi Thei Hrih Lo – US House Speaker Nancy in Taiwan a tlawn thu ah China an thinheng tukih, tuini tiang an thinhengnak a dai thei hrih lo.

China ramdang vuanci WangYi cun “Taiwan hi American ram a silo,kanmah China ramsungih um an si. US telnak hrimhrim cu buainak in a thlun ringring. Leitlun khawitawk hmun khalah US an tel cun buainak an kengtel. Tu ah Nancy in Taiwan a tlawngih nehnak co vekin US lam an rel aw. Asinan, zo uh zosawn a hlawh tling, zosawn a suaksal, zoin thu a neisawn timi cu a theihtheih mai a si,” tin a sim.

China cu US parah an thinheng tuk nan, tutiang cu ralthuam hmangin an cangvai hrih lo ih, ralthuam ih doawknak ding cu an ngam taktak hrih lo si ding titu khal an um.

Khatlam ah Israel cun Gaza thianfai an tummi cu an bansan hrih lo ih, Muslim miual PIJ pawl umnak ih an ruahnak hmun pawl an kap peh vivo tum. Tuitum ih buainak ahcun Gaza ih thuneihnak cotu Hamas pawl an tel lo tin an rel aw ih, cumi ruangah Israel cun Hamas pawl umnak hmunih an ruahnak cu an kap tel lo. PIJ pawl ih umnak hmun lawn an bat. Israel le PIJ buainak ah UN Securty pawl meeting an nei rero nan, thu felfai an suah thei hrih lo.